Read KIMERU BIBLE PROTESTANT EDITION 1Ako 16 Bible Online

1Ako 16 - KIMERU BIBLE PROTESTANT EDITION bible

1Ako 16

¹ Ndîuga ûjû mantûûne jegiî kûrita biewa bia gûteethia akristû: thithagieni ta ûrîa ndaathîre kanisa cia Galatia ithithagie.

²O ntukû ya mbere ya kiumia, o ûmwe weenu abuîri eekage na aûûmbagie gîntû kûringana na ûrîa atharimi. Bûthithagie ûu nîkenda gûtîkae atî rîrîa nkeeja nîrîo biewa bikoothûranua.

³Rîrîa ngakinya kûu nkanenkera barîa bûkathuura barûga ya kûbamenyithania nîkenda baikia biewa bieenu kûu Jerusalemu.

⁴Gûkëeja kwaa no mwanka mbîte, tûgeetania nabo.

⁵ Nkabûriûngîra ndathiria gûkûrûkîîra Makedonia, tontû no mwanka mbîtîîre ku.

⁶Mbuga ngakara naabuî kagiita gagakai kana kinya nthirîrîe kiingo gîa mpio kûu, nîkenda buî bwîja gûnteethia ngîîta rûgeendo rwaakwa rwa o kunthe kûrîa ngeeta.

⁷Tontû nandî ntîkwenda kûbwona nkûrûkîte akî, ndîrîgîîra gûkara amwe naabuî îgiita rîrîraja këethîra Mwathani akambîtîkîîria.

⁸ Îndî ngakara Efeso mwanka ntukû ya Pentekoste.

⁹Nîkwîthîrwa mwari jûmwariî nî jûrugûri jwa ndita ngûgî ya bata kûu kinya këethîra barîa bakûrwaa na ngûgî îîu kûu nî babaingî.

¹⁰ Rîrîa Timotheo agakinya kweenu, mûgwateeni ûgeni na bûtûme aigue atî na ûguaa arî amwe naabuî tontû we nî mûriti wa ngûgî ya Mwathani o ta ûrîa ûûni nditaga.

¹¹Tontû bûû, gûkéejeni kwonora kinya ûmwe weenu ûmûmena. Mûteethieeni nîkenda akathiria ndiûnga yaawe arî na thîîrî na nyuma ya ûu acoke kîrî ni nîûntû nî nkwîrîgîîra kûmwona amwe na ataana na aarî ba baaba.

¹²Mantû jeegiî Apolo, nî mwerencete mono eeje kweenu barî na akristû bangî, îndî nî akwoneka teeka atîkwenda kwîja îgiita rîrî. Akeeja rîrîa akoona kaanya.

¹³Kareni bûciûki na bûciaande wîtîkioone bweenu. Ningî gîeeni na ûchamba na bûgîe inya.

¹⁴Thithieni bûnthe bûrîa bûkathithia bûrî na wendo.

¹⁵ Rîu ataana na aarî ba baaba, nî bwijî atî antû ba nja ya Stefano nîbo baarî ba mbere gwîtîkia ndeene ya Akaia, nabo nî bairitîte nîûntû bwa gûteethia antû ba Mûrungu.

¹⁶Tontû bûû, ndîbwerenca bwathîkagîre antû ta bau na ningî bwathîkagîre bonthe barîa baritanagîria ngûgî nabo.

¹⁷Nkûgwîrîrua kwîja kwa Stefano, na Fotunato amwe na Akaiko antû eenu.

¹⁸Bagûtûma ndaboorera o ta ûrîa bûtûmîte bûboorera. Tontû bûû, tîîageni antû ta baba.

¹⁹ Kanisa cia Asia ikûbûkeethia. Akuila na Prisila, amwe na antû ba kanisa barîa bacemanagia nyomba yaao bakûbûkeethia nkeethi cia wendo bûbwingî ndeene ya Mwathani.

²⁰Ataana na aarî ba baaba bonthe bakûbûkeethia. Keethanieni na nkeethi intheru cia gûcûncana.

²¹Nî ni Paûlû nkwaandîka nkeethi iji na njara yaakwa ningwa.

²²Muntû kinya ûrîkû ûtîendeete Mwathani nî ûmûrume. Maranatha - Njû Mwathani weetû!

²³Ûtugi bwa Mwathani Jesû bûkarage naabuî.

²⁴Wendo bwaakwa nî bûkarage naabuî bwinthe ndeene ya Kristû Jesû.