Read KIMERU BIBLE PROTESTANT EDITION 2Ako 2 Bible Online

2Ako 2 - KIMERU BIBLE PROTESTANT EDITION bible

2Ako 2

¹Tontû bûû, nî ndîroonere tî bwega kûbûriûngîra kaîrî mbîja kûbwigithia bûbûûî.

²Gîtûmi nî atî ndabwigithia bûbûûî rî, nûû ûngî nkoona wa kûngwîria? Gûtî ûngî tiga no baabuî barîa ndaigithîrie bûbûûî.

³Kîu nîkîo gîatûmîre mbwaandîkîra barûga îîu. Nteendaga kwîja kîrî buî mbîja kwigua bûbûûî nî buî o antû barîa bûbuîrîte gûtûma ngwîrua. Tontû ndî na mma rîrîa ngwîrîtue kinya baabuî bwinthe nî bwîthagîrwa bûgwîrîtue.

⁴Ndabwaandîkîîre barûga îîu ndî na nkoro îrî na rwaakaî na ûrûrû na nkîrîraga mono. Narîo yerekeeria rîaakwa rîtaarî rîa gûtûma bwigua bûbûûî îndî nî bûmenya wendo bûrîa mbwendeete nabu ûrîa bwingîîte.

⁵Kwethîrwa kûrî muntû ûtûmîte ûngî aigua arî na kwithikîîra, tî ni ninka aigithîtie bûbûûî îndî nî bwinthe aigithîtie bûbûûî. Ndiuga ûu nîûntû ntîkwenda kûmwinyîîria mono.

⁶Muntû ûrîa bûkanûkîtie bûrî babaingî, ûu bûgitîte îgamba rîaawe nî bûng'ani.

⁷Tontû bûû, nandî bûbuîri kûmûrekera na kûmûboreria atîkëeje kwigua bûbûûî na aaga wîrîgîîro buru.

⁸Tontû bûû, nî nkûbwerenca bûmwonie atî nî bûmwendeete mma.

⁹Kîu nîkîo gîatûmîre mpaandîka nîkenda mbûthima mbona këethîra bûrî aathîki mantûûne jonthe.

¹⁰Bûkëeja kûrekera muntû nîûntû bwa ûntû bûrîa athithîtie, kinya ni nkûmûrekera. Nkëeja kûrekera ûntû, kwëethîrwa kûrî ûntû bûrîo bwa ndekera, nthithagia ûu Kristû akîmenyaga nîkenda buî bûkagunîka.

¹¹Nthithagia ûu nîkenda Nkoma atîkeeje kwona kaanya ga gûtwaayia, nîûntû nî twijî mîbango yaawe îmîthûûku.

¹² Rîrîa ndakinyîre Troa gûtûmîîria Nteto Injega cia Kristû, Mwathani nî antemeere njîra nîkenda ndita ngûgî kûu.

¹³Îndî ntaang'anîrwe ndîkwîthîra mûtaana wa baaba Tito atî kûu. Tontû bûû, ndîreera antû batigwe bwega na ndîreeta Makedonia.

¹⁴Îndî nî nkaatho kîrî Mûrungu ûrîa ûtûmaga tûûmbana ndeene ya Kristû. Nî Mûrungu ûtûmaga tuî tûtaambia ûûma bwa Kristû gûntû kunthe bûkari ta îera rîrîega.

¹⁵Nîkwîthîrwa tuî tûkari ta îera rîrîega rîa ubaani îrîa Kristû aritagîra Mûrungu, nî tûkinyagîra antû bonthe barîa bakwonoka na barîa bakûûra.

¹⁶Îera rîu rîkari ta gîkuû kîrî barîa bakûûra na ûtûûro kîrî barîa bakwonoka. Nûû îndî ûûmba kûrita ngûgî îîu?

¹⁷Tuî tûtîkari ta antû babaingî, barîa baethetie Nteto cia Mûrungu ta biashara. Îndî tuî nîûntû Mûrungu nî atûtûmîte, twaaragia tûrî na mma mbere yaawe, tûrî nthûûmba cia Kristû.