Read KIMERU BIBLE PROTESTANT EDITION 1Ako 3 Bible Online

1Ako 3 - KIMERU BIBLE PROTESTANT EDITION bible

1Ako 3

¹Ataana na aarî ba baaba, ntoombîre kwaria naabuî ta ûrîa ndîngîaria na antû barîa barî na Roho wa Mûrungu. Ndaabwarîrie ta antû ba nthîgûrû na ta twaana tûnyi mûtûûrîreene jwa ûkristû.

² Kûraa no mwanka mbûrere na îria, antû a biakûrîa bibiûmo nîûntû bûtîngîûmba kûbirîa na kinya nandî bûtîûmba kûbirîa.

³Tontû kinya nandî bûtûûraga ta antû ba nthîgûrû. Rûriitho na mateta jarîa bûrî najo gatîgatîîne keenu rî, jatî kwoonania atî bûrî antû ba nthîgûrû na bûtûûraga ta antû ba nthîgûrû?

⁴ Rîrîa muntû ûmwe weenu akuuga, “Ûûni nthingataga Paûlû,” na ûngî akauga, “Ûûni nthingataga Apolo,” ka bûu bûtîkwonania kinya nandî bûtûûraga o ta ûrîa antû ba nthîgûrû îîjî batûûraga?

⁵Apolo nûû? Paûlû nûû? Tuî tûrî nthûûmba cia Mûrungu, irîa ciabuteetherie nîkenda bwîtîkia. O ûmwe weetû aritaga ngûgî irîa Mûrungu aamweere arita.

⁶ Ûûni ka ndaandîre mbeeû na Apolo areekîra rûûjî, îndî Mûrungu aratûma mbeeû yuuma na îkûra.

⁷Ûrîa waandaga na ûrîa wîîkagîra rûûjî batî gîtûmi. Îndî Mûrungu ûrîa ûtûmaga mbeeû îkûra nîwe ûrî gîtûmi.

⁸Ûrîa waandaga na ûrîa wîkagîra rûûjî, bang'anene o ûmwe, na o ûmwe waao akaeewa mûchaara kûringana na ngûgî îrîa aritîte.

⁹Tontû tuî tûrî aritanîri ngûgî amwe na Mûrungu, naabuî nî buî muunda jwa Mûrungu na bûrî mwako jwaawe.

¹⁰Kuumania na ûtugi bûrîa Mûrungu ampeete, nî mbaakîte mûsingi bwega ta mwaki ûrî na ûtea. Muntû ûngî nawe nî agwakîîra mûsingiine jûu. Îndî muntû ûrîa ûgwaakîîra mûsingiine jûu, nî amenyeere ûrîa agwaka.

¹¹Nîkwîthîrwa gûtî mûsingi jûngî muntû kinya ûrîkû oomba gwaka tiga jûrîa jwaakîrwe, naju nî Jesû Kristû.

¹²Antû bamwe bagaakîîra mûsingiine bagîtumagîra thaabu kana fetha, kana maiga ja goro. Bangî bagatumîra mîtî kana matî kana rûûa.

¹³Îndî wega bwa ngûgî ya o muntû bûkoonekana rîrîa ntukû ya Kristû îgakinya. Ngûgî ya o muntû îkoonekana ûrîa îkari na njîra ya mwanki.

¹⁴Këethîra birîa mwaki aratûmîrîte agîakîîra îgûrû rîa mûsingi jûu bitîîthua nî mwanki, ûrîa waakîte akaewa îtuui.

¹⁵Îndî këethîra ngûgî ya muntû kinya ûrîkû îkarûngûra, nîu nawe akaûrîrwa nî ngûgî iu îndî we wengwa akoonokua ta muntû ûkûrûkîrîîte mwankiine.

¹⁶ Ka bûtijî atî buî bûrî kîûrû kîa Mûrungu na ningî Roho wa Mûrungu atûûraga ndeene yeenu?

¹⁷Muntû kinya ûrîkû ûrîa ûkeenyangia kîûrû kîa Mûrungu, Mûrungu akamwînyangia. Tontû kîûrû kîa Mûrungu nî gîkîtherû na kîûrû kîu nî buî.

¹⁸Gûkaagîta muntû ûciayia. Këethîra kûrî we gatîgatîîne keenu ûgûciîra nî ûmûûme mantûûne ja ûûme bwa nthîgûrû îîjî nî abuîri kwaa kîaa nîkenda akaagîa ûûme bwa mma.

¹⁹ Nîkwîthîrwa mantû jarîa antû ba nthîgûrû bataraga nî ûûme, jethagîrwa jarî waa kîrî Mûrungu. Nî kwandîki Maandîkoone atîrî, “Mûrungu agwatagîra barîa boome wayieene bwaao”

²⁰ Kaîrî Maandîko jakauga, “Mûrungu nî aijî atî mathûgaanio ja barîa boome nî ja ûtheri.”

²¹Tontû bûû, gûtî we ûbuîri gwikumia nîûntû bwa mûtongeeria noo ûrîkû nîûntû into bionthe nî bieenu.

²²Antû na into bionthe nî bieenu: Paûlû na Apolo na Kefa, na nthîgûrû îîjî na ûtûûro kana gîkuû, îgiita rîrî rîrîo kana rîrîa rîkeeja.

²³Naabuî bûrî ba Kristû, nawe Kristû nî wa Mûrungu.