Read KIMERU BIBLE PROTESTANT EDITION 2Ako 13 Bible Online

2Ako 13 - KIMERU BIBLE PROTESTANT EDITION bible

2Ako 13

¹ Rîrî nîrîo rîkeethîrwa rîrî îîja rîaakwa rîa jathatû kîrî buî. Ûntû bûrîa muntû athitangîri bûbuîri kûrikithua nî ûkûûjî bwa antû baîrî kana bathatû.

²Ndîenda kûmenyithia antû barîa beeîrie mbereene, na kinya bangî bonthe, o ta ûrîa ndaugîre îîja rîaakwa rîa jaîrî nou nkûbeera nandî ndî kûraaja, atî rîrîa nkeeja gûtî we ngacaîîra.

³Rîu bûkamenya gûtî na nkaanja atî nî Kristû waragia arî ndeene yaakwa. Rîrîa Kristû akûbûkanûkia, atîonekaga aagîte inya îndî ka onanagia ûrîa arî na inya kîrî buî.

⁴Tontû aambîrwe mûtharabeene nîûntû bwa kwaga inya na nandî atûûraga mwoyo nîûntû bwa inya ya Mûrungu. Kinya baatuî nou twagîte inya nîûntû bwa kûgwatanîra nawe, îndî tûgatûûrania naabuî tûrî ndeene yaawe nîûntû bwa inya ya Mûrungu.

⁵Icûnkûûneni na bwiraiithîrie bwoone këethîra nî bûriki wîtîkione bweenu. Ka bûtiijî atî Jesû Kristû arî ndeene yeenu? Bûkëethîrwa bûtiijî ûu, nî bûciindi buru.

⁶Nî ngwîtîkia buî bûkamenya atî tuî tûtîciindi.

⁷Tûrîromba Mûrungu buî bûtîkeeje kûthithia ûthûûku; tî kenda tuî twoneka nî tûûmbanîte, îndî nîkenda buî bûkathithia ûntû bûrîa bwagîrîte, kinya gûkëethîrwa tuî tûrîonwa teeka tûciindi.

⁸Tontû gûtî ûntû kinya bûmwe tuî tûûmbîkia kûthithia tûkîrûjaga na ûûma, îndî tûthithagia mantû jonthe nîûntû bwa gûtûûria ûûma.

⁹Tûgwîragua rîrîa tuî tûtî na inya îndî buî bûkeethîrwa bûrî na inya. Tontû bûû, tûrîbûrombera bwîte na mbere kûgîa inya.

¹⁰Kîu nîkîo gîgûtûma mpaandîka mantû jaja ndî kûraaja. Ndîthithia ûu nîkenda rîrîa nkeeja kûu ntîkeeje kûbûthûkîîra ngîtumagîra Waatho bûrîa Mwathani anenkerete tabu waatho bwa kûbwaka na tî bwa kûbûtharia.

¹¹Ataana na aarî ba baaba, tigweni bwega. Thongomieni mîîtîre yeenu na bûmenyeere mooritani jaakwa na bwiganague. Ningî tûûrageni bûrî na thîîrî, na Mûrungu wa wendo na wa thîîrî agakaraga amwe naabuî.

¹²Kethanieni o muntû na ûngî na gûcûncana gûkûtheru. Atheru bonthe bakûbûkeethia.

¹³Ûtugi bwa Mwathani Jesû Kristû na wendo bwa Mûrungu na ngwatanîro ya Roho Ûmûtheru birokaraga amwe naabuî bwinthe.