Read KIMERU BIBLE PROTESTANT EDITION Aro 9 Bible Online

Aro 9 - KIMERU BIBLE PROTESTANT EDITION bible

Aro 9

¹Ndîarîa mantû ja mma, ntîkwaria ûrongo, nîûntû ndî ndeene ya Kristû. Nkoro yaakwa îtongeeretue nî Roho Ûmûtheru nîyo mûkûûjî ûntûûne bûbû

²atî ndî na kwithikîîra gûkûnene na rwakaî rûtî na kîthimi nkoroone yaakwa,

³nîûntû bwa ataana na aarî ba baaba, tabo antû beetû, barîa bagûtûma ndirîrîria kûrumwa nî Mûrungu na mbathûranwa na Kristû nîûntû bwaao.

⁴ Bo nî Aisraeli, Mûrungu nî abaeetherie antû baawe, na arabaguûrîra mwago jwaawe na areeka irîîkanîro nabo na arabanenkera Waatho na araboonia ûrîa bakamûthaathayia na arabaa mawîrane jamaingî.

⁵Biûjûjû birîa biaarî îgweta nî bio biciere Aisraeli na kinya Kristû kîûmuntû aarî wa rûrîîjo rwaao. Mûrungu ûrîa waathaga kunthe arokumagua kenya na kenya! Amen.

⁶Teeka nkuuga atî wîrane bwa Mûrungu nî bweete bwa ûtheri; nîkwîthîrwa tî antû ba Israeli bonthe barî antû ba Mûrungu.

⁷ Ningî teeka antû bonthe barîa baumenie na rûrîîjo rwa Abrahamu barî aana ba Mûrungu. Mûrungu nî eerîre Abrahamu atîrî, “Nî kuumania na Isaaka ûkagîta antû ba rûrîîjo rûrîa ni ndeekîre wîrane ngakwaa.”

⁸Ûu nî kuuga atîrî, tî aana bonthe barîa Abrahamu aarî nabo baarî aana ba Mûrungu. Îndî barîa baaciarîrwe kûringana na wîrane bwa Mûrungu nîbo bataragwa barî aana baawe ba mma.

⁹ Nîkwîthîrwa wîrane bûrîa Mûrungu eekîre bûriuga: “Nkeeja kîrî gwe îgiita o ta rîrî, na Sara akoona kaana.”

¹⁰Tî bûu bunka. Ataana ba Rebeka bobaîrî baarî ba îthe ûmwe, kîûjûjû gîeetû Isaaka.

¹¹Kinya mbere ya baciarwa na bathithia ûntû bûbwega kana bûbûûî, Mûrungu nî aathuurîre ûmwe waao tî ûntû bwa ûrîa aathithîtie, îndî nîkenda mworoto jwa Mûrungu jwa kûthuura jwîta na mbere.

¹² Nî eerîre Rebeka atîrî, “Ûrîa mûkûrû agatumîkîra ûrîa mûnini.”

¹³ O ta ûrîa Maandîko jakuuga, “Nî ndeendere Jakubu na ndîrathûûra Esaû.”

¹⁴Nîatîa tûkauga îndî? Ga tûkauga Mûrungu atîthithîtie ûntû bwa îota? Arî buru!

¹⁵ Nîkwîthîrwa nî eerîre Musa ûjû: “Nkaigîrua ûrîa nkeenda kîaao na mpende ûrîa nkeenda.”

¹⁶Tontû bûû, mantû jonthe jathithîkaga kûringana na kîaao kîa Mûrungu, na tî kûringana na wendi bwa muntû.

¹⁷ Nîkwîthîrwa Maandîko jaugîîte mantû jegiî Farao atîrî, “Ndakweetherie mûnene nîkenda inya yaakwa îkamenyeka na riîtwa rîaakwa rîmenyeke kunthe nthîgûrûûne.”

¹⁸Tontû bûû, Mûrungu aigagîîrua ûrîa akwenda kîaao na akoomia nkoro ya ûrîa akeenda.

¹⁹Îndî ûmwe weenu oomba kûmbûûria, “Mantû jakari ûu jakari rî, nîatîa Mûrungu atara muntû kinya ûrîkû arî mwîyia? Nûû ûûmba kûregana na wendi bwa Mûrungu?”

²⁰ Îndî muntû, nîwe ûû, omîîria kûûria Mûrungu kîûria? Kûrî rîo nyongû yûûmba kûûria mûûmbi wa nyongû, “Nîkî wampûmbîre nkari ûu nkari?”

²¹Mûûmbi wa nyongû oomba gûtumîra mûthetu jwa yûmba o ûrîa akeenda. Oomba kûûmba nyongû ijîîrî na mûthetu o jûu; akoomba nyongû îmwe îrî ya gûtumagîrwa rîrîa kûrî na biatho na îngî ya gûtumagîrwa kûruga ta wîthîre.

²²O ûu nîu gûkari kîrî Mûrungu. Nî eendere kwonania ûrîa mûthûûro jwaawe jûkari na amenyithania inya yaawe. Tontû bûû, nî oomîîrîrie îgiita rîrîraaja mono, antû barîa baamûthûûrîtie, barîa babuîri kûthirua buru.

²³Athithîtie ûu nîkenda onania wingî bwa mwago jwaawe kîrî antû barîa aigîrîtue kîaao; tuî barîa aathuranîîre kuuma tene tweewa mwago.

²⁴Nî tuî barîa eetîre, tî Ayahudi akî, îndî nî kinya antû barîa batî Ayahudi.

²⁵ Ûû nîu augîîte yukuune rîa Hosea: “Antû barîa bataarî baakwa nkabeeta ‘Antû baakwa.’ Mûgongo jûrîa ûûni nteendeete, nkajwîta ‘Mwendwa waakwa.’

²⁶ Gûntû kûrîa beeri ‘Buî bûtî antû baakwa!’ Kûu kungwa nîku bagatua gwîtagwa ‘Aana ba Mûrungu ûrîa ûtûûraga mwoyo.’”

²⁷ Kîroria Isaya nî aatûmîîrîrie na kajû gakanene mantû jegiî Israeli arauga: “Kinya këethîra antû ba Israeli nî babaingî ta mûthanga jwa îria, nî baakai bakonokua;

²⁸nîkwîthîrwa Mwathani agakanûkia nthîgûrû yonthe arî na mûthûûro jûmwingî.”

²⁹ O ta ûrîa Isaya aarorerie arauga, “Këethîra Mwathani Mweneinya ataatigarîrie bamwe beetû, tuî antû ba Israeli, tûrîngîthirua buru ta ûrîa Sodomu na Gomora ciathirîrue.”

³⁰Tuuge atîa îndî? Tûriuga ûjû: antû barîa batî Ayahudi barîa bataacûaga kûethua babaagîru, rîu bakwaa babaagîru. Bûu nîbu waagîrû bûrîa bwonekanaga nîûntû bwa gwîtîkia.

³¹Îndî Aisraeli barîa baatwîre gûcwaa waagîru bakîthingataga Waatho, batoomba kûûjûria Waatho bûu.

³²Nîkî îndî? Nîkwîthîrwa batacwîre waagîru na njîra ya wîtîkio îndî baabûcûîre na njîra ya mathithio teeka bwonoraga na njîra iû. Nandî bakûgitara bagwîra Iiga rîrîa rîgitaranagia.

³³ Maandîko nî jaugîîte mantû jegiî iiga rîu atîrî, “Raithîîria nî ngwîka kûu Zaiûni, iiga rîrîa rîgatûmaga antû bagiitara, rwaara rwa iiga rûrîa rûgatûmaga antû bagwa. Îndî ûrîa ûkamwîtîkia atîkorocokerwa nî nthao.”