Read KIMERU BIBLE PROTESTANT EDITION 1Ako 5 Bible Online

1Ako 5 - KIMERU BIBLE PROTESTANT EDITION bible

1Ako 5

¹ Nî mma nî gûkwarua atî kûrî na ûthûngîîri gatîgatîîne keenu na nî ûthûngîîri bwa mûthemba kinya jûtîûmba kwonora gatîgatîîne ka antû barîa batiijî Mûrungu. Gîtûmi nîûntû nî mbîîri kûrî ntomûrûme ûkûthengeera mwekûrû wa îthe.

²Naabuî nî bûgwiikumia! Anga teeka bûbuîri kwithikîîra? Îngeeni muntû ûrîa ûthithîtie ûu aume kîrî buî buru.

³Kinya këethîra ntî amwe naabuî meethoone, ndî amwe naabuî nkoroone. Naani nkari tëeka ndî amwe naabuî,

⁴nkûgiita îgamba riîtweene rîa Mwathani Jesû rîegiî muntû ûu ûthithîtie ûntû ta bûu. Bwothûrana amwe, naani ndî amwe naabuî nkoroone na inya ya Mwathani weetû Jesû,

⁵nenkanîreni muntû ûu kîrî Nkoma nîkenda mwîrî jwaawe jûkenyangua na nkoro yaawe nayo yûûmbe kwonokua Ntukû ya Mwathani Jesû yakinya.

⁶ Gwikumia kweenu gûtîagîrîte. Ka bûtiijî kamûtheega kaniini ga kwimbithia mûgaate, kaimbithagia mûtu junthe jûrîa jûkimîtwe?

⁷ Itherieni kuuma meeyiene jeenu, jarîa jakari ta mûtheega jwa kwimbithia jûrîa mûkûrû, nîkenda bûkaa antû babeerû ta kîûmbwa kîa mûtu gîkîerû, kîrîa gîtimbithîtue ta ûrîa bwagîrîte kwîthîrwa bûkari. Nî kwîthîrwa Kristû, ûrîa ûrî kang'ondu geetû ga Pasaka, nî athirîtie kûritwa arî kîgongwana.

⁸ Tontû bûû, tûrîjage kîatho gîetû kîa Pasaka tûtîgûtumîra mîgaate îrîa iimbithitue na mûtheega jûrîa mûkûrû jwa ûûî na ûthûûku. Îndî tûtumagîre mîgaate îrîa îtiimbithîtue, nayo nî mîgaate ya ûtheru na ûûma.

⁹Nî ndabwaandîkîîre barûgeene îngî yaakwa atî bûkagwatanîra na athûngîîri.

¹⁰Ntîkugîra athûngîîri ba nthîgûrû îîjî kana antû barîa akoroku kana atuunyani, kana barîa barombaga mîrungu ya mîng'uanano; tontû kwathûkana na antû bau nonga bûtî nthîgûrûûne îîjî buru.

¹¹Îndî ûrîa nkuuga nî ûjû: muntû ûrîa bûbuîri kwathûkana nawe nî mûkristû ûrîa ûrî mûmaramari, kana muntû wa îtenûka, kana ûrîa ûrombaga mûrungu jwa mûng'uanano, kana mûrumani kana mûrebi; muntû wa mûthemba jûu, kinya kûrîa bûkárîjanîra nawe.

¹²Tî ngûgî yaakwa kûgambithia antû barîa batî ba kanisa îndî buî bûbuîri kûgambithia barîa barî ba kanisa.

¹³ Mûrungu nîwe ûgambithagia barîa batî ba kanisa. O ta ûrîa Maandîko jaugîîte, “Îngeeni muntû ûrîa mûûî aume gatîgatîîne keenu.”