Read KIMERU BIBLE PROTESTANT EDITION 2Ako 4 Bible Online

2Ako 4 - KIMERU BIBLE PROTESTANT EDITION bible

2Ako 4

¹Rîu Mûrungu nîûntû bwa ûrîa arî kîaao, nî atûnenkerete ngûgî îîjî na tontû bûu tûtiitîjagîra.

²Tuî nî tûtiganîte buru na mantû jonthe ja nthao na jarîa jathithagua na witho. Mathithio jeetû tî ja waayia na ningî tûtîritanaga ûrongo mantûûne jegiî rûteto rwa Mûrungu. Tuî tûtûûraga weerûûne na tûkageria ûrîa tûûmba gûtûma twîtîkîrîka nî antû bonthe batîgûtûthûgaanîria ûthûûku mbere ya Mûrungu.

³Nteto Injega irîa tûtûmagîîria ikëeja kwîthîrwa ciithi, ciîthîrwa ciithi kîrî antû barîa bakinyîte njîra ya kûûra.

⁴Bo baregaga gwîtîkia nîûntû mathûgaanio jaao nî jarigicanîtue nî mûrungu jwa nthîgûrû îîjî nîkenda batîkoone mwago jwa weerû bwa Nteto Injega cia Kristû, ûrîa ûng'uaneene na Mûrungu.

⁵Tontû baatuî tûtîtûmagîîria mantû jeetû twingwa, îndî tûtûmagîîria Jesû Kristû arî Mwathani, na tûrî nthûûmba cieenu nîûntû bwa Jesû.

⁶ O Mûrungu ûrîa waugîre, “Weerû nî bûthaare arîa kwaarî na muundu,” nîwe ûthaarîte nkoroone cieetû nîkenda atûma tûmenya ûkumio bwaawe bûrîa bûthaaraga kuuma ûthiûûne bwa Jesû Kristû.

⁷Îndî mîîrî yeetû îrîa îkamatîte ûntû bûu bwa bata ûjû îkari ta into bia yûûmba, nîkenda kwoneka atî inya îîu nene nî ya Mûrungu, na tî yeetû.

⁸Nî tûinyagîîrua nteere cionthe, îndî tûtiinyaga buru; nî twîthagîrwa tûrî na thîîna îndî tûtiitîjagîra;

⁹nî tûthangîkagua îndî tûtîîrûkagîrwa; nî tûringanagua nthî îndî tûtîûragagwa.

¹⁰Magiita jonthe twîtaga tûkamatîte gîkuû ta kîrîa Jesû aakuîre mîîrîîne yeetû nîkenda kinya ûtûûro bwa Jesû bûkoomba kwoneka ûrîa bûkari mîîrîîne yeetû.

¹¹Îgiita rîonthe rîrîa tuî tûrî mwoyo, twîthagîrwa tûrî ûgwatiine bwa gîkuû nîûntû bwa Jesû nîkenda ûtûûro bweetû bûkoonanua mîîrîîne îîjî yeetû îkujaga.

¹²Tontû bûû gîkuû gîkaraga naatuî mîîrîîne yeetû, îndî ndeene yeenu nî ûtûûro bûritaga ngûgî ku.

¹³ Maandîko jamatheru jariuga, “Nî ndaarîrie nîûntû nî ndeetîkîrie.” Ûu nou kinya tuî ndeene ya Roho ûu wa wîtîkio twaragia nîûntû nî twîtîkîtie.

¹⁴Nî twijî atî Mûrungu ûrîa wariûkîrie Jesû Kristû, agatûriûkia kinya tuî amwe na Jesû na atûkinyie amwe naabuî mbere yaawe.

¹⁵Mantû jaja jonthe jarîo nîkenda bûkagunîka na nîkenda o ûrîa ûtugi bwa Mûrungu bûgeeta na mbere gûkinyîra antû babaingî nkûrûki, babaingî bagacokia nkaatho inyingî na batûme Mûrungu akumue.

¹⁶Tontû bûu tûtiitîjagîra buru. Kinya këethîra mîîrî îîjî yeetû nî îgwîta na mbere îgîkûraga, kîroho twîtaga na mbere tûkîerûagua o ntukû o ntukû.

¹⁷Mîthangîko îîjî îmîkai na ya kagiita gagakai îrîa twoonaga îîthagîrwa îgîtûthuranîîra ûkumio bûbûnene na bwa kenya na kenya bûrîa bûkûrûkîte mîthangîko îîu.

¹⁸Tontû tuî tûtîraithagîîria mantû jarîa joonagwa îndî tûraithagîîria mantû jarîa jatîonagwa. Tontû mantû jarîa joonagwa nî ja kagiita gagakai akî îndî mantû jarîa jatîonagwa nî ja gûtûûra kenya na kenya.