Read KIMERU BIBLE PROTESTANT EDITION 1Ako 1 Bible Online

1Ako 1 - KIMERU BIBLE PROTESTANT EDITION bible

1Ako 1

¹Nî ni Paûlû ûrîa Mûrungu eetîre na kwenda kwaawe nîkenda aa mûtûmwa wa Kristû Jesû. Jûkieni nkeethi kuuma kîrî ni na kuuma kîrî mûtaana wa baaba Sosithene,

² buî ba kanisa ya Mûrungu îrîa îrî Korintho. Buî barîa bûtheretue ndeene ya Jesû Kristû na bweetwa bwaa atheru amwe na antû bonthe ba kuuma gûntû kunthe barîa barombaga Mwathani weetû Jesû Kristû arî Mwathani waao na weetû.

³Nî nkûromba bûkare na ûtugi na thîîrî kuuma kîrî Mûrungu Baaba weetû na Mwathani Jesû Kristû.

⁴Nî ncokagîria Mûrungu nkaatho magiita jonthe nîûntû bweenu nîûntû bwa ûtugi bwa Mûrungu bûrîa abûeete ndeene ya Kristû Jesû.

⁵Tontû nî bûgwatithanîtue na Kristû nî bûgunîkîte mantûûne jonthe jegiî rwaria na ûmenyo bwa mîthemba yonthe.

⁶Nîkwîthîrwa mantû jegiî Kristû nî jarikîte ndeene yeenu.

⁷Tontû bûû gûtî kîewa kinya kîmwe gîa kîroho bwagîte îgiiteene rîrî bwetereete kûguûrwa kwa Mwathani weetû Jesû Kristû.

⁸Kristû nîwe ûkabûmenyeera mwanka mûthia, bûtîkeeje kwîthîrwa bûrî na yaatia noo rîrîku ntukû îrîa Mwathani weetû Jesû Kristû akeeja.

⁹Mûrungu nî wa gwîtîkîka. Nîwe waabwîtîre nîkenda bûgîa ngwatanîro na Mûtaana waawe Jesû Kristû Mwathani weetû.

¹⁰Ataana na aarî ba baaba, buî nî nkûbwerenca riîtweene rîa Mwathani weetû Jesû Kristû atî bwinthe bwiiganague na bûkeethîrwa bûrî na mbathûkano gatîgatîîne keenû îndî bwîthîrwe bûrî na îthûgaanio rîmwe na yerekeria rîmwe.

¹¹Nîkwîthîrwa nî mbîîri nî antû bamwe ba kuuma nja ya Kiloe atî kûrî na mateta gatîgatîîne keenu ataana na aarî ba baaba.

¹² Ûrîa nkûûga nî atî, ûmwe weenu ariuga atîrî, “Ni nthingataga Paûlû,” ûngî akauga, “Naani nthingataga Apolo,” na ûngî akauga, “Ni nthingataga Kefa,” na ûngî akauga, “Naani nthingataga Kristû.”

¹³Ga Kristû agaanîtue? A rî, ga Paûlû aambîrwe mûtharabeene nîûntû bweenu? Kana ka bwabatithîrue riîtweene rîa Paûlû?

¹⁴ Nî ngûcokeria Mûrungu nkaatho nîûntû ntaabatithîrie kinya ûmwe weenu tiga Krisipasi na Gayo.

¹⁵Tontû bûû, gûtî we ûûmba kuuga atî aabatithîrue riîtweene rîaakwa.

¹⁶ Îî, ndîkûririkana! Nî ndabaatithîrie antû ba nja ya Stefano; îndî ntîkûririkana këethîra kûrî muntû ûngî ndabaatithîrie.

¹⁷Kristû ataantûmîre mbatithanagia îndî antûmîre ntûmagîîrie Nteto Înjega. Ntûmagîîrie ntîgûtumîra ûûme bwa kîûmuntû nîkenda gîkuû kîa Kristû mûtharabeene gîtîkeeje kwagua înya.

¹⁸Nîkwîthîrwa ntûmîîri ya gûkua gwa Kristû mûtharabeene nî waa kîrî barîa bakûûra îndî kîrî tuî barîa tûkwonokua, ntûmîîri îîu nî inya ya Mûrungu.

¹⁹ O ta ûrîa kwaandîki, “Nkathiria ûûme bwa barîa boome, na mbithe ûmenyo bwa barîa aciûku.”

²⁰ Tontû bûû rî, nîkû antû barîa boome boomba kwoneka? Barîkû aritani ba Mawaatho? Agambi barîa baijî gûtaarîria mantû ja îgiita rîrî barîkû? Mûrungu nî atûmîte ûûme bwa antû ba nthîgûrû îîjî bwonekana atî nî waa.

²¹Nîkwîthîrwa Mûrungu ndeene ya ûûme bwaawe, nî atûmîre antû barega kûmûmenya na njîra ya ûûme bwaao bongwa; aroona oonokie barîa beetîkagia na njîra irîa beetaga Waa, tayo nteto irîa tûtûmagîîria.

²²Ayahudi beendaga kwona biama bikîringwa na Agriiki bacwaga ûûme.

²³Îndî tuî nî Kristû tûtûmagîîria ûrîa waambîrwe mûtharabeene ûrîa kîrî Ayahudi nî kîgitaria na kîrî Antû barîa batî Ayahudi nî waa.

²⁴Îndî kîrî barîa beeti nî Mûrungu, beethîrwa nî Ayahudi kana beethîrwa nî Agriiki, Kristû nîwe inya ya Mûrungu na ûûme bwa Mûrungu.

²⁵Tontû bûrîa bwonekaga bûrî waa bwa Mûrungu, nî bûkûrûkîte ûûme bwa antû na bûrîa bwonekaga bûrî waagi inya bwa Mûrungu bûrî inya nkûrûki ya inya ya antû.

²⁶Nandî ataana na aarî ba baaba, ririkaneni ûrîa bwakari rîrîa Mûrungu aabwîtîre. Babaingî beenu bataarî baboome kûringana na ûûme bwa nthîgûrû na babaingî bataarî antû barî na inya kana baciarwa nja irî na îgweta.

²⁷Îndî Mûrungu aathuurîre birîa antû bonaga birî waa nîkenda eekîrithia barîa boome nthao na arathuura mantû jarîa nthîgûrû yonaga jatî na inya nîkenda eekîrithia barîa barî inya nthao.

²⁸Mûrungu nî aathuurîre birîa antû bathûmbagia na boonaga teeka bitî na gîtûmi, kinya birîa bionagwa teeka bitîo nîkenda akathiria birîa antû boonaga birî na gîtûmi.

²⁹Tontû bûû, gûtî muntû ûûmba gwikumia nîûntû bwa ûntû kinya bûrîkû mbere ya Mûrungu.

³⁰Îndî Mûrungu nîwe kaûmo ka ûtûûro bweenu ndeene ya Kristû Jesû. Nîwe Mûrungu aeetherie ûûme na waagîru bweetû, na noowe waatûthererie na aratûkûûra.

³¹ Tontû bûû ta ûrîa Maandîko jakuuga, “Muntû ûrîa ûkwenda gwikumia nî aikumagîîrie ûrîa Mwathani athithîtie.”