Read KIMERU BIBLE PROTESTANT EDITION 1Ako 7 Bible Online

1Ako 7 - KIMERU BIBLE PROTESTANT EDITION bible

1Ako 7

¹Rîu ka mbûcokerie mantû jarîa bwoorîtie barûgeene yeenu atî bweethîrwa bûrî bûbwega ntomûrûme kûrega kûthengeera mûka.

²Îndî nîkenda gûtîkeeje kûgîa na meeyia ja ûmaramari, nî bwega ntomûrûme ethîrwe arî na mwekûrû waawe na mûka ethîrwe arî na mûkûrû waawe.

³Ntomûrûme nî oojûragîrie mwekûrû waawe mantû jarîa agîrîte kûjûria arî mûkûrû na mwekûrû nî oojûragîrie mûkûrû waawe mantû jarîa agîrîte kûjûria arî mwekûrû.

⁴Mwekûrû atîagîrîte kwatha mwîrî jwaawe wengwa îndî nî mûkûrû waawe wagîrîte kûjwatha. Ningî o ûu tî mûkûrû wagîrîte kwatha mwîrî jwaawe îndî nî mwekûrû waawe wagîrîte kûjwatha.

⁵Mûkûrû na mwekûrû waawe batîagîrîte kûrega kûthenganagîîra, nonga beetîkanîîrîtie kagiita kana nîkenda boomba kûromba Mûrungu. Îndî bacokanîîre amwe kaîrî Nkoma atîkeeje kwona kaanya ga kûbageria nîûntû bwa kûremwa kwatha mwîrî.

⁶Nî nkuagaya nkûbwatha na tî waatho.

⁷Ndîngîenda antû bonthe bakare ta ûu nkari. Îndî Mûrungu nî aete o ûmwe weetû kîewa mwanya. Ûmwe kîewa kîa mûthemba jûmwe na ûngî kîa mûthemba jûngî.

⁸Ndîîra barîa batîgûreene kana bagûrwa na ntigwa atî kwethîrwa kûrî gûkwega bûgatûûra batîgûrî kana bûgûrana o ta ûrîa ûûni nkari.

⁹Îndî ûkëeja kwîthîrwa ûtîûmba kwatha mwîrî jwaaku, ûbuîri kûgûrana kana kûgûrwa. Tontû nî kaaba kûgûrana kana kûgûrwa nkûrûki ya gwakanîrwa nî mairîrîîria ja mwîrî.

¹⁰ Ndî na Waatho kîrî barîa bagûreene, îndî tî waatho bwaakwa nî bwa Mwathani. Mwekûrû atîbuîri gûtigana na mûkûrû waawe.

¹¹Îndî akëeja kûthithia ûu, nî akare atîgûri kana acokanîîre na mûkûrû waawe kaîrî. Nawe mûkûrû atîbuîri kwînga mwekûrû waawe.

¹²Kîrî bau bangî ndiuga ûjû: Nî ni nkuuga na tî Mwathani ûkuuga, mûkûrû mûkristû akëethîrwa arî na mwekûrû ûtîtîkîtie, na mwekûrû ûu nî eetîkîîrîtie gûtûûra nawe, atîbuîri kûmwînga.

¹³Nawe mwekûrû mûkristû akëeja kwîthîrwa arî na mûkûrû ûtîtîkîtie, na mûkûrû ûu nî eetîkîîrîtie gûtûûrania nawe, atîbuîri gûtigana nawe.

¹⁴Nîkwîthîrwa mûkûrû ûtî mwîtîkia ageetîkîrîka kîrî Mûrungu nîûntû bwa mwekûrû waawe. Nawe mwekûrû ûtîtîkîtie ageetîkîrîka kîrî Mûrungu nîûntû bwa mûkûrû waawe. Gûkëeja kwîthîrwa tî ûu gûkari, kinya aana baao barîngî kwîthîrwa batîtîkîrîkîte kîrî Mûrungu. Îndî nandî nî beetîkîrîkîte.

¹⁵Îndî ûrîa ûtîtîkîtie akenda batigana na ûrîa wîtîkîtie nî athithie ûu. Rîu mûkristû ûu eethîrwa nî ntomûrûme kana nî mûka, nî agîte ûciathi. Gîtûmi Mûrungu atwîtîte nîkenda tûgatûûra na thîîrî.

¹⁶Ûgwe mwekûrû mûkristû, wiijî atîa atî ûtîtûma mûkûrû waaku oonoka? A-gwe mûkûrû mûkristû, wiijî atîa atî ûtîtûma mwekûrû waaku oonoka?

¹⁷O muntû nî atûûrage mûtûûrîre jûrîa Mûrungu amweete. Ningî nî atûûrage akari o ûrîa Mûrungu aamwîtîre akari. Bûbû nîbu waatho bûrîa nkwîra kanisa cionthe ithingatage.

¹⁸Këethîra ntomûrûme eetîrwe ataani agácieethia muntû ûtîtaani. Këethîra atîtaani, nawe agátaanwa.

¹⁹Tontû gûtaanwa kana kûrega gûtaanwa bûtî na bata îndî ûntû bûrîa bûrî na gîtûmi nî muntû kûjûragia maathana ja Mûrungu.

²⁰Muntû nî akare o ta ûrîa aakari rîrîa Mûrungu aamwîtîre.

²¹Waarî nkombo rîrîa wetîrwe nî Mûrungu? Ûkooria, îndî weja kwona kaanya ga kûewa ûciathi, gatumîre.

²²Nîkwîthîrwa ûrîa Mûrungu eetîre arî nkombo ka aejaga muntû ûrî na ûciathi wa Mwathani. O ûu nou nawe muntû ûrîa Mûrungu eetîre arî na ûciathi, ka aejaga nkombo ya Kristû.

²³Buî nîka bwagûrîrwe na ûgûri bûbûûmo, tontû bûû, bûgacokeeni kwaa nkombo cia antû.

²⁴Tontû bûû ataana na aarî ba baaba, o ûmwe weenu nî atûûrage arî na ngwatanîro na Mûrungu akari o ta ûrîa Mûrungu aamwîtîre akari.

²⁵Nandî mantû jarîa bûrambûûrîtie jegiî barîa batîgûrî, gûtî Waatho ndî nabu buumîte kîrî Mwathani. Îndî ka mbwîre mathûgaanio jaakwa ndî muntû mwîtîkîkua nîûntû bwa kîaao kîa Mwathani.

²⁶Tontû bwa mîthangîko îrîa îrî ku îgiiteene rîrî, ndîthûgaania nî kaaba muntû gûkara akari o ûu arî.

²⁷Këethîra nî ûgûrene, ûgátigana na mwekûrû waaku. Këethîra ûtîgûrene, ûkágûrana.

²⁸Ningî ûkëeja kûgûrana, gûtî meeyia wîthîrwa ûthithîtie. Nawe mwarî akëeja kûgûrwa, atîîthîrwa akîîyagia. Îndî menyeni barîa bakagûrana, bakoonaga mîthangîko îmingî ya nthîgûrû îîjî na ndîngîenda kûbateethia batîkamîone.

²⁹Ataana na aarî ba baaba, ûrîa nkwenda kuuga nî atî, îgiita rîrîa rîtigeere nî rîrîkai. Tontû bûû, barîa bagûrene nî bakarage ta antû batîgûrene.

³⁰Ningî barîa bakûrîra bakare ta antû batîkûrîra na barîa bagwîrîtue bakare ta antû batî na kûgwîrua na barîa bakûgûra into bakare ta antû batî gantû.

³¹Nabo barîa baithangîkagia na mantû ja nthîgûrû îîjî bakare teeka batîkûthangîkua nîjo. Tontû nthîgûrû îîjî ûu ûkwona îkari, ka îkûthira.

³²Ndîngîenda bwîthîrwe bûtî na mîthangîko. Muntû ûrîa ûtîgûrene aithangîkagia na ngûgî cia Mwathani, agîcwaa ûrîa akagwîria Mwathani.

³³Îndî muntû ûrîa ûgûrene aithangîkagia na mantû ja nthîgûrû agîcwaa ûrîa akagwîria mwekûrû waawe.

³⁴Tontû bûû, akaraga akucanîrîtue nteere cio-ijîîrî. Mwarî ûtîgûri kana karaiti aithangîkagia na ngûgî cia Mwathani nîûntû we acieejanîte mwîrî na nkoro kîrî Mwathani. Îndî mûka ûrîa ûgûri aithangîkagia na mantû ja nthîgûrû agîcwaa kûgwîria mûkûrû waawe.

³⁵Ndiuga mantû jaja tontû bwa ûrîa nkwenda kûbûteethia. Teeka nkûbûrigîîria mantûûne kinya jarîkû îndî bûthithie ûrîa kwagîrîte na bûcieejanage ngûgîîne cia Mwathani bûrî na mworoto jûmwe.

³⁶Îndî ntomûrûme akëethîrwa arî na mwarî na nî beetîkanîrîtie kûgûrana na akoona atîkûmûthithîria ûrîa kwagîrîte na atîkûmba kwatha mwîrî jwaawe, nî bagûrane nîûntû tî meeyia.

³⁷Îndî ntomûrûme ûu akëeja kwîthîrwa nî akwenda gûkarakara atîragûrana na nî akûmba kwatha mwîrî jwaawe nî kwagîrîte akare atîmûgûrîte.

³⁸Tontû bûû, muntû ûrîa ûkagûrana nî athithagia bwega, îndî ûrîa ûtîgûrana nîwe ûthithagia bwega nkûrûki.

³⁹Mwekûrû ûrîa ûgûri eethagîrwa agwatitheenue na mûkûrû waawe mwanka rîrîa agakua. Mûkûrû waawe akëeja gûkua, mwekûrû ûu arî na rûûtha rwa kûgûrwa nî ntomûrûme ûrîa akeenda, îndî no mwanka ntomûrûme ûu eethîrwe arî mûkristû.

⁴⁰Îndî mwekûrû ûu bwagîra nkûrûki agatûûra atîgûri. Jau nî mathûgaanio jaakwa îndî nî nkûthûgaania ndî na Roho wa Mûrungu.