Read KIMERU BIBLE PROTESTANT EDITION 2Ako 12 Bible Online

2Ako 12 - KIMERU BIBLE PROTESTANT EDITION bible

2Ako 12

¹Rîu reka ndiikumie, kinya këethîra kûthithia ûu gûtî u gûkûnguna. Îndî reka nandî mbarie mantû jegiî bioneki na jarîa nguûrîri nî Mwathani.

²Kûrî muntû mbijî mûkristû ûrîa mîaka îkûmi na îna îrîa îkûrûkîte waajûkîrue araitithua mwanka îgûrû buru. Ntîkûmenya këethîra aajûkîrue arî o na mwîrî kana atî na mwîrî, bûu nî Mûrungu wenka ûkûmenya.

³Nî nkûmenya muntû ûu nî aaburîrue araitithua mwanka narîa antû bakuû beetaga. Îndî ntîkûmenya këethîra eetîre gûntû kûu arî na mwîrî kana atî na mwîrî, nî Mûrungu wiijî.

⁴Arî kûu nî aaigîrue mantû jatîmenyeka kwîranwa ûrîa jakari na jarîa muntû atîbuîri kûgweta.

⁵Ngaikumia mantûûne ja muntû ûu îndî ntiikumia nîûntû bwaakwa nonga ngaikumia nîûntû bwa kwaga inya gwaakwa.

⁶Îndî kinya nkenda gwikumia ntîoneka ndî kîaa tontû mbîthîrwa nkîaragia ûûma. Îndî ntîkwenda kûthithia ûu nîkenda gûtîkeeje kwonora muntû wa kûnjûkia teeka kûrî ûntû bûngî nkûrûki ndî nabu mwanya na ûrîa we wengwa oonaga kana akaigua kuumania naani.

⁷Nî ndaeerwe ûrûrû bûkari ta mwigua mwîrîîne jwaakwa bûrî mûtûmwa wa Nkoma jwa kûnthangîkagia, nîkenda ntîkeeje kûûjûrwa nî gwikumia gûkwingî nîûntû bwa mantû jamanene na jamaingî jaarîa ndaguûrîri.

⁸Nî ndeerencere Mwathani maita jathatû nîkenda ûntû bûu bûntiga,

⁹îndî arambîîra, “Ûtugi bwaakwa nî bûkûng'anîte nîûntû inya yaakwa îritaga ngûgî bwega arîa gûtî na inya.” Tontû bûû nî kaaba nciikumîrie kwaga inya gwaakwa nîkenda inya ya Kristû îgakara ndeene yaakwa.

¹⁰Tontû bwa Kristû, nî ng'anîri nî kwaga inya na kûrumwa na mathîîna na mîthangîko na kûnyamaara gûkwingî. Tontû rîrîa mbagîte inya nîrîo mbîthagîrwa ndî na inya.

¹¹Nî mpeete kîaa! Nî buî bûtûmîte nkara ta kîaa. Buî nî buî bwaabuîrîte gûnkaathîrîria. Tontû kinya nkëeja kwîthîrwa ka ndî muntû gûtî kîo, teeka ndî ûmûkai kîrî atûmwa bau bangî.

¹²Biama na mantû ja kûrigarania jarîa jonanagia atî ndî mûtûmwa nî biathithîkîre gatîgatîîne keenu kûrî na kûûmîîria kunthe.

¹³A nî ûntû bûrîku bwaathithua kaniseene ingî bûtathithîrua? Ûntû bûrîa akî ntaabûthithîria nî kûrega kûbûkamatithia mûrigo jwa gûnteethia na tontû bûû ndekereeni!

¹⁴Nandî nî nkwithuranîra kwîja kweenu rîa jathatû na ntîbûthangîkia. Tontû kîrîa ûûni ncwaga nî buî na tî into bieenu. Wîthîre bûrîa bûtwîre nî atî aciari beekaga into nîûntû bwa aana na tî aana beekaga into nîûntû bwa aciari.

¹⁵Ûûni ndagwîrua nî gûtumîra bionthe birîa ndî nabio na kinya ni ningwa ncieejane buru nîkenda buî bûgunîka. Ka buî bûgampenda bûbûkai nîûntû nî mbwendeete mono?

¹⁶Buî bûgeetîkania naani atî ntaeere mûrigo kîrî buî. Îndî kûrî bo boomba kuuga atî nî ûûme ndaatumîîre ndîrabwayia.

¹⁷Ndîrabwaayia ngîtumagîra antû barîa ndatûmîre kîrî buî?

¹⁸Nî ni ndaatûmîre Tito na mûtaana wa baaba ûu ûngî beejanîrie nawe kîrî buî. Ka Tito aacwîre kwiguna kuumania naabuî? Uga kinya tuî tou twathithîrie o tawe? Ka merekeeria jeetû jataang'uanene na jaawe?

¹⁹Mbuga bûthûgaanagia atî tuî nî gwiteteera twîthagîrwa tûgiitetagîîra kîrî buî îgiita rîonthe. Îndî tuî tûrîaria o ta ûrîa Kristû eendekia twaria tûrî mbere ya Mûrungu. Ningî ûntû bunthe bûrîa tûthithagia, acoore beetû, tûthithagia nîkenda tûbûteethia.

²⁰Tontû nî ngûkîra rîrîa nkeeja mbîthîra bûtîkari ûrîa mpendekia bwîthîrwa bûkari, kana buî bwîja kwona ûûni ntîkari ûrîa bwendekia mbîthîrwa nkari. Nî ngûkîra mbîja kwîthîra kûrî na mateta na rûriitho na mîthûûro na gûcienda na kûthûmbania na nguutû na gwikumia na kwangaratana gatîgatîîne keenu.

²¹Nî ngûkîra Mûrungu eeja kûnthaithia kîrî buî ndeeja kaîrî na mbigua bûbûûî ndîra nîûntû bwa babaingî beenu barîa beeîrie na batairira meeyia jaao ja ûmaramari na ûthûngîîri na mairîrîîria ja ûthûngîîri jarîa bathithîtie.