Read KIMERU BIBLE PROTESTANT EDITION Aro 8 Bible Online

Aro 8 - KIMERU BIBLE PROTESTANT EDITION bible

Aro 8

¹Tontû bûû, nandî gûtî kûgitîrwa îgamba bûbûûî kîrî barîa barî ndeene ya Kristû Jesû.

²Nîkwîthîrwa waatho bwa Roho ûrîa ûtweejaga ûtûûro ndeene ya Kristû Jesû, nî anthaûrîte kuuma waathoone bwa meeyia na gîkuû.

³Ûntû bûrîa Waatho bûtoombîre kûthithia nîûntû muntû atîûmba na bwaawe, Mûrungu nî abûthithîtie. Nî aatûmîre mûtaana waawe akari ta muntû mwîyia, nîkenda athiria meeyia.

⁴Mûrungu aathithîrie ûu nîkenda mantû ja îota jarîa Waatho buugîîte joojûra ndeene yeetû, tuî barîa tûtîtûûraga kûringana na ûrîa mîîrî yeetû îgûtwatha îndî tûtûûraga kûringana na ûrîa Roho agûtwatha.

⁵Barîa batûûraga kûringana na ûrîa mîîrî yaao îbaathaga, mathûgaanio jaao jatongagîîrua nî mîîrî yaao îndî barîa batûûraga kûringana na ûrîa Roho abeeraga, mathûgaanio jaao jaathagwa nî Roho.

⁶Kwathwa nî mwîrî kûretaga gîkuû, îndî kwathwa nî Roho kûretaga ûtûûro na thîîrî.

⁷Tontû bûû, muntû ûrîa wathagwa nî mwîrî aejaga mûnthû wa Mûrungu na atîûmba kwathîkîra Waatho bwa Mûrungu, nî mma atîûmba kûbûthingata.

⁸Barîa bathithagia ûrîa mîîrî yaao îkwenda batîûmba kûgwîria Mûrungu kinya rî.

⁹Îndî buî bûtîthithagia ûrîa mîîrî yeenu îkwenda, bûtûûraga ûrîa Roho abwathaga këethîra nî mma Roho wa Mûrungu nî atûûraga ndeene yeenu. Muntû wonthe ûrîa ûtî na Roho wa Kristû, tî wa Kristû.

¹⁰Îndî këethîra Kristû nî atûûraga ndeene yeenu, roho cieenu irî mwoyo nîûntû Mûrungu nî abûethetie babaagîru, kinya këethîra mîîrî yeenu nî îmîkuû nîûntû bwa meeyia.

¹¹ Këethîra Roho wa Mûrungu ûrîa waariûkîrie Jesû kuuma gîkuûne nî atûûraga ndeene yeenu, Roho ûu waariûkîrie Jesû Kristû kuuma kîrî akuû akaa mîîrî yeenu îrîa îkuujaga ûtûûro, nîûntû Roho waawe nî atûûraga ndeene yeenu.

¹²Tontû bûû, ataana na aarî ba baaba tûrî na îrandû, narîo îrandû rîu, tî gûtûûra ta ûrîa mwîrî jûgûtwatha,

¹³nîûntû bûkëeja gûtûûra kûringana na ûrîa mwîrî jûkûbwaatha bûgakua. Îndî bûkëeja gûtûûra ûrîa Roho akwenda na bûgatiga buru kûthithia mantû jarîa mwîrî jûkwenda, bûgatûûra mwoyo.

¹⁴Barîa batongagîîrua nî Roho wa Mûrungu nîbo ataana ba Mûrungu.

¹⁵ Tontû Roho ûrîa Mûrungu aatweere tî wa gûtweethia nkombo, kana wa gûtûma twigua ûguaa, îndî aatweere Roho wa gûtweethia aana ba Mûrungu na gûtûa inya ya gwîta Mûrungu, “Baaba! Baaba waakwa!”

¹⁶Roho wa Mûrungu wengwa na kinya roho cieetû nî akûûjî atî tuî tûrî aana ba Mûrungu.

¹⁷ Tontû tûrî aana ba Mûrungu, nî tuî tûkaa eene rûgai rûrîa eekîte nîûntû bwa antû baawe, naatuî tûkagaana na Kristû kîrîa Mûrungu amwîkîrîte këethîra tûkathangîkua amwe nawe nîkenda tûkumîthua amwe nawe.

¹⁸ Ndîona atî mîthangîko ya îgiita rîrî tî gîntû kinya aniini, twamîng'uanania na mwago jûrîa tûkaguûrîrwa.

¹⁹Biûmbe bionthe nî bieteerete birî na wîrîgîîro bûbûnene kwona Mûrungu akîonania aana baawe.

²⁰Nîkwîthîrwa biûmbe bionthe nî biaatithîrue mworoto jwaabio, tî ûntû bwa kwenda kwaabio biongwa, îndî nî ûrîa waabiûmbîre wendere u nîkenda bikara birî na wîrîgîîro.

²¹Biûmbe bionthe nî bieteerete rîrîa bikathaûrwa kuuma ûkomboone bwa kwoora, na biewe ûciathi bûrîa bûrî mwago bwa aana ba Mûrungu.

²²Nî twijî atî mwanka nandî biûmbe bionthe nî bitwîre gûkaya nî ûrûrû, ta bûrîa mûka aigagua akîewa kaana.

²³ Tî biûmbe bionka bikayaga, îndî kinya tuî, barîa tûrî na Roho, arî kîewa kîa mbere kîa Mûrungu, nî tûkayaga ndeene yeetû tweteerete tweethua aana ba Mûrungu, na mîîrî yeetû îthaûrwa buru.

²⁴Nîkwîthîrwa nî kîrî wîrîgîîro bûbû twoonokerue. Îndî wîrîgîîro bûrîa bûkwonekana tî wîrîgîîro. Tontû gûtî muntû wîrîgagîîra mantû jarîa akwona.

²⁵Îndî tûkëeja kwîthîrwa twîrîgîrîte mantû jarîa jatîkwoneka, nî tûkaraga tûjetereete tûrî na kûûmîîria.

²⁶O ûu nîu Roho atûteethagia ndeene ya kwaga inya gweetû. Nîkwîthîrwa tûtiijî kûromba ta ûrîa kwagîrîte, îndî Roho wengwa nîwe ûtwerencanagîîra agîkayagîra ndeene ûntû tûtîûmba kuuga na mîgambo.

²⁷Mûrungu ûrîa wiijî nkoro cieetû bwega nî amenyaga mathûgaanio ja Roho nîûntû Roho nîwe ûrombagîra antû ba Mûrungu, kûringana na wendi bwa Mûrungu.

²⁸Nî twijî atî Mûrungu nî atûmaga mantû jonthe jarîa jathithîkaga, jaguna antû barîa bamwendeete na beeti kûringana na mworoto jwaawe.

²⁹Tontû Mûrungu nî aaijî antû baawe kuuma tene, na arabathuura nîkenda bakang'uanana na Mûtaana waawe, nîkenda Mûtaana eethîrwa arî wa mbere kîrî ataana na aarî ba baaba.

³⁰Tontû bûû, barîa Mûrungu aathuurîre, nîbo eetîre na barîa eetîre, nîbo aaeetherie babaagîru na bau aeetherie babaagîru, nîbo aaere ûkumio bwaawe.

³¹Rîu nîatîa tûkauga mantûûne jaja? Mûrungu akëethîrwa arî rûteere rweetû, nûû ûûmba kwîthîrwa arî mûnthû weetû?

³²Mûrungu atacaîîre kinya Mûtaana waawe wa mûûmwe, îndî nî aamûritîre nîûntû bweetû twinthe. Këethîra nî aatweere Kristû, ka atîtûaa into bionthe?

³³Nûû ûûmba kûthitanga antû barîa Mûrungu athuurîte? Mûrungu wengwa nîwe ûbaeethagia babaagîru.

³⁴Nî muntû ûrîkû ûbagitîrîkia îgamba bûbûûî? Nî Kristû Jesû, ûrîa waakuîre na arariûka kuuma kîrî akuû na nandî nî akari nthî rûteere rwa ûrîo rwa Mûrungu agîtwerencanagîîra?

³⁵Nûû îndî ûgatwathûrana na wendo bwa Kristû? Nî mîthangîko, kana nî mantû jamaaî, kana nî kûnyamaarua, kana nî mpara, kana nî kîthûnû kana nî ûgwati, kana nî kûûragwa?

³⁶ O ta ûrîa Maandîko jaugîîte, “Tuî twîthagîrwa tûrî ûgwatiine bwa kûûragwa magiita jonthe nîûntû bwaaku. Tûthithagîrua mantû teeka tûrî ng'ondu ciîtîte kûthînjwa.”

³⁷Îndî amwe na jau jonthe, tuî tûrî nkûrûki ya oombani tugîîteethagua nî ûrîa waatwendere.

³⁸Nîkwîthîrwa nî mbijî na mma atî gûtî gîntû kîûmba gûtwathûrana na wendo bwaawe; tî gîkuû, kana mwoyo, kana araîka, kana athani ba îgûrû kana mainya ja îgûrû, kana mantû jarîa jarî o nandî, kana jarîa jakathithîka nyumeene;

³⁹na tî into birîa birî îgûrû mono kana birîa birî kûrîa kworokerete, kana gîntû kinya kîrîkû kîrî birîa biûmbi kîûmba gûtwathûrana na wendo bwa Mûrungu bûrîa aatwendere nabu ndeene ya Kristû Jesû Mwathani weetû.