Read KIMERU BIBLE PROTESTANT EDITION 1Ako 12 Bible Online

1Ako 12 - KIMERU BIBLE PROTESTANT EDITION bible

1Ako 12

¹Ataana na aarî ba baaba, nî nkwenda bûmenya ûûma bwegiî biewa bia Roho Ûmûtheru.

²Nî bûkûmenya rîrîa bûtaijî Mûrungu nî bwaatithagua njîra na bûgakucîîrua kûthaathayia mîrungu ya mîng'uanano îrîa îtîaragia.

³Tontû bûû ndîenda bûmenye atî gûtî muntû ûrî na Roho wa Mûrungu ûûmba kuuga, “Jesû nî ûûmûrume!” Ningî gûtî muntû ûûmba kuuga, “Jesû nî Mwathani” atîtongeeretue nî Roho Ûmûtheru.

⁴ Kûrî biewa bia mîthemba mwanya mwanya îndî Roho Ûmûtheru ûrîa ûbieejanaga nî ûmwe.

⁵Kûrî na ngûgî cia gûtumîka mwanya mwanya îndî Mwathani ûrîa ûtumîkagîrwa nî ûmwe.

⁶Ningî kûrî na biewa bibingî bia kûthithia mantû îndî Mûrungu ûrîa weejanaga biewa biu na agatûma ngûgî iu ciûmbîkîka kîrî bonthe nî ûmwe.

⁷Mûrungu aejaga o muntû o muntû ûntû bwa kwonania arî na Roho nîkenda ûntû bûu bûteethia antû bangî.

⁸Ûmwe nî aeei kîrîra gîa kwaria mantû ja ûûme na ûngî aeewa kîrîra gîa kwaria mantû ja ûmenyo kuumania na Roho o ûu ûmwe.

⁹Roho o ûu ûmwe aejaga muntû ûmwe wîtîkio na muntû ûngî akaewa kîewa gîa kworania.

¹⁰Ningî Roho o ûu aejaga muntû ûngî kîewa gîa kûringa biama, na akaa ûngî kîewa gîa kûroria. Akaa kinya ûngî kîewa gîa kwathûrana këethîra mîthemba ya Roho nî yumanîtie na Roho wa mma. Akaa ûngî kîewa gîa kwaria na mîgambo mîgeni na akaa ûngî kîewa gîa gûciûra ûrîa mîgambo îîu îkuuga.

¹¹Biewa biu bionthe nabio biumanagia na Roho ûmwe, nawe aejaga o muntû kûringana na ûrîa akwona nîu kwagîrîte.

¹² O ta ûrîa mwîrî jûrî na irûngo bibingî îndî nî mwîrî jûmwe, o ûu nou Kristû akari.

¹³Nîkwîthîra tuî twinthe, kinya tweethîrwa tûrî Ayahudi kana antû batî Ayahudi kana tweethîrwa tûrî nkombo kana tûrî antû barî na ûciathi, twabatithîrue nî Roho ûmwe, ndeene ya mwîrî jûmwe na twinthe tûranyuithua Roho ûmwe.

¹⁴Mwîrî tî jwa kîrûngo kîmwe îndî nî jwa îrûngo bibingî.

¹⁵Kûgûrû gûkëeja kuuga, “Tontû ntî njara, ntî wa mwîrî,” bûu bûtîtûma kûgûrû kûu kwîthîrwa gûtî kîrûngo kîa mwîrî.

¹⁶Naku gûtû gûkëeja kuuga, “Tontû ntî riitho, ni ntî wa mwîrî,” bûu bûtîgiria gûtû kwîthîrwa kûrî kîrûngo kîa mwîrî.

¹⁷Gûkëeja kwîthîrwa mwîrî junthe nî riitho, kwigua kuuma kû? Ningî mwîrî junthe jûrîngîthîrwa nî gûtû kûtheri, nîatîa muntû arîngîuûmba kûnunkîra?

¹⁸Îndî rîu ûrîa gûkari nî atî Mûrungu aabangîre o kîrûngo o arîa kîrî mwîrîîne o ta ûrîa oonere kwagîrîte.

¹⁹Irûngo bionthe bia mwîrî birîngîkwîthîrwa birî kîrûngo kîmwe, mwîrî jûrîngîkwîthîrwa jûrî kû?

²⁰Îndî nandî ûrîa gûkari nî atî kûrî na îrûngo bibingî îndî mwîrî nî jûmwe.

²¹Riitho rîtîûmba kwîra njara, “Ntî na bata naagwe,” na ningî mûtwe jûtîûmba kwîra magûrû, “Ntî na bata naagwe.”

²²Îndî ûrîa gûkari nî atî irûngo bia mwîrî birîa bitî na inya nîbio birî bata nkûrûki.

²³Ningî irûngo bia mwîrî birîa tûthûgaanagia bitî gîtîîo, nîbio tûmenyagîîra mono. Nabio birîa twoonaga bitîthongi, nîbio bimenyagîîrwa nkûrûki ya bingî,

²⁴o rîrîa irûngo birîa bithongi bitîbataragua nî ûmenyeeri ta bûu. Îndî Mûrungu abangîte irûngo bia mwîrî na njîra îrîa îgatûma irûngo birîa bitî gîtîîo bitîîwa.

²⁵Tontû bûû gûtîkeethîrwe kûrî na kwathûkana mwîrîîne, îrûngo bigwatithanîtue amwe nîkenda bigateethanagia.

²⁶Kîrûngo kîmwe kîa mwîrî gîkëeja kwîthîrwa gîkîthangîkaga, irûngo bingî kinya bio bithangîkaga amwe nakîo. Ningî kîrûngo kîmwe gîgatîîwa, bingî bionthe bigwîragua amwe na kîo.

²⁷Rîu buî bûrî mwîrî jwa Kristû na o muntû o muntû nî kîrûngo kîaaju.

²⁸ Mûrungu nî eekîte o muntû antû aawe kaniseene. Ba mbere nî atûmwa bathingatwa nî iroria nabo bathingatwa nî aritani. Bau bathingatwa nî aringi-biama, ningî barîa baeei inya ya kworania na barîa bateethagia bangî na atongeria na bangî barîa baragia na mîgambo mîgeni.

²⁹Ka bonthe barî atûmwa? Ka bonthe barî iroria? Ka bonthe barî aritani? Ka bonthe baringaga biama?

³⁰Ka bonthe baeei inya ya kworania? Ka bonthe baragia na mîgambo mîgeni? Ka bonthe baciûraga mîgambo mîgeni?

³¹Tontû bûû, irîragîîrieni na wîru kûewa biewa birîa birî na gîtûmi mono. Rîu kambwîre ûntû bûrîa bwega buru nkûrûki ya jangî jonthe.