Read KIMERU BIBLE PROTESTANT EDITION 1Ako 11 Bible Online

1Ako 11 - KIMERU BIBLE PROTESTANT EDITION bible

1Ako 11

¹ Ing'uananagieni naani o ta ûrîa kinya ni nding'uananagia na Kristû.

²Nî nkûbûkaatha nîûntû bwa ûrîa bûndirikanaga mantûûne jonthe nîûntû nî bûmenyagîîra mooritani jarîa ndabûtigîîre.

³Îndî nî nkwenda bûmenye atî Kristû arî na Waatho kîrî arûme bonthe, nawe ntomûrûme arî na waatho kîrî mwekûrû waawe, nawe Mûrungu nîwe ûrî na waatho kîrî Kristû.

⁴Ntomûrûme ûrîa ûrombaga kana akaroria akunîkîrîte kîongo nî Kristû amenaga.

⁵Nawe mwekûrû ûrîa ûrombaga kana akaroria atîkunîkîrîte kîongo kîaawe nî mûkûrû waawe amenaga. Tontû ûû nî ta kwenja kîongo kîaawe turûrû.

⁶Mwekûrû akëeja kwîthîrwa atîkunîkîra kîongo kîaawe nî kaaba eenji mûtuundu jwaawe turûrû. Tontû nî nthao kîrî mwekûrû kwenjwa kana kûgiitwa mûtuundu, nî abuîrîte gûkunîkîra kîongo kîaawe.

⁷Gûtî gîtûmi gîa ntomûrûme akunîkîra kîongo kîaawe tontû we nî mûng'uanano na ûkumio bwa Mûrungu. Îndî mwekûrû nî ûkumio bwa ntomûrûme.

⁸ Nîkwîthîrwa ntomûrûme atoombîrwe kuuma kîrî mûka, îndî nî mûka woombîrwe kuuma kîrî ntomûrûme.

⁹Ningî ntomûrûme atoombîrwe nîûntû bwa mûka îndî nî mûka woombîrwe nîûntû bwa ntomûrûme.

¹⁰Kîu nîkîo gîtûmi kîa mûka akunîkîra mûtwe jwaawe kwonania atî arî waathoone bwa mûkûrû waawe na ningî nîûntû bwa araîka.

¹¹Îndî amwe na jau, ndeene ya Mwathani, mûka arî gîtûmi kîrî ntomûrûme o ta ûrîa ntomûrûme arî gîtûmi kîrî mûka.

¹²O ta ûrîa mûka oombîrwe kuuma kîrî ntomûrûme ûu nîu kinya ntomûrûme aciaragwa nî mûka. Mûrungu nîwe kaûmo ka into bionthe.

¹³Giteeni îgamba bûrî bwingwa këethîra nî kwagîrîte mûka ûtîkunîkîte kîongo kîaawe, aromba Mûrungu.

¹⁴Ka mûûmbîre jwa ntomûrûme jûtîkwonania atî kwîthîrwa arî na nchiûri indaaja nî nthao kîrî we?

¹⁵Îndî kîrî mûka nchiûri indaaja nî ûkumio kîrî we nîûntû aeei cio nîkenda imûkunîkîra.

¹⁶Îndî muntû ûreenda kûringa nkaanja ûntûûne bûû, nî amenye atî tuî tûtî wîthîre bûngî na ningî kinya kanisa cia Mûrungu itî na wîthîre bûngî rîrîa antû bakûromba.

¹⁷Amwe na jau, kûringana na mooritani jaja nkûbûritana, no mwanka ngwete mantû jamwe jarîa bûkûthithia ntîûmba kûbûkaatha nîûntû bwaajo. Nîkwîthîrwa rîrîa bwothûrana amwe kûthûrana kweenu gûtîretaga wega tiga ûthûûku.

¹⁸Bwa mbere buru, nî mbigîtue atî kûrî na mîgaûkano kîrî buî na nî ngûkara teeka ngwîtîkia atî ûntû bûû bûrîo.

¹⁹Nîkwîthîrwa no mwanka kwîthîrwe kûrî na mîgaûkano kîrî buî nîkenda barîa barî meene bakoonekana.

²⁰Nî mma nî bûthûranaga îndî rîrîa bûûthûreene bûtîûthûranaga nîûntû bwa kûrîa kîatho kîa Mwathani.

²¹Tontû îgiita rîa kûrîa, o muntû aciûûmbagia na biakûrîa biaawe na ageeta na mbere kûrîa, na nîûntû bûu bamwe beenu beethagîrwa barî na mpara rîrîa bangî boogiti.

²²Ka bûtî na nja cieenu kûrîa bûbuîrî kûrîjagîra na kûnyunyagîra? Kana bûrîona bûrîa bwega nî kûmenithia kanisa ya Mûrungu na gûtûma barîa batî na gantû bacokerwa nî nthao? Rîu mbwîre atîa? Mbûkathîrîrie nîûntû bwa ûntû bûu bûkûthithia? Arî! Ntîbûkaathîrîria ûntûûne bûbû.

²³Nîkwîthîrwa ûûni ndanenkeerwe ûritani bûrîa ndabûtigîîre nî Mwathani. Nabu nî atî, ûtukû bûrîa Mwathani aakunyanîîrwe nî aajûkîrie mûgaate,

²⁴na aracokeria Mûrungu nkaatho na arajûng'enyûranga arauga atîrî, “Jûjû nî mwîrî jwaakwa jûrîa jûriti nîûntû bweenu; thithagieni ûjû nîûntû bwa kûndirikanaga.”

²⁵ Ningî o ûu, baathiria kûrîa, arajûkia gîkombe kîrî na ndibei na arauga atîrî, “Gîkî nî gîkombe kîa kîrîkanîro gîkîerû kîrîa gîkûrikithua na tharike yaakwa. O rîrîa bûkûmînyua, thithagieni ûu nîûntû bwa kûndirikana.”

²⁶Nîkwîthîrwa îgiita rîonthe rîrîa bûkarîîjaga mûgaate jûjû na bûkanyua gîkombe gîkî, nî gîkuû kîa Mwathani bûkethagîrwa bûgîtûmagîîria mwanka rîrîa akeeja.

²⁷Tontû bûû, o muntû ûrîa ûkarîa mûgaate jûjû kana anyue gîkombe gîkî na njîra îrîa îtîagîrîte akeethîrwa akîyagîria mwîrî na tharike ya Mwathani.

²⁸Tontû bûû o muntû nî abuîri kwamba gwicûnkûûna bwega rîu acoke arîe mûgaate jûu na anyue gîkombe kîu.

²⁹Tontû muntû ûrîa ûkaarîa na anyue atîthûgaanîtie gîtûmi kîa mwîrî jwa Mwathani, nî îgamba airetagîra wengwa.

³⁰Kîu nîkîo gîtûmîte babaingî gatîgatîîne keenu beethîrwa batî na inya na baajitue, ningî bamwe nî bakuîte.

³¹Tûgäicûnkûûna bwega mbere, tûtîgambithua ûu nî Mûrungu.

³²Îndî tûgitagîrwa îgamba na tûgakanûkua nî Mwathani, nîkenda tûtîkeeje kûgambithua nthîgûrû îkîgambithua.

³³Tontû bûû, ataana na aarî ba baaba, etanagîîreni rîrîa bûthûreene nîûntû bwa kûrîa kîatho kîa Mwathani.

³⁴Këethîra muntû arî na mpara, nî arîjage nja yaawe nîkenda kûûthûrana kweenu gûtîgatûme bûgambithua. Mantû jau jangî jatigara, nkabûritana rîrîa nkeeja.