Read KIMERU BIBLE PROTESTANT EDITION 1Ako 10 Bible Online

1Ako 10 - KIMERU BIBLE PROTESTANT EDITION bible

1Ako 10

¹ Ataana na aarî ba baaba, ndîenda kûbûririkania atî biûjûjû bieetû bionthe biatongeeretue nî îtu na atî bionthe nî biaunîre îria birî thîîria.

²Barî athingati ba Musa nî babatithîrue bonthe ndeene ya îtu rîu na îria rîu.

³ Bonthe nî baarîre biakûrîa bia mûthemba jûmwe bia kuuma îgûrû,

⁴ na ningî nî banyuîre rûûjî o rûmwe rwa kuuma îgûrû. Rûûjî rûu rwaumîte igeene rîrîa rîaumîte îgûrû na rîrîa rîetanîtie nabo, narîo rîaarî Kristû wengwa.

⁵ Amwe na jau, barîa baingî baao bataagwîrîrie Mûrungu, nawe Mûrungu arabathirîria rwanda na biimba biaao biranyagania gûntû kunthe.

⁶ Rîu mantû jau jonthe jaakarîre ûu nîkenda jaae kîonereria kîrî baatuî tûtîkeeje kwirîrîîria mantû jamathûûku ta ûrîa bo baathithîrie.

⁷ Ningî tûtîkeeje kûthaathayia mîrungu ya mîng'uanano, ta ûrîa bamwe baao baathithîrie. O ta ûrîa Maandîko jakuuga, “Antû nî baakarîre nthî na bararîa na baranyua na bararûngama, baraina ndwîmbo.”

⁸ Ningî tûkathûngîîreni, ta ûrîa bamwe baao baathithîrie barathirua ntukû îmwe antû ngiri mîrongo îîrî na ithatû.

⁹ Tûkágerieni Mwathani ta ûrîa bamwe baao baathithîrie barooragwa nî njoka.

¹⁰ Ningî tûkanung'uneni ta ûrîa bamwe baao baanung'unîre nawe Mûrungu aratûma mûraîka araabathiria.

¹¹Rîu, mantû jaja jonthe jaathithîkîre kîrî bo nîkenda jakaa kîonereria kîrî bangî. Ningî jaandîkîrwe nîkenda jatûritana tuî barîa tûgûtûûra matukûûne jaja tûrî ja mûthiro jwa nthîgûrû.

¹²Tontû bûû ûrîa ûkwigua nî ariki wîtîkioone bwaawe nî amenyeere atîkagwe.

¹³Magerio jonthe jarîa bwonete mwanka nandî nî ta jarîa jejagîîra antû bonthe. Mûrungu nî mwîtîkua, nawe gûtî rîo agetîkîîria bûgerua na magerio jarîa bûtîûmba. Îgiiteene rîrîa bûkagerua, we akabwaa inya bûûmbe kûûmîîria na abwonie njîra îrîa bûkauma nayo magerioone jau.

¹⁴Tontû bûû, buî acoore baakwa, reganageni na kûthaathayia mîrungu ya mîng'uanano.

¹⁵Ndîaria naabuî antû barî ûmenyo, tontû bûû ciûreni bwingwa mantû jaja nkuuga.

¹⁶ Gîkombe kîa ndibei kîrîa tûtharîmaga rîrîa tûkûrîa kîatho kîa Mwathani rî, tî tharîke ya Kristû twîthagîrwa tûkînyunyanagîra? Ningî rîrîa tuunangaga mûgaate rî, tî mwîrî jwa Kristû twîthagîrwa tûkîrîjanagîra?

¹⁷Nîkwîthîrwa mûgaate jûu jwîthagîrwa jûrî jûmwe, kinya këethîra tuî tûrî babaingî, tûrî mwîrî jûmwe nîûntû tûrîjanagîîra mûgaate jûu.

¹⁸ Tûjûkie Ayahudi barî ngerekano; bonthe barîa barîjaga birîa biriti birî igongwana bagwatithanagua nî kûrîa kûu kuuma kîritîroone kîa igongwana.

¹⁹Îndî nîatîa nkwenda kuuga? Ka biakûrîa birîa biriti kîgongwana nîûntû bwa mûrungu jwa mûng'uanano kûrîbio birî nabio gûkûrûka biakûrîa bingi? Kana ka nkuuga mûrungu jwa mûng'uanano nî gîntû kîngî nkûrûki ya mûrungu jwa mûng'uanano?

²⁰ Ti ûu nkuuga! Ûrîa nkuuga nî atî igongwana birîa antû barîa batiijî Mûrungu baritaga, baritagîra roho inthûûku na tî Mûrungu. Naani ntîenda buru bûgwatanîra na roho înthûûku.

²¹Bûtîbua bûnyua gîkombe kîa Mwathani na bûnyua kîa roho inthûûku, na bûtîbua bûrîa biakûrîa bia meetha ya Mwathani na bûrîa bia meetha ya roho ithûûku.

²² Kana ga tûkwenda gûûkaûkia mûthûûro jwa Mwathani? Ga tûrî na inya nkûrûki yaawe?

²³ Antû bamwe baugaga, “Nî twîtîkîîirîtue kûthithia mantû jonthe.” Îndî tî mantû jonthe jarî bata. Kaîrî bakaûga, “Tûrî na rûûtha rwa kûthithia mantû jonthe.” Îndî tî mantû jonthe jagunaga.

²⁴Gûkágîta muntû ûcwaa mantû ja kwiguna akî, îndî acwaage jarîa jakaguna antû bangî.

²⁵Womba kûrîa kîonthe kîrîa kîendagua arîa nyama ciendagîrua ûtîgûtinda kûria biûria nîûntû bwa kwigambithia nkoroone yaaku.

²⁶ Tontû nthîgûrû na into bionthe birîa birîku nî bia Mwathani.

²⁷Muntû ûtîtîkîtie Kristû akëeja kûbwîta kîatho kwaawe, na bûgetîkîîria gwîta, rîeeni kîonthe kîrîa bûkanenkeerua bûtîkûûria biûria nîûntû bwa kwigambithia nkoroone.

²⁸Îndî muntû akëeja gûkwîra atîrî, “Biakûrîa bibi birariti birî kîgongwana kîrî mîrungu ya mûng'uanano,” rîu nîûntû bwa muntû ûu na ningî nîûntû bwa kwigambithia nkoroone, ûkábirîa.

²⁹Ndiuga nî kwigambithia kwa muntû ûu ûngî. Bwoomba kûmbûûria, “Ee atîa?” Ka ûciathi bwaakwa bûgatongerua nî ûûthû bwa muntû ûngî?

³⁰Këethîra ncokagîria Mûrungu nkaatho nîûntû bwa biakûrîa biû, nîkî nkûgambithua nîûntû bwa kûbirîa?

³¹Waarîa kana wanyua, kana ûntû bunthe bûrîa ûkathithia, thithagia nîûntû bwa ûkumio bwa Mwathani.

³²Tûûraga na mûtûûrîre jûrîa jûtîtûma muntû kinya ûrîkû agitara eethîrwa arî Mûyahudi, kana muntû ûrîa ûtî Mûyahudi kana muntû ûrîa ûrî wa kanisa ya Mûrungu.

³³Thithagieni ta ûrîa nthithagia; nî ngeragia kûgwîria antû bonthe mantûûne jonthe jarîa nthithagia. Ntîcwaga ûntû bûrîa bûkanguna ninka îndî ncwaga mantû jaarîa jakaguna antû bonthe nîkenda boonokua.