Read KIMERU BIBLE PROTESTANT EDITION 1Ako 4 Bible Online

1Ako 4 - KIMERU BIBLE PROTESTANT EDITION bible

1Ako 4

¹Antû babuîri gûtwonaga tûrî arûngamîîri na nthûûmba cia Kristû irîa itûmî gûtûmagîîria iriga bia Mûrungu.

²Ûntû bûmwe bûrîa arûngamîîri babuîri kûthithagia nî beethîrwe barî etîkua kîrî Mwathi waao.

³Ûûni ntîkûûria kinya nkagitîrwa îgamba nî buî kana nkagambithua nî koti. Nîkwîthîrwa kinya ni ningwa gûtî ûntû nkwigambithîria.

⁴Gûtî ûntû nkûmenya mpûûmba kûthitangwa nabu, îndî ûû tî ta kuuga ntî kagi. Mwathani nîwe ûngambithagia.

⁵Tontû bûû, bûkejeeni kûgambithia bangî îgiita rîtîrakinya. Eeteereni mwanka rîrîa Mwathani akeeja. We nîwe ûkaithûra mantû jarîa jaithi muunduune na jarîa jatwîre jakunîkîri na oonanie mantû jarîa jarî nkoroone cia antû. Rîu nîrîo o muntû agakumua nî Mûrungu.

⁶Mantû jarîa mbarîtie jambegiî na jegiî Apolo, nî ûritani kîrî buî ataana na aarî ba baaba. Ndîenda bwiritana kuumania natuî na bûthithie ûrîa Maandîko jaugîîte, “Gûkóneka muntû kinya ûrîkû gatîgatîîne keenu wîîja gwikumîria muntû ûmwe na amena ûngî.”

⁷Nî mwanya jûrîkû ûrî naju na bangî? Nîmbi ûrî nayo îrîa ûtîei? Këethîra ka weei rî, kûrî na gîtûmi kîrîkû kîa wikumia teeka gîtî kîewa?

⁸O-oo! Nî bûthirîtie kûnyira! Nî bûthirîtie kwaa itonga! Tûtî naabuî nî bweete anene! Tûrîngîenda bwîthîrwa bûrî anene nîkenda kinya tuî twathana amwe naabuî!

⁹Ndîthûgaania Mûrungu atweethetie atûmwa ba mûthia buru; tûkari ta antû bagitîri îgamba rîa kûûragwa. Gîtûmi nîûntû baatuî nî tweete kiirorerwa kîrî nthîgûrû na kîrî araîka na kinya kîrî antû.

¹⁰Baatuî tûrî biaa nîûntû bwa Kristû, îndî buî bûrî baboome ndeene ya Kristû! Baatuî tûtî na inya, îndî buî bûrî na inya. Buî nî bûkûewa gîtîîo îndî tuî ga tûkûmenwa.

¹¹Kinya nandî tûrî na mpara na nyoonta; tûtî na nguû injega na no tûkûûrwa na tûtî na gwa kûrara.

¹² Ningî nî twithangîkagia tûkîritaga ngûgî na njara cieetû twingwa. Twarumwa tuî ga tûtharimanaga na twathangîkua ga tûmagîîria.

¹³Twacaambua tûcokagia na biugo bibiega. Mwanka nandî tweete nkorogoncha ya nthîgûrû, ningî twaa takataka kîrî o muntû wonthe!

¹⁴Ntîaandîkîte mantû jaja nîkenda mbwîkîrithia nthao îndî njaandîkîte nîkenda mbûritana buî aana baakwa barîa mpendeete.

¹⁵Tontû kinya bweethîrwa nandî bûrî na aritani babaingî bakûbûritana Nteto Injega ciegiî Kristû, bûtî na ba abagu babaingî. Îthe weenu nî ûmwe nawe nîwe ûûni. Tontû nî ndaeere abaagu ndeene ya Kristû rîrîa ndabûtûmîîrîrie Nteto Injega.

¹⁶ Tontû bûû, ndabwerenca, bûthingatage mîîtîre yaakwa.

¹⁷Kîu nîkîo gîtûmîte mbûtûmîra Timotheo, mwana waakwa ûrîa mpendeete na mwîtîkua ndeene ya Mwathani. We akabûririkania mîîtîre yaakwa îrîa mbîtaga nayo ndeene ya Kristû. Mîîtîre îîu nîyo nditanaga makaniseene jonthe o arîa ndîreeta.

¹⁸Bamwe beenu nî baambîrîtie gwikumia bakîthûgaanagia ntîîja kîrî buî kaîrî.

¹⁹Îndî Mûrungu eenda ntîkarakara ntîreeja kweenu na rîu nîrîo nkaamenya mantû ja antû bau aikuumia, këethîra kûrî inya barî nayo kana nî nteto akî baaragia.

²⁰Tontû Ûnene bwa Mûrungu tî mantû ja nteto akî, îndî nî inya.

²¹Nî bûrîkû bûkwenda? Nî mbîje kweenu na kîbooko, kana mbîje na nkoro ya wendo na ya ûkiri?