Read KIMERU BIBLE PROTESTANT EDITION 1Ako 6 Bible Online

1Ako 6 - KIMERU BIBLE PROTESTANT EDITION bible

1Ako 6

¹Rîrîa mûkristû weenu athûkîtue nî ûngî, nîmbi îtûmaga eeta kûmûthitanga kîrî aathûrani barîa batiijî Mûrungu, antû a kûmûthitanga kîrî atheru bamûgambithia?

²Ka bûtîkûmenya atî atheru nîbo bakagambithia nthîgûrû? Këethîra nî buî bûkagambithia nthîgûrû rî, ka bûtîng'ani kûgamba tûgamba tûniini?

³Ka bûtiijî nî tuî tûkagambithia araîka? Îndî nîatîa nkûrûki tûbuîri kûthiragia mantû jarîa jatwîjagîîra o ntukû o ntukû?

⁴Îndî nîkî tontû bwikagia magamba ta jaja kîrî antû barîa batî ba mûûrû jwa kanisa?

⁵Ndiuga ûu nîkenda mbwîkîrithia nthao. Ka gûtîûmba kwonora muntû ûmûûme gatîgatîîne keenu ûrîa ûûmba kûgiita magamba jarîa akristû beethagîrwa barî najo?

⁶Îndî antû a kûthithia ûu, mûkristû eetaga kûthitanga ûngî kîrî antû barîa batîtîkîtie nîkenda babagambîra!

⁷Nî mma atî rîrîa buî bûthitanganaga bwingwa kûu nî kwonania atî nî bûremeeri buru. Ti kaaba gwîtîkîîria kûthithîrua ûthûûku? Tî kaaba wîtîkîîrie gûtunywa birîa birî biaaku?

⁸Îndî buî bwingwa no buî bûthûûkanagia na bûgatuunyana, kinya mûkristû agatuunya ûngî.

⁹Ka bûtiijî atî antû barîa batîagîri batîona rûgai Ûneneene bwa Mûrungu? Bûgaciayieni, nîûntû gûtî amaramari kana barîa barombaga mîrungu ya mîng'uanano kana athûngîîri kana arûme barîa bathengagîîra arûme bangî na aka barîa bathengagîîra aka bangî

¹⁰kana aamba kana antû barî îtenûka kana arebi kana athûmbania kana atuunyani, bakoona rûgai rwa Ûnene bwa Mûrungu.

¹¹Bamwe beenu baakari ta antû bau bagweti au îgûrû. Îndî nandî nî bûthirîtie kûthambua na nî bûtheretue na bwagîrithua riîtweene rîa Mwathani Jesû Kristû na ndeene ya Roho wa Mûrungu weetû.

¹² Muntû oomba kuuga, “Nî mbîtîkîîrîtue kûthithia mantû jonthe.” Îndî ndiuga tî mantû jonthe jarî ja bata. No mbuge ndî na rûûtha rwa kûthithia mantû jonthe, îndî ntîkwenda kwaa nkombo ya ûntû kinya bûrîkû.

¹³Muntû oomba kuuga, “Biakûrîa birîo nîûntû bwa kîu na kîu kîrîo nîûntû bwa biakûrîa.” Îndî ndiuga Mûrungu akaathiria biakûrîa na kîu bio-biîrî. Mwîrî jwa muntû tî jwa gûtumîra mantûûne ja ûmaramari, îndî nî jwa gûtumîkagîra Mwathani, nawe Mwathani nîwe ûingagia moobatu jaaju.

¹⁴Mûrungu nî ariûkîrie Mwathani kuuma gîkuûne na kinya tuî agatûriûkia na inya yaawe.

¹⁵Ka bûtiijî atî mîîrî yeenu nî irûngo bia mwîrî jwa Kristû? Ka îndî mbwîrîte kûjûkia kîrûngo kîa mwîrî jwa Kristû nkîeethia kîmwe na mwîrî jwa maraya? Gûkarokarîka ûu!

¹⁶ Ka bûtiijî atî muntû ûrîa wigwatithanagia na maraya baejaga mwîrî jûmwe nawe? O ta ûrîa kwaandîki, “Bobaîrî bakaa mwîrî jûmwe.”

¹⁷Îndî muntû ûrîa wigwatithanîtie na Mwathani aejaga gîntû kîmwe nawe mantûûne ja Kîroho.

¹⁸Ciathûraneni na ûthûngîîri. Kîrî meeyia jangî jonthe jarîa muntû athithagia gûtî jo jathûkagia mwîrî jwaawe nkûrûki ya ûrîa ûthûngîîri bûjûthûkagia. Îndî muntû ûrîa ûthûngagîîra nî mwîrî jwaawe wengwa athûkagia.

¹⁹ Ka bûtiijî atî mîîrî yeenu nî kîûrû kîa Roho Ûmûtheru ûrîa ûkaraga ndeene yeenu na ûrîa bweei nî Mûrungu? Mîîrî tî yeenu bwingwa,

²⁰îndî bûgûri na ûgûri bûbûûmo. Tontû bûû, kumithagieni Mûrungu na mîîrî yeenu.