Read KIMERU BIBLE PROTESTANT EDITION 1Ako 15 Bible Online

1Ako 15 - KIMERU BIBLE PROTESTANT EDITION bible

1Ako 15

¹Rîu ataana na aarî ba baaba, nî nkwenda kûbûririkania Nteto Injega irîa ndabûtûmîrîîrie, naabuî bûraciîtîkîîria na bûraciaanda wîtîkioone bwega ndeene yaacio.

²Nteto îîu nîcio ibwonokagia, këethîra bûkathingataga cio këethîra gwîtîkia kweenu gûtaarî kwa ûtheri.

³ Tontû nî ndabûtûmîrîîrie Nteto irîa ndaatûmîrîîrue na irî gîtûmi mono, nacio nî atî Kristû nî aakuîre nîûntû bwa meeyia jeetû, kûringana na ûrîa Maandîko jakuuga.

⁴ Ningî nî aathikîrwe na arariûka ntukû ya ithatû o ta ûrîa Maandîko jakuuga,

⁵ na atî nî aacionanîrie kîrî Peterû na nyumeene aracionania kîrî barîa îkûmi na baîrî.

⁶Nyumeene aracionania kîrî athingati nkûrûki ya magana jataano îgiita rîmwe, na barîa baingî baao barî mwoyo kinya naarua tûrî, kinya këethîra bamwe nî bakuîte.

⁷Aracoka aaracionania kîrî Jakubu na nyumeene kîrî atûmwa bonthe.

⁸ Mûthieene aracionania kîrî ni, nkari ta muntû waaciari îgiita rîaawe rîtîkinyi.

⁹ Tontû nî ni ûrîa mûnini buru kîrî atûmwa bangî bonthe ntîbuîri kinya gwîtwa mûtûmwa, nîûntû nî ndathangîkîrie kanisa ya Mûrungu.

¹⁰Îndî ûtugi bwa Mûrungu nîbu bûtûmîte mbîthîrwa nkari ûu nkari. Nabu ûtugi bûû bwaawe kîrî ni bûtaarî bwa ûtheri. Nîkwîthîrwa nî ndaaritîre ngûgî na inya nkûrûki ya atûmwa bau bangî bonthe, kinya këethîra tî ni ningwa ndaaritaga ngûgî îîu na bwaakwa, îndî nî ûtugi bwa Mûrungu bwaamîritaga bûrî ndeene yaakwa.

¹¹Îndî amwe na jau, këethîra nî ni ndaatûmîrîîrie kana nîbo baatûmîrîîrie, ûntû bûû nîbu tûtûmagîîria, naabuî nobu bwîtîkîtie.

¹²Këethîra ntûmîîri îrîa îtûmagîîrua yugaga Kristû nî aariûkîrue kuuma kîrî akuû, nî atîa îndî bamwe beenu baugaga atî akuû batîriûkua?

¹³Gûkëeja kwîthîra atî gûtî kûriûkua kwa barîa bakuîte, ûû nî kuuga atî kinya Kristû ataariûkîrue.

¹⁴Gûkëethîra Kristû ataariûkîrue, ntûmîîri yeetû kîrî buî îthîrwa îrî ya ûtheri na kinya gwîtîkia kweenu kwîthîrwa kûrî kwa ûtheri.

¹⁵Naatuî twîthîrwa tûrî akûûjî ba ûrongo mbere ya Mûrungu, nîûntû nî twakûûjîrîre na tûrauga atî Mûrungu nî aariûkîrie Kristû, na këethîra ataamûriûkîrie, nî mma atî akuû batîriûkua.

¹⁶Gûkëeja kwîthîrwa nî mma atî akuû batîriûkua kinya Kristû ataariûkîrue.

¹⁷Këethîra Kristû ataariûkîrue, wîtîkio bweenu bwîthîrwa bûrî bwa ûtheri na bwîthîrwa kinya nandî bûrî meeyiene jeenu.

¹⁸Ningî barîa baakuîre barî ndeene ya Kristû nî baûrîre.

¹⁹Gûkëeja kwîthîrwa wîrîgîîro bweetû kîrî Kristû nî mantûûne ja ûtûûro bûbû akî, baatuî tûrî antû ba kwigîîrua kîaao nkûrûki ya antû bangî bonthe.

²⁰Îndî mma nî atî Kristû nî aariûkîrue, na bûu bûraa bwa kûrikithia atî kinya barîa bakuîte bakariûkua kuuma kîrî akuû.

²¹O ta ûrîa gîkuû kîejîre nthîgûrûûne nîûntû bwa muntû ûmwe, o ûu nou kûriûkua kwonorete kuumania na muntû ûmwe.

²²O ta ûrîa antû bonthe bakuujaga kuumania na Adamu o ûu nou bonthe bakariûkua nîûntû bwa kûgwatithanua na Kristû.

²³Îndî o muntû akariûkua îgîîta rîaawe. Mbere nî Kristû waariûkîrue na nyumeene nî barîa barî baawe bakariûkua rîrîa agacoka.

²⁴Rîu mûthiro jûcoke jwîje, rîrîa akanenkanîîria Ûnene kîrî Mûrungu Baaba, aathiria kwînyangia waathani na moonene jonthe na mainya jonthe.

²⁵ Tontû no mwanka Kristû athane mwanka rîrîa Mûrungu agaciinda na eeke anthû baawe ruungu rwa makinya jaawe.

²⁶Mûnthû wa mûthia wa kûthirua nî gîkuû.

²⁷ Tontû Maandîko jaugîîte, “Mûrungu nî eekîte into bionthe ruungu rwa makinya jaawe.” Nî gûkûmenyeka bwega atî, rîrîa gûkwîrwa “mantû jonthe,” bûu bûtîgûtûma kinya Mûrungu atarwa arî ûmwe wa into biu tontû nîwe wîkîte into bionthe ruungu rwa makinya ja Kristû.

²⁸Rîrîa mantû jonthe jakeethîrwa jagwîkwa ruungu rwa waathani bwa Kristû, rîu kinya we wengwa, tawe mûtaana, agaciîka waathanine bwa Mûrungu, ûrîa weekîre bionthe waathanine bwaawe, nîkenda Mûrungu akaathaga bionthe.

²⁹Antû barîa babatithagua antûûne a barîa bakuîte rî, babatithagîrua mbi këethîra gûtî wîrîgîîro bwa kûriûkua gwa akuû?

³⁰Ningî kûrî na gîtûmi kîrîkû kîa baatuî kwîthîrwa magiita jonthe tûrî ûgwatiine?

³¹Ataana na aarî ba baaba, ûûni mbonaga gîkuû kîrî mbere yaakwa mîthenya yonthe! Kûgwîrua gwaakwa nîûntû bweenu nî kwîthîrwa bûgwatanîte na Kristû Mwathani weetû. Kîu nîkîo gîgûtûma mbuga ûû.

³² Gûkëeja kwîthîrwa kûrwaa kûrîa ndaarwîîre Efeso ta muntû ûkûrwaa na nyomoo cia kîthaka kwaarî na merekeeria ja kîûmuntû, nîatîa kûrîngînguna? Këethîra akuû batîriûkagua rî, o ta ûrîa nteto ikwarua, nîu “Tûrîeni na tûnyue, tontû rûûjû tûgakua.”

³³Bûkaîrueni! Acoore babaaî nî batûmaga muntû wa mîîtîre îmîega athûûka.

³⁴Ciûkeni mathûgaanioone jeenu o ta ûrîa kûbuîrîte, bûtige kûthithia meeyia. Antû bamwe kîrî buî batiijî Mûrungu. Nabû nî nthao inene kîrî buî.

³⁵Îndî muntû oomba kûûria, “A akuû bakariûkua atîa? Bakeethîrwa barî na mwîrî jûkari atîa?”

³⁶Kûria ûû nî waa utheri! Mbeeû îrîa waandaga îtiumaga mbere îtîramba gûkua.

³⁷Kîrîa waandaga gîtîthagîrwa kîrî mûmera junthe ta ûrîa jûcokaga gûkûra, îndî waandaga mpîndî, yeethîrwa nî ya nkano kana ya mûmera jûngî.

³⁸Îndî nî Mûrungu weejaga mpîndî îîu mwîrî o ûrîa akeenda îthîrwa îkari, o mpîndî akamîaa mwîrî jwa mûthemba jwaayo.

³⁹Mîîrî ya biûmbe bionthe îtîkari ûmwe. Antû barî na mwîrî jwa mûthemba jûmwe, nyomoo îrî na mwîrî jwa mûthemba jûngî, na ningî nyoni na makûyû jarî na mwîrî jwa mûthemba.

⁴⁰Kûrî na mîîrî ya biûmbe bia îgûrû na kûrî na mîîrî ya biûmbe bia nthîgûrû. Ûthongi bwa mîîrî ya biûmbe bia îgûrû nî mwanya na ûthongi bwa mîîrî ya biûmbe bia nthîgûrû.

⁴¹Kûrî na ûthongi bwa riûa na ûthongi bûngî bwa mweri, na kûrî na ûthongi bwa njota. Ningî kinya njota irî ûthongi bwa mîthemba mwanya mwanya.

⁴²O ûû nîu kûriûka gwa akuû gûkeethîrwa gûkari. Mwîrî jûthikagwa mûthetuune jûrî jwa kûthira, îndî jûkariûkua jûrî na mûkariî jwa gûtûûra kenya na kenya.

⁴³Mwîrî jûthikagwa jûtî na ûthongi, îndî jûkariûkua jûrî na mwago. Jûthikagwa jûtî na inya, îndî jûkariûkua jûrî na inya.

⁴⁴Jûthikagwa jûrî mwîrî jwa wîthîre îndî jûkariûkua jûrî mwîrî jwa kîroho. Këethîra kûrî na mwîrî jwa wîthîre, kinya mwîrî jwa kîroho jûrî o.

⁴⁵ Tontû Maandîko jariuga, “Muntû wa mbere, tawe Adamu, oombîrwe arî kîûmbe kîrî na ûtûûro,” îndî Adamu wa mûthia nîwe Roho ûrîa weejaga antû ûtûûro.

⁴⁶Kîrîa kîîjaga mbere nî mwîrî jwa wîthîre na nyûmeene mwîrî jwa kîroho jûkeeja.

⁴⁷Adamu wa mbere ûrîa wombi na mûthetu aaumîte nthîgûrû îndî Adamu wa baîrî aaumîte îgûrû.

⁴⁸Barîa bonthe barî ba nthîgûrû bakari ta muntû ûrîa woombîrwe na mûthetu nabo barîa barî ba îgûrû bakari ta ûrîa waumîre îgûrû.

⁴⁹O ta ûrîa twajûkîrie mûng'uanano jwa muntû ûu wombi na mûthetu, o ûu nîu tûkajûkia mûng'uanano jwa ûrîa waumîre îgûrû.

⁵⁰Ndîbwîra ûjû ataana na aarî ba baaba, kîrîa kîrî kîa mwîrî na tharike gîtîûmba kûgaîrwa ûnene bwa Mûrungu, na kîrîa kîrî gîa kûthira gîtîûmba kwîthîrwa kîrî na mûkariî jwa gûtûûra kenya na kenya.

⁵¹ Thikîîreni mbwîre witho: tî twinthe tûgakûa îndî twinthe tûkagarûrwa mîîrî,

⁵²tarumbeta ya mûthia îkagamba twinthe tûkagarûrwa ntûti ta kûmincia na kûmincûria. Nîkwîthîrwa tarumbeta ya mûthia îkagamba na akuû bariûkue ûrîa batîcoka gûkua kaîrî, naatuî tûgarûrwe.

⁵³Tontû mîîrî yeetû îrîa îrî na mûkariî jwa kûthira no mwanka îîkîrwe mûkariî jwa kûrega kûthira, na mwîrî jûrîa jûkuujaga jwîkîrwe mûkariî jwa gûtûûra kenya na kenya.

⁵⁴ Rîu, mwîrî jûjû jûrî na mûkariî jwa kûthira jweekîrwa mûkariî jwa kûrega kûthira, na kîrîa gîkujaga gîeekîrwa mûkariî jwa gûtûûra kenya na kenya, rîu nîrîo rûteto rûrîa rwaandîki rûkoojûra; “Gîkuû gîkûthirua; ûûmbani bûkwoneka!”

⁵⁵ “Gîkuû, kûûmbana gwaaku kûrî kû? Gîkuû, inya yaaku ya kwigithia ûrûrû îrî kû yo?”

⁵⁶Gîkuû kîonaga inya ya kwigithia ûrûrû kuuma kîrî meeyia, meeyia najo jakoona inya kuuma kîrî Waatho.

⁵⁷Îndî tûcokerieni Mûrungu nkaatho ûrîa ûtweejaga kûûmbana ndeene ya Jesû Kristû Mwathani weetû.

⁵⁸Tontû bûû, ataana na aarî ba baaba barîa mpendeete mono, ciaandeni bwega bûtî kwebaebua. Îteeni na mbere kûrita ngûgî ya Mwathani bûrî na wîru îgiita rîonthe, bûkîmenyaga atî ngûgî irîa bûritaga ndeene ya Mwathani tî cia ûtheri.