Read KIMERU BIBLE PROTESTANT EDITION 2Ako 1 Bible Online

2Ako 1 - KIMERU BIBLE PROTESTANT EDITION bible

2Ako 1

¹ Nî ni Paûlû mûtûmwa wa Kristû Jesû nîûntû bwa kwenda kwa Mûrungu, tûrî na Timotheo mûtaana wa baaba, tûkûbwaandîkîra buî antû ba kanisa ya Mûrungu îrîa îrî Korintho, amwe na atheru barîa bonthe barî nthîgûrû yonthe ya Akaia.

²Mûrungu Baaba weetû na Mwathani weetû Jesû Kristû barobwaa ûtugi na thîîrî.

³Tûkumieni Mûrungu, Îthe wa Mwathani weetû Jesû Kristû we ûrîa ûrî Mûrungu wa kîaao kîonthe na kûborerua kunthe.

⁴We atûboragîria mathîînene jeetû jonthe nîkenda naatuî tûkoomba kûboreria antû bangî mathîînene ja mûthemba o jûrîkû jarîa beethagîrwa barî najo. Tûbaboragîria tûgîtumagîra ûboreru bûrîa tuî twingwa tweei nî Mûrungu.

⁵Tontû o ta ûrîa twîtaga na mbere kwona mîthangîko îmingî ta îrîa Jesû oonere, nou nawe Mûrungu atûboragîria mono ndeene ya Kristû.

⁶Tûkëethîrwa nî tûkûthangîka, tûrîthangîka nîkenda buî bûkoona wega na wonokio. Tweethîrwa nî twonete ûtethio, nou kinya buî bûgateethua tontû bwa ûrîa buî bûmagîîria na kûrîa thîîna ta îrîa kinya tuî tûrîjaga.

⁷Wîrîgîîro bweetû kîrî baabuî nî bûûriki, nîûntû nî tûîjî atî o ûrîa bûmagîîria mîthangîko ta îrîa tuî twonaga nou bûkaborerua o ta ûrîa tûboragîrua mathîînene jeetû.

⁸ Ataana na aarî ba baaba nî tûkwenda bûmenya mathîîna jarîa twaarî najo nthîgûrû ya Asia. Twoonere mathîîna tûtîngîûmba kûmîîria mwanka tûraitîjîra buru na tûraaga wîrîgîîro bwa gwîta na mbere gûtûûra mwoyo.

⁹Nîkwîthîrwa twaigagua teeka tûgitîri îgamba rîa gûkua. Îndî gwakarîkîre ûu nîkenda tuî tûtîkeeje kwîîrîgîîra inya yeetû twingwa îndî nkûrûki twîrîgîîre Mûrungu ûrîa ûriûkagia akuû.

¹⁰Mûrungu ûrîa watûtunyûkîrie ûgwatiine bûbûnene ûu nî eetîte na mbere gûtûtunyûkia na nî twîrîgîrîte atî agatûtunyûkia kaîrî na kaîrî.

¹¹Buî bûtûteethie na maromba nîkenda antû babaingî bagacokeria Mûrungu nkaatho nîûntû bweetû tontû bwa kîtharimo kîrîa Mûrungu akeethîrwa atûtharimîte nakîo agîcokia maromba jarîa tûkaromberwa nî antû babaingî.

¹²Tuî nî tûgwikumîria ûntû bûbû: mathûgaanio jeetû nî jagûtûrikithîria atî mîîtîre yeetû kîrî antû ba nthîgûrû na mono kîrî bûî nî ya ûtheru na mma na tûtîkarîte na ûûme bwa antû ba nthîgûrû îîjî îndî tûtwîre tûtongeretue nî ûtugi bwa Mûrungu.

¹³Tuî tûrîbwaandîkîra mantû jarîa bûkoomba kwithomera na gûciûra gîtûmi kîaajo. Ndîrîgîîra atî bûkamenya bwega ûrîa nkuuga.

¹⁴Mwanka nandî nî bûûmbîte gûciûra bûkai bwa ûrîa mbugîîte. Ndîrîgîîra bûgaikumia nîûntû bweetû o ta ûrîa naatuî tûgaikumia nîûntû bweenu rîrîa ntukû ya Mwathani Jesû îgakinya.

¹⁵Tontû bwa wîrîgîîro bûu, nîkîo gîatûmîre mbanga kwîîja kweenu mbere nîkenda buî bûkatharimwa mainda jaîrî.

¹⁶ Ndaabangîte mpambe mbûriûngîre nkûrûkîte mbîtîte Makedonia na ncokeere kweenu nkiuma nao nîkenda buî bûganteethia rûgendoone rwaakwa rwa gwîta Judea.

¹⁷Bwoomba kwîthîrwa bûkîûragia nkîbanga mantû jau ga ntathûgaanîtie bwega? Ka mbangaga mîbango yaakwa ja antû ba nthîgûrû barîa baugaga “îî” na “arî” o rîmwe?

¹⁸O ta ûrîa Mûrungu arî mwîtîkua nteto cieetû irîa twabwîrîre itaarî “Îî” na “arî.”

¹⁹ Tontû Jesû Kristû Mûtaana wa Mûrungu, ûrîa ni na Silivano na Timotheo twabûtûmîîrîrie mantû jaawe ataarî “Îî” na “arî” îndî kîrî we magiita jonthe kwaarî “Îî.”

²⁰Tontû wîrane bwa Mûrungu, bûrîa eekîre nî “Îî” nîûntû bwaawe. Kîu nîkîo gîtûmaga tuuga “Amen” ndeene ya Kristû nîkenda tûkumia Mûrungu.

²¹Mûrungu nîwe ûtûmaga buî amwe naatuî tûkara tûriki ndeene ya Jesû, na nîwe ûtûthuurîte na atûtûma.

²²Mûrungu nî atwîkîrîte rwano rwa kwonania atî tûrî gîntû kîaawe na atwaa Roho waawe nîkenda arikithia mma ya mantû jonthe jarîa atwîre eekîte eeja gûtûnenkera.

²³Mûrungu nîwe mûkûûjî waakwa na nî aijî nkoro yaakwa bwega. Ndaaregere kwîja Korintho nîkenda mbûcaîîra.

²⁴Tûtîkûbûkinyîîria bwîtîkia mantû jarîa tuî tûkwenda tontû nî twijî atî wîtîkio bweenu nî bûriku. Îndî ûrîa tûkwenda nî tûteethanie naabuî ngûgîîne nîkenda bûkagwîrua.