Read KIMERU BIBLE PROTESTANT EDITION 2Ako 6 Bible Online

2Ako 6 - KIMERU BIBLE PROTESTANT EDITION bible

2Ako 6

¹Rîu tuî tûrî ariti ngûgî amwe na Mûrungu, nî tûkûbwerenca bûtîkaeethie ûtugi bûrîa twaeerwe nî Mûrungu gîntû kîa ûtheri.

² Nîkwîthîrwa ûjû nîu Mûrungu akuuga, “Rîrîa kwaarî na ûbatu nî ndakûthikîrîîre, na ntukû ya kwonokania yakinya ndîragûteethia.” Nandî rîrî nîrîo îgîîta rîrîa rîagîrîte, na mûthenya jwa kwonokua nî naarua.

³Tuî gûtî kîgitario twîkaga mbere ya muntû kinya ûrîkû, nîkenda ngûgî yeetû îtîkeeje kwonwa îtîagîrîte.

⁴Îndî tuî kîrî ngûgî irîa tûritaga, nî tûcionanagia tûrî nthûûmba cia Mûrungu na njîra cionthe; nî tûûmagîîria mîthangîko na mathîîna o na kûnyamaara gûkwingî.

⁵ Nî tûûri ibooko na twatheekwa ncheera na twaithûkîrwa nî ntundu na twarita ngûgî na twanoga na twaraara tûtî toro na tûrî na mpara.

⁶Nî tûcionanîtie atî tûrî nthûûmba cia Mûrungu nîûntû bwa gûkara na nkoro intheru na kwîthîrwa tûrî na ûmenyo na kûûmîîria mantûûne na kwîthîrwa tûrî na kwîgîîrua bangî kîaao. Ningî tûrî na Roho Ûmûtheru na tûrî na wendo bwa mma.

⁷Nî tûcionanagia tûrî nthûûmba cia Mûrungu tontû bwa gûtûmîîria Nteto cia Mûrungu tontû bwa inya yaawe. Waagîru nîbu îthaga rîeetû rîa kûrwaa na rîa gûciigîra narîo nteere cionthe.

⁸Nî tûtîîagwa na tûkathaithua, na tûkarumwa na tûgakumua. Nî tûtaragwa tûrî arongo, îndî tuî nî mma twaragia;

⁹tûgatarwa teeka tûtiijîîwe îndî nî twijîîwe nî bonthe; tûgatarwa ta antû bakuîte îndî tuî tûrî mwoyo. Nî tûnyamaaragua îndî tûtîtumbûragwa.

¹⁰Ningî nî twigithagua bûbûûî nkoroone îndî tûkaraga îgiita rîonthe tûgwîrîtue; tûkari ta nkîa îndî nî tûtûmaga babaingî baa itonga; tûkari ta antû gûtîkîo barî nakîo îndî gûtîkîo twagîte.

¹¹Acoore beetû ba Korintho, tûkûbwarîria mantû jonthe tûtîkûbwitha kinya ûntû bûmwe na tûbwendeete mono.

¹²Tîtuî tûregete kûbwenda îndî nî buî bûtîng'anîri nî tuî.

¹³Nandî ga nkwaria naabuî ta aana baakwa: twoonieni nî bûtwendeete ta ûrîa tûbwendeete.

¹⁴Bûkáa ba mûûrû jûmwe na antû barîa batîtîkîtie Mûrungu. Kûrî rîo waagîru na meeyia biûmba kwiganua? Ningî nî ngwatanîro îrîkû îrîo kîrî weerû na muundu?

¹⁵Nîatîa îndî Kristû na Nkoma boomba kûgwatanîra? Muntû wîtîkîtie egiî muntû ûtîtîkîtie atîa?

¹⁶ Kîûrû kîa Mûrungu kîegeenie atîa na mîrungu ya mîng'uanano? Nîkwîthîrwa tuî nî tuî kîûrû kîa Mûrungu ûrîa ûtûûraga mwoyo. O ta ûrîa Mûrungu augîîte Maandîkoone: “Ngatûûraga ndeene yaao, na nkarage amwe nabo. Naani nkaa Mûrungu waao, nabo bae antû baakwa.” Tontû bûû, Mwathani ariuga:

¹⁷ “Umeeni kîrî bo, naabuî bûciathûrane nabo. Bûkáringithia gantû karî mûgiro, naani nkabwîtîkîra.

¹⁸ Nkaa Abaagu, naabuî bûkaa ataana na aarî baakwa, nîu Mwathani Mweneinya akuuga.”