Read KIMERU BIBLE PROTESTANT EDITION 2Ako 5 Bible Online

2Ako 5 - KIMERU BIBLE PROTESTANT EDITION bible

2Ako 5

¹Tontû nî twijî atî nyomba îrîa tûtûûraga ndeene yaayo tayo mîîrî yeetû, kinya îkatharua, tûrî na nyomba îngî îrîa Mûrungu atwakîrîte îgûrû. Nyomba îîu nayo îtîaki na njara îndî nî ya gûtûûra kenya na kenya.

²Nî mma tûrî mwîrîîne jûjû tûkaraga tûgiikaagîra tûkiirîragîîria nyomba îîu ya îgûrû îrîa tûgekîrwa ta nguû,

³nîkenda twamîîkîra tûtîkoonwe tûrî kîthûnû.

⁴Îgiteene rîrî tûrî mwîrîîne jûjû, nî tûkaaga tûkîthangîkaga; tî atî ga twendaga kwîthîrwa tûtî na mwîrî jûjû jûkujaga, îndî ga twirîragîîria gwîkîrwa mwîrî jûrîa jûtîkujaga, nîkenda mwîrî jûjû jûkujaga jûkagarûrwa jwee jwa gûtûûra kenya na kenya.

⁵Mûrungu we wengwa nîwe ûtûthuranîrîte kûgarûrwa kûu na nî atweete Roho waawe arî rwano rwa gûtûrikithîria mantû jau na jangî jarîa eekîte nîûntû bweetû jarîo mma.

⁶Tontû bûû, tuî nî twigagua tûrî na kûmîîria. Nîtûmenyaga atî rîrîa tûrî mwîrîîne jûjû twîthagîrwa tûrî kûraaja na kûrîa Mwathani atûûraga.

⁷Tontû tuî tûtûragua nî wîtîkio na tî jarîa twonaga.

⁸Tuî tûrî na ûchamba na tûrîona nî kaaba kuuma mwîrîîne jûjû tûkeethîrwa tûrî na Mwathani kwaawe.

⁹Tontû bûû, mworoto jweetû nî kûmwathîkîra tweethîrwa tûrî mwîrîîne kana tûrî kwaawe.

¹⁰ Tontû twinthe no mwanka tûrûûngame mbere ya gîtî gîa kûgitîrwa îgamba rîa Kristû, nîkenda o ûmwe weetû akaewa îtuui rîrîega kana rîrîî kûringana na mantû jarîa athithîtie arî nthîgûrûûne.

¹¹Tontû tuî nî twijî gûkîra Mûrungu nî ûntû bwa bata, ga tûciûmagia kwerenca antû. Mûrungu nî atwijî bwega, naani nî ngwîtîkia kinya buî nou bûtwijî.

¹²Teeka tuî tûkûgeria gwikathîrîria kîrî buî, îndî ga tûkûbwîra mantû jaja nîkenda bwona mantû ja gûtûma bwikumia nîûntû bweetû. Ningî nîkenda bûkoona bwa gûcokeria antû barîa baikumagia nîûntû bwa îgweta rîrîa muntû arî narîo antû a baikumia nîûntû bwa ûrîa barî.

¹³Gûkëeja kwîthîrwa nî nthû tûrî nacio, tûrî nacio nîûntû bwa Mûrungu; îndî gûkëeja kwîthîrwa mathûgaanio jeetû nî jameega, ûntû bûu bûkari ûu nîûntû bweenu.

¹⁴Nîkwîthîrwa nî wendo bwa Kristû bûtûtongagîîria, tuî nî twijî atî nî muntû ûmwe waakuîre nîûntû bwa antû na tontû bûû antû bonthe nî bakuîte.

¹⁵Nawe aakuîre nîûntû bwa antû bonthe nîkenda barîa batwîre mwoyo batîcoka gûtûûra nîûntû bwaao bongwa îndî batûûrage nîûntû bwa ûu waakuîre na arariûka nîûntû bwaao.

¹⁶Tontû bûû, kuuma nandî tuî, tûtîtua kûgitagîra antû îgamba ûrîa antû bathithagia. Kinya këethîra kûrî îgiita twagitagîra Kristû ta ûrîa antû bathithagia, nandî tûtîthithagia ûu.

¹⁷Rîrîa muntû kinya ûrîkû aigwatithania na Kristû, nî aejaga kîûmbe gîkîerû. Mantû jaawe jarîa makûrû nî jathiraga akaeewa mûkariî jûngî jûmwerû.

¹⁸Mantû jaja jathithagua nî Mûrungu ndeene ya Kristû ûrîa watwigithanîrie nawe twatiga kwaa anthû baawe. Rîu nî atûnenkerete ngûgî ya kwigithania antû bangî kinya bo baae acoore baawe.

¹⁹Ntûmîîri yeetû nayo nî atî Mûrungu nî aarî ndeene ya Kristû akigithanagia antû bonthe baa acoore baawe. Mûrungu atîtaraga meeyia ja antû îndî we nî atweete ntûmîîri ya kwigithania antû baa acoore baawe.

²⁰Tontû bûû, tûtûmi antû a Kristû aja nthîgûrûûne, Mûrungu agîtûtumagîra tûbwerenca. Tûrîbûûria tûrî antû a Kristû bwigithanue na Mûrungu.

²¹Kristû ataarî na meeyia, îndî Mûrungu nî aatûmîre akamata meeyia jeetû, nîkenda na njîra yaawe tûkaa babaagîru mbere ya Mûrungu.