Read KIMERU BIBLE PROTESTANT EDITION 1Ako 9 Bible Online

1Ako 9 - KIMERU BIBLE PROTESTANT EDITION bible

1Ako 9

¹Ka ûûni ntî na ûciathi? Ka ni ntî mûtûmwa? A rî, ka ûûni ntoona Jesû Mwathani weetû? Anga baabuî bûtî maciara ja ngûgî yaakwa ndeene ya Mwathani?

²Kinya këethîra antû bangî batîmbonaga ta ndî mûtûmwa, ndî na mma kîrî buî ndî mûtûmwa. Gîtûmi buî nî buî ba kwonania atî ndî mûtûmwa wa Mwathani tontû bwa ûrîa bwigwatithanîtie nawe.

³Kîrî barîa bakûnthûmbia ndiitetera nkiugaga ûjû:

⁴Ka baatuî tûtîbuîrîte kwîthîrwa tûkîonaga biakûrîa na bia kûnyua?

⁵Ka baatuî tûtîagîrîte gwîtania na eekûrû beetû ndiûngeene cieetû ta ûrîa atûmwa bangî bathithagia na ataana ba ng'ina ba Mwathani na kinya Peterû?

⁶Kana no ûûni na Baranaba akî tûbuîri kûritaga ngûgî nîkenda tûcionagîra gîa kûthiragia moobatu jeetû?

⁷A rî, nî asikarî ûrîkû wiireaga na mbeecha ciaawe ngûgî îrîa aritagîra thirikarî? Nî mûrîmi ûrîkû wa mîzabibû ûtîrîjaga maciara ja muunda jûrîa arîmîte? Nî mûrîîthi ûrîkû ûtînyunyaga îria rîa ndîîthia ciaawe?

⁸Mantû jaja tî ni nkuuga na bwaakwa ta muntû. Ga kinya Waatho bwa Mûrungu bûtîkuuga oo ûu?

⁹ Nîkwîthîrwa Waatho bwa Musa bûriuga ûjû, “Ûgákunîka ndeegwa mûromo rîrîa ûkûmîtumîra kûûra nkano.” Ka bûkûthûgaania nî ndeegwa Mûrungu akwaria bwaacio?

¹⁰Anga tîtuî augaga ûrîa tûbuîri kûthithagîrua rîrîa augaga ûû? Nî mma mantû jaja jaandîki nîûntû bweetû. Tontû muntû ûrîa ûrîmaga na ûrîa ûkethaga bonthe beerîgagîîra kwona bimwe bia maketha.

¹¹ Këethîra nî twaandîre mbeeû ya kîroho kîrî buî, ka bwîthîrwa bûthûûki tûkîewa into nî buî?

¹²Gûkëeja kwîthîrwa antû bangî nî bakwona ûtethio kuumania naabuî, anga tuî tûtîagîrîte kûgunîka nkûrûki kuumania na into bieenu? Îndî nî twaregere gwîtia mma yeetû. Antû a tûthithia ûu, twakamatîre mûrigo junthe nîkenda tûtîgeekîre kîgitario mantûûne ja Nteto Injega cia Kristû.

¹³ Ka buî bûtiijî atî barîa baritaga ngûgî kîûrûûne, boonaga biakûrîa biaao kuuma o kîûrûûne kîu? Kana bûmenya atî barîa baritaga ngûgî kîritîroone kîa igongwana barîjaga bimwe bia birîa biritagîrwa Mûrungu.

¹⁴ Ûû nou Mwathani aathanîre atî atûmîîria ba Nteto Injega baejagwe mûchaara kuumania na ngûgî îîu.

¹⁵Îndî gûtî rîo ni ndeetia mma yaakwa na kinya nandî teeka nkûbûandîkîra nîkenda mpeewa mma îîu. Nî kaaba nkuîte antû a muntû no ûrîkû antuunya kîrîa ngwikûmîria.

¹⁶Këethîra ntûmagîîria Nteto Injega, ntîbuîri gwikumia. Nîkwîthîrwa îîjî nîyo ngûgî îrîa mpeei. Wûi kîrî ni këethîra ntîtûmîîria Nteto Injega!

¹⁷Këethîra nî ni ningwa nthuurîte kûrita ngûgî îîjî na bwaakwa, ndîngî kwîrîgîîra kûewa mûchaara. Îndî mîritaga nîûntû Mûrungu nî ambathîte mîritage.

¹⁸Muchaara jûrîa nkaeewa nî jûrîkû? Mûcaara jûu nî gûtûmîîria Nteto Înjega gûtîkîo nkûrîyia na ntîgwîtia mma yaakwa nîûntû bwa gûtûmîîria Nteto îîu.

¹⁹Tontû bûû, kinya këethîra ntî nkombo ya muntû kinya ûrîkû nî ncieethetie nkombo ya antû bonthe nîkenda nkoomba kûreeta antû babaingî kîrî Kristû ûrîa kûûmbîka.

²⁰Ndî kîrî Ayahudi, ntûûraga ta Mûyahudi nîkenda nkabareeta kîrî Kristû. Kinya këethîra ntî nkombo ya Waatho bwa Musa, ntûûraga teeka mbathagwa nî Waatho bûu nîkenda ndeeta barîa baathagwa nîbu kîrî Kristû.

²¹Kîrî antû ba mîgongo îngî, ntûûraga tabo nîkenda mbareeta kîrî Krîstû. Gûtûûra ûû tî kuuga ntîathîkagîra Waatho bwa Mûrungu îndî mbîthagîrwa magiita jonthe nkîathîkîra waatho bwa Kristû.

²²Ndî kîrî barîa batî inya mantûûne ja wîtîkio, nkari ta ûmwe waao mantûûne ja kwaga inya, nîkenda mbareeta kîrî Kristû. Tontû bûû, ncieethetie muntû wa mîthemba ya antû bonthe nîkenda ndeeta babaingî kîrî Kristû na njîra cionthe irîa ciûmbîkîka.

²³Nthithagia mantû jaja jonthe nîûntû bwa Nteto Injega, nîkenda ngaîrwa kîtharimo kîrîa kiumanagia nacio.

²⁴Ka bûtiijî atî nî antû babaingî bogîaga mîceethoone ya rwîro îndî nî muntû ûmwe akî ûeejagwa kîewa? Tontû bûû, gwe ûgîaa nîkenda ûgacinda ûeewe kîewa.

²⁵Muntû wonthe ûrîa ûkwithuranîra nîûntû bwa macindano nî aikanagia mantû jamaingî. Athithagia ûu nîkenda akoona thirû îrîa îthiraga. Îndî tuî tûkaeewa thirû ya gûtûûra kenya na kenya.

²⁶Kîu nîkîo gîtûmaga mbûgîa mbîrîgîîrîte gûcindana na nîkîo gîtûmaga ndwaa nkari ta mûcindani wa kûringana nkuundi ûrîa ûtîgeraga nkuundi ciaawe ruuoone.

²⁷Nditanaga mwîrî jwaakwa na kûjwata mantû jamaingî nîkenda ni ntîkeeje kûregwa nyuma ya gûtûmîîria bangî.