Read KIMERU BIBLE PROTESTANT EDITION 2Ako 11 Bible Online

2Ako 11 - KIMERU BIBLE PROTESTANT EDITION bible

2Ako 11

¹Ndenda bûûmîîria aniini mantûûne jaakwa o na këethîra nî nkwaa kîaa aniini. Itû ûmîîrieni waa bwaakwa aniini!

²Nî nkwigua ndî na rûriitho nîûntû bweenu, îndî nî rûriitho rumîte kîrî Mûrungu. Tontû nî ni ndabûmenyithanîrie na Kristû bûrî ta aarî karaiti babatheru nîkenda bûkagûrwa nî ntomûrûme ûmwe wenka tawe Kristû.

³ Ûûni ndî na kîmako atî o ta ûrîa Hawa aaîrîrue nî njoka na waayia bwaayo bwa ûûme, mathûgaanio jeenu joomba kwangaratanua bûkaremwa nî gûcieejana kîrî Kristû na njîra îmbûjûru na întheru.

⁴Tontû muntû ûngî akëeja agîtûmagîîria Jesû ûngî ûtî ûrîa twabûtûmîîrîrie buî nî bwîtîkagia nteto ciaawe; kana bûgeetîkîra Roho ûngî kana Nteto ingî mwanya na irîa bwaigîrue rîrîa twabûtûmîîrîrie bûreetîkia.

⁵Ntîkûthûgaania ûûni ndî ûmûnini nkîng'uanithanua na atûmwa barîa bataragwa nî baanene.

⁶Kinya nkëethîra ntiijî kwaria bwega ndî na ûmenyo. Tuî nî tûthirîtie kûbwonia ûntû bûu nî bwa mma mantûûne jonthe.

⁷Gûtî gîntû kinya kîmwe ndabwîtîrie rîrîa ndabûtûmîîrîrie Nteto Injega cia Mûrungu. Ndainyiîrie nîkenda buî bûkagîta îgweta. Ka ndathûûkîrie rîrîa ndathithîrie ûu?

⁸Rîrîa ndaritaga ngûgî gatîgatîîne keenu, nî kanisa ingî ciandîaga mûchaara. Nî ta kûbatuunya ndabatuunyaga into biaao nîkenda nkoomba kûbûtumîkîra.

⁹ Ningî îgiita rîonthe rîrîa ndaarî kweenu, ntabûthangîkia nkîenda bûnteethia rîrîa ndethagîrwa nkîendaga ûteethio. Ataana na aarî ba baaba barîa beejaga baumîte Makedonia nîbo baandetagîra o gîntû kîonthe kîrîa ndeethagîrwa ndî na ûbatu bwaakio. Tontû bûu ntaa mûrigo kîrî buî îgiiteene rîrîa rîkûrûkîte na kinya nyumeene gûtî rîo nkaa mûrigo kîrî buî.

¹⁰Nî nkuuga na mma îrîa yuumîte kîrî Kristû Jesû atî gûtîkîo gîkarigîîria mbîta na mbere gwikumîria ûntû bûu kûu Akaia yonthe.

¹¹Ga nkuuga ûu tontû ûûni ntîbwendeete? Mûrungu nîwe ûkûmenya atî nî mbwendeete.

¹²Ngeeta na mbere kûthithia ûrîa nthithagia nîkenda ntîkae kaanya barîa bendaga gwikumia bakiugaga atî kinya bo baritaga ngûgî o ta îrîa tûritaga.

¹³Tontû bau bongwa nîbo atûmwa ba ûrongo na ariti ngûgî aayia barîa bacieethagia atûmwa ba Kristû na tîu kûrî.

¹⁴Îndî bûu teeka bûrî ûgeni nîûntû kinya Nkoma wengwa nî aigarûraga agacieethia mûraîka wa weerû.

¹⁵Ûntû bûu teeka bûrî bwa kûrigaria këethîra athingati bau ba Nkoma bagacieethia ariti ngûgî ba gûtambia mantû ja waagîru. Mûthieene nîrîo bagakanûkua kûringana na mathithio jaao.

¹⁶Ndîcokeeria kaîrî atî gûkágîta muntû ûnjûkia teeka ndî kîaa. Îndî bûkëeja kûnjûkia ndî kîaa njûkieni ndîkîo nîkenda kinya ni ngaikumia aniini.

¹⁷Ûrîa nkwaria nandî tî Mwathani ûmbîrîte mbarie. Ndîaria ta kîaa ûntûûne bûu bwa gwikumia.

¹⁸Nîkwîthîrwa antû babaingî baikumagia nîûntû bwa mantû ja nthîgûrû, kinya ni nou nkûgîta.

¹⁹Babuî bûtînogagua nî biaa tontû bûrî antû baboome!

²⁰Tontû nî bûmagîîria muntû ûrîa ûbweethagia nkombo kana ûrîa ûrîjaga into bieenu na njîra cia waayia na ningî akabûinyîîria na akabwikumîria na akîbûûringaga mpîî.

²¹Nî nkwigua nthao nkiuga atî tûtombîre kûthithia mantû ta jau kîrî buî. Amwe na jau këethîra kûrî muntû ûûmîîrîkia gwikumia ûntûûne bûna, nkîaragia ja kîaa, kinya ni nkomîîria gwikumia o ûu.

²²Ka bo barî Ayahudi? Kinya ni ndî we. Nî Aisraeli? Kinya ni ndî Mûisraeli. Bo nî ba nchiarwa cia Abrahamu? Kinya ni ndî ûmwe waacio.

²³ Bo nî nthûûmba cia Kristû? Ndîaria teeka ndî na nthû ûûni ndî nthûûmba înjega nkûrûki yabo. Nî nditîte ngûgî na inya nkûrûki yabo, na nî mpiingîri ncheera jamaingî nkûrûki yabo, na nî mpûûri maita jatîgûtarîka na magiita ja maingî nkeethîrwa ndî akuî gûkua.

²⁴ Nî ndaûrîrwe maita jataano ibooko mîrongo îthatû na kenda nî Ayahudi.

²⁵ Nî ndaûrîrwe ibooko maita jathatû nî Aroma, na ndîraringwa na maiga rîmwe. Meri nî ithûûkangîte maita jathatû ndî ku na kûrî rîmwe ndakarîre rûûjîîne kûu îrieene ûtukû na mûthenya.

²⁶ Ndiûngeene ciaakwa inyingî nî mbîthîrîtwe ndî ûgwatiine bwa gûkondorua nî mîuro na bwa atuunyani. Ningî nî ndaarî ûgwatiine bwa kûûragwa nî Ayahudi na antû barîa batî Ayahudi. Nî ndaarî ûgwatiine ntûûreene inene na ndî rwanda na ûgwatiine bwa mîgombe ya îria na bwa akristû ba ûrongo.

²⁷Nî nditîte ngûgî ya mînoga na mîthangîko. Jamaingî nî ndaarîte ntî toro na ndaakara na mpara na nyoonta. Ningî nî nkarîte ntî na biakûrîa na ndî mpioone na mbagîte nguû.

²⁸Amwe na jangî jamaingî jaarîa ntîragweta, nî mbîthagîrwa ndî na mûrigo jwa kûmenyeera kanisa cionthe.

²⁹Rîrîa muntû mûna agaga inya, kinya ni nkaraga ntî na inya; rîrîa muntû mûna aratonya meeyiene kinya ni nî mbigagua ûthûûku mono.

³⁰Këethîrwa noo mwanka nciikumie, ngaikumîria mantû jarîa joonanagia ûrîa ntî na inya.

³¹Mûrungu, Îthe wa Mwathani Jesû, we ûrîa ûkumagua kenya na kenya nî akûmenya atî ntîkwaria ûrongo.

³² Rîrîa ndaarî Damaski, mûrûngamîîri ûrîa waathanaga îgiita rîa mûnene Areta, nî eekîre akaria mwîrîga jwa ntûûra nîkenda bangwata,

³³îndî nî ndeenîkîîrwe ndiriceene ya rûthingo rwa ntûûra mbîkîri gîkabûûne na ndîraûra.