Read KIMERU BIBLE PROTESTANT EDITION 1Ako 2 Bible Online

1Ako 2 - KIMERU BIBLE PROTESTANT EDITION bible

1Ako 2

¹Ataana na aarî ba baaba, rîrîa ndeejîre kîrî buî kûbûtûmîîria witho bwa mma bwa Mûrungu, ntabwarîrie ngîtumagîra nteto inthongi kana ûûme.

²Nîkwîthîrwa rîrîa ndaarî naabuî nî ndaatuîre atî ntîcwaa kûbûritana ûntû bûngî tiga akî Jesû Kristû na gûkua kwaawe mûtharabeene.

³ Ndeejîre kîrî buî nkari ta muntû ûtî na inya na ndî na ûgûaa bûbwingî na nkinainaga.

⁴Ntaabwarîîrie ntûmwa yaakwa na ûritani bwaakwa ngîtumagîra nteto înthongi cia ûûme, îndî ciarikithagua na inya ya Roho Ûmûtheru,

⁵nîkenda wîtîkio bweenu bûtîkeethîrwe bumanîtie na ûûme bwa kîûmuntû îndî bwîthîrwe bumanîtie na inya ya Mûrungu.

⁶Îndî nî ntumagîîria ntûmwa ya ûûme kîrî barîa barî antû agima maantûne jegiî wîtîkio. Îndî tî ûûme bwa antû ba îgiita rîrî kana bwa athani ba nthîgûrû îîjî barîa bakathira.

⁷Ûûme bûrîa ni ntûmagîîria nî ûûme bwa Mûrungu bûrîa bwithi. Bûrîa Mûrungu athuurîre bwa gûtûkumithia kinya mbere ya nthîgûrû îtîrombwa.

⁸Gûtî mûnene wa nthîgûrû îîjî waamenyere ûûme bûu. Këethîra nî baabwijî, batîngîkwambithia Mwathani wa ûkumio.

⁹ O ta ûrîa Maandîko jakuuga, “Ûntû bûrîa gûtî muntû wabwona kana wabwigua, ûntû bûrîa gûtî muntû kinya ûmwe wathûgaania bwoomba kûthithîka, nî bu bungwa Mûrungu athuranîrîte, nîûntû bwa barîa bamwendeete.”

¹⁰Mûrungu nî atûguûrîrîtie witho bwaawe na njîra ya Roho waawe. Roho nîwe ûcûnkûûnaga mantû jonthe akamenya ûrîa jakari, kinya mantû jarîa jaithi mono ja Mûrungu.

¹¹Nûû ûûmba kûmenya mathûgaanio ja muntû ungî tiga roho ûrîa ûrî ndeene ya muntû ûu? Ûu nou gûtî we ûûmba kûmenya mathûgaanio ja Mûrungu tiga Roho wa Mûrungu wenka.

¹²Baatuî tî roho wa nthîgûrû îîjî tweei, îndî tuî tweei Roho ûrîa watûmîrwe nî Mûrungu, nîkenda tûmba kûmenya biewa birîa Mûrungu atweete.

¹³Tontû bûû, tûtîbûritanaga nteto îîjî tûgîtumagîra ûûme bwa kîûmuntû îndî tûbûritanaga cio tûgîtumagîra nteto irîa tûritani nî Roho nîkenda tûritana ûûma bwa kîroho kîrî antû barîa barî na Roho.

¹⁴Muntû wonthe ûrîa ûtî na Roho atîûmba kwambîrîria biewa birîa bieejanagwa nî Roho wa Mûrungu. Kîrî we mantû jau nî waa na atîûmba kûjaciûra nîûntû jamenyagwa na ûtethio bwa Roho.

¹⁵Muntû wonthe ûrîa ûrî na Roho nî oombaga gûciûra mantû jonthe, îndî gûtî muntû ûûmba kûmûgambithia.

¹⁶ O ta ûrîa Maandîko jaugîîte, “Nûû ûûmba kûmenya ûrîa Mwathani akûthûgaania? Nûû ûûmba kûmwatha kîrîra?” Îndî tuî nî tûciûraga mantû jaja nîûntû tûrî na mathûgaanio ja Kristû.