Read KIMERU BIBLE PROTESTANT EDITION 2Ako 10 Bible Online

2Ako 10 - KIMERU BIBLE PROTESTANT EDITION bible

2Ako 10

¹Ûûni Paûlû, nî ni ningwa nkûbwerenca, tontû bwa ûrîa Kristû arî ûmûkiri na mwinyiiyia. Buî buugaga atî ûûni ndî ûmworo rîrîa ndî amwe naabuî îndî mbûng'entagîîra rîrîa ntî amwe naabuî.

²Ndîbwerenca bûtîkareke mbîja kwîja ng'enti ta ûrîa nkûmenya ndomba gûkara kîrî barîa bakuuga atî mîîtîre yeetû nî ta ya antû ba nthîgûrû.

³Tontû kinya këethîra tûtûûraga nthîgûrûûne, ndwaa îrîa tûrûjaga tî ya nthîgûrû.

⁴Mathaga ja ndwaa jarîa tûtumagîra tî ja nthîgûrû îîjî îndî nî mathaga ja inya ja Mûrungu jarîa tûtumagîra kwînyangia biitiiro bia inya. Twînyangagia nkarari cionthe cia ûrongo na

⁵tûkathiria nkaanja inthûûku na tûkeenyangia igitaria birîa birûjaga na ûmenyo bwa Mûrungu na tûgataa mathûgaanio ja mîthemba yonthe ja antû tûgatûma baathîkîra Kristû.

⁶Naatuî nî twithuranîrîte gûkanûkia barîa baregeete kwaathîka rîrîa buî bûgacionania atî bûrî aathîki.

⁷Buî bwoonaga mantû ûrîa jakwoneka bwa oome. Akëethîrwa kûrî we kîrî buî ûciîtîkagia nî wa Kristû, nî ameenye atî kinya tuî tûrî ba Kristû o ûu arî wa Kristû.

⁸O na nkeethîrwa ka ndakûrûkithia ngiikumia ûntûûne bwa inya îrîa mpeei, ntiigua nthao nî ûu nthithîtie tontû inya iu nî ya kûbwaka tî ya kûbûtharia.

⁹Bûkooneni teeka nkwenda kûbûmakia na barûga îîjî nkûbwandîkîra.

¹⁰Kûrî bo baugaga, “Paûlû aaragia ang'enti mono barûgeene ciaawe, na akauga nteto cia inya îndî eeja wengwa kîrî tuî atîonanagia arî na inya na kinya nteto ciaawe gûtîo ikinyaga.”

¹¹Antû barîa baugaga nteto ta iu nî bameenye atî nteto irîa tûkuuga barûgeene tûrî kûraaja nocio tûkathithia tûrî kîrî bo.

¹²Teeka tûkwenda gwitara tûrî ûmwe kana twing'anania na antû bau baciimbaimbagia. Antû barîa baithimaga na bangî na bakaing'anania na bangî batîthagîrwa barî na ûmenyo.

¹³Tuî tûtiikumagia nkûrûki ya kîthimi îndî twikumagia kûringana na mûng'ana jûrîa Mûrungu atwîtîkîîrîtie, taju ngûgî yeetû kîrî buî.

¹⁴Tontû bûû teeka tûgûkûrûka mîanka îrîa twîkîri, ndîrîa twejîre kîrî buî. Nî tuî twaarî ba mbere kwîja tuumîte kûraaja tûbûreterete Nteto Injega cia Kristû.

¹⁵Tuî tûtîgwikumîria ngûgî irîa bangî baritîte nkûrûki ya ûrîa Mûrungu atwîtîkîîrîtie. Wîrîgîîro bweetû nî atî wîtîkio bweenu bûkongeereka na atî tûkoomba kûrita ngûgî inyingî nkûrûki kûu kweenu, kûringana na mîanka îrîa Mûrungu atwîkîrîte.

¹⁶Rîu nîrîo tûgatûmîîria Nteto Injega nthîgûrû ingî irîa irî mbere ya kweenu nîkenda tûtîkeeje gwikumîria ngûgî îriti muundeene jûrîa muntû ûngî arîmîte.

¹⁷ Maandîko jariuga, “Muntû kinya ûrîkû akenda gwikumia, nî aikumîrie ûrîa Mwathani athithîtie.”

¹⁸Tontû muntû ûrîa wîtîkagîrwa tî muntû ûrîa witaraga wengwa arî ûmwega îndî nî muntû ûrîa Mwathani eekagîîra.