Read KIMERU BIBLE PROTESTANT EDITION 1Ako 13 Bible Online

1Ako 13 - KIMERU BIBLE PROTESTANT EDITION bible

1Ako 13

¹Kinya nkëethîrwa nî mbaragia na mîgambo ya antû kana ya araîka, îndî nkëethîrwa ntî na wendo nkari ta gîtuma kîa ndebe întheri kana mûrîro jwa nkengere.

² Kinya nkëethîrwa mpeei kîewa gîa gûtûmîîria rûteto rwa kuuma îgûrû na nkëethîrwa mpeei ûmenyo bwa iriga na kûmeenya mantû jonthe, ningî nkëethîrwa ndî na wîtîkio bûrîa bûûmba kûthaamia irîma, îndî nkëethîrwa ntî na wendo, ûûni ndî wa ûtheri.

³Kinya nkaejana bionthe birîa ndî nabio na kinya nkaeejana mwîrî jwaakwa jwakîîrua, îndî nkëethîrwa ntî na wendo, ndî wa ûtheri buru.

⁴Wendo nî bûmagîîria na bûkaîganîîrua kîaao; wendo bûtî rûriitho na bûtiikumagia kana bûcimbaimbia.

⁵Wendo bûtîagaga nthoni kana bûcienda na bûtîthûûrangaga.

⁶Ningî wendo bûtîtaraga mathûûkia îndî bûgwîragîrua ûûma.

⁷Wendo bûtîtiganagîria mantû rîrîa jooma. Nabu bwîtîkagia mantû jonthe na bûkeerîgîîra mantû jonthe na bûkoomîîria mantû jonthe.

⁸Wendo nî bwa kenya na kenya. Kîewa gîa kûroria gîkathira ntukû îmwe. Kinya kîewa gîa kwaria na mîgambo mîgeni gîkathira. Ningî kinya kîewa gîa gûciûra mantû gîkathira.

⁹Nîkwîthîrwa ûmenyo bweetû tî bûbûûjûru na kinya kîewa gîeetû kîa ûroria gîtîûjûri.

¹⁰Îndî rîrîa ûntû bûrîa bûûjûru bûkeeja, rîu biu bitî bibiûjûru bikathira.

¹¹Rîrîa ndaarî kaana, ndaaragia ta kaana, ndagwataga mantû ta kaana na ndaathûûganagia ta kaana. Îndî tontû rîu ndî muntû mûgima, nî ntigîte mantû ja waana.

¹²Nandî tuî tûrîona Mûrungu marwîrwî îndî nyumeene tûkamwona ûthiû kwa ûthiû. Nandî mbijî Mûrungu bûbûkai îndî nyumeene nkamûmenya buru ta ûrîa ambijî.

¹³Kûrî mantû jathatû jarîa jagaatigara. Najo nî wîtîkio na wîrîgîîro na wendo. Îndî wendo nîbu bûnene kîrî jangî.