Read KIMERU BIBLE PROTESTANT EDITION 2Ako 3 Bible Online

2Ako 3 - KIMERU BIBLE PROTESTANT EDITION bible

2Ako 3

¹Ka bûkwoona teeka twambîîrîtie gwikaatha kaîrî? Ka tûbuîri kwîja na barûga ya gûtûkathîîria kana bûtwaa yo ta ûrîa antû bamwe bakûthithia?

²Bûi nî buî barûga yeetû ya gûtûkathîîria îrîa yaandîki nkoroone cieetû îtua kûmenyagwa na kûthomagwa nî antû bonthe.

³ Naabuî nî bûkwonania bûrî barûga kuuma kîrî Kristû îrîa twatûmîîrwe tûrareeta. Barûga îîu îtîaandîki na rangi îndî yaandîkîtwe na Roho wa Mûrungu ûrîa ûtûûraga mwoyo. Ningî îtîaandîki mbechueene cia maiga îndî yaandîkîtwe nkoroone cia antû.

⁴Tûriuga ûjû nîûntû nî tûgûciîtîkia mbere ya Mûrungu nîûntû bwa Jesû Kristû.

⁵Teeka kûrî gîntû tûrî nakîo na bweetû kîa gwikûmîria atî twoomba kûrita ngûgî îîu îndî nî mûrungu ûtûmaga tûûmba kûrita ngûgî iu.

⁶ Nî Mûrungu ûtweete inya ya kwaa ariti ngûgî ba kîrîkanîro gîkîerû. Kîrîkanîro kîu nakîo tî kîa Waatho bûbwaandîke îndî nî kîa Roho nîûntû Waatho bûrîa bwaandîki bûreetaga gîkuû, îndî Roho areetaga ûtûûro.

⁷ Waatho bûu bwaandîki mbechueene cia maiga mûthieene nî gîkuû bwaaretere. Kûnenkanîrwa kwa Waatho bûu nî kwejîre na mwago na ûkumio bûbûnene mono kinya antû ba Israeli bararemwa nî kûraithîîria ûthiû bwa Musa nî ûrîa bwakengete kinya këethîra kwaarî gwa kagiita gagakai. Rîu gûkëeja kwîthîrwa kûnenkanîrwa kwa Waatho bûu bwaaretere gîkuû nî kwaarî na mwago na ûkumio bûbûnene ûu rî,

⁸kûnenkanîrwa kwa Roho gûtîthîrwa kûrî na mwago nkûrûki?

⁹Tontû bûû, gûkëeja kwîthîrwa nîu kwaarî na mwago jûmûnene îgiita rîa kûnenkanîrwa kwa Waatho bûrîa bwaatûmîre tûgitîrwa îgamba rîa gûkua, bûu bûrîonania atî kûnenkanîrwa kwa Waatho bûrîa bûtûmaga twigithanua na Mûrungu gûkeethîrwa kûrî na mwago jûmûnene nkûrûki.

¹⁰Tontû bûû, twoomba kuuga atî nîûntû mwago jûkwîja jûmûnene nkûrûki, nandî mwago jûrîa jwaarî o mbere nî jwathirîre.

¹¹Gûkëethîrwa ûntû bûu bwa ûkumio bwa kagiita gagakai nîu bweejîre na mwago jûmûnene, no mwanka mwago jûrîa jûrî jwa gûtûûra jwîthîrwe jûrî na ûkumio bûbûnene nkûrûki.

¹²Nandî tontû bwa ûrîa tûrî na wîrîgîîro bûû, tûrî na ûchamba mono.

¹³ Tûtîkari ta Musa ûrîa weekîîre kananga ka gûkunîkîra ûthiû bwaawe nîkenda Aisraeli batîkoone mûthia jwa gûkenga kûu gwacokere kûthira.

¹⁴Îndî mathûgaanio jaao nî jaarigicanîrue na mwanka naarua tûrî kananga kau nî kethagîrwa gakûnîkîte mathûgaanio jaao rîrîa bakûthoma mauku ja kîrîkanîro gîîkûrû. Kananga kau keebagua o rîrîa muntû aagwatanîra na Kristû.

¹⁵O kinya naarua tûrî, îgiita rîonthe rîrîa bathomaga Waatho bwa Musa, kananga nî kethagîrwa gakunîkîte mathûgaanio jaao.

¹⁶ Îndî kananga kau keebagua rîrîa muntû acokeera kîrî Mwathani.

¹⁷Rîu Mwathani nî Roho na arîa Roho wa Mwathani arî, kûrî na ûciathi.

¹⁸Tontû bûû, moothiû jeetû jarîa jatîkunîkîri nî joonanagia ûkumio bwa Mwathani. Ûkumio bûu bwîthagîrwa bûkiumaga kîrî Mwathani ûrîa ûrî Roho na nîwe ûtûgarûraga kuuma ûkumio bûmwe gwîta kîrî bûngî nîkenda tûkara tawe.