Read KIMERU BIBLE PROTESTANT EDITION 2Ako 7 Bible Online

2Ako 7 - KIMERU BIBLE PROTESTANT EDITION bible

2Ako 7

¹Wîrane bûu bûrî o nîûntû bweetû. Tontû bûû, acoore baakwa twitherieni na tûtigane na ûntû kinya bûrîkû bûrîa bwîkagîra mîîrî na roho cieetû mûgiro îndî tûtûûrage tûrî babatheru buru tontû bwa gûkîra Mûrungu.

²Twonereni kaanya nkoroone cieenu; gûtî muntû tûthûûkîtie na gûtî we twathithîrîa ûthûûku kana tûinyîîria.

³Ntîkuuga ûu nkîenda gûtwîra muntû kinya ûrîkû îgamba rîrîthûûku nîûntû o ta ûrîa nthirîtie kuuga, tûkue kana tûtûûre mwoyo, tuî nî tûbwendeete.

⁴Nî mbwîtîkîtie mono; nî nkwigua ngiikumia nîûntû bweenu mono mono. Amwe na mathîîna jarîa tûrî najo nî bûmboreretie na ndaigua ndî na kûgwîrua mono.

⁵ Kinya tûgûkinya Makedonia tûtaanogokere. Nî twonere mathîîna kuuma nteere cionthe: mateta na antû bangî na ndeene nî twaarî na ûguaa.

⁶Îndî Mûrungu ûrîa ûboragîria barîa barî na kwithikîîra, nî aatûborerie nîûntû bwa ûrîa Tito eejîre.

⁷Kîrîa gîatwigithîrie bwega tî kwîja kwaawe akî, îndî nî gûtûboreria na rwaria rwaawe agîtwîra ûrîa bwamwîkîîre inya. Nî aatwîrîre ûrîa bûkwenda mono kûmbona na ûrîa buî bwithikîîrîte nîûntû bwaakwa na ûrîa bûrîngîenda kûndwîrîîra. Tontû bûû ndî na kûgwîrua kinya nkûrûki.

⁸Kinya këethîra barûga yaakwa kîrî buî nî yaatûmîre bwigua bûbûûî, ntîkwirira nîûntû bwa kûbwaandîkîra yo. Nî mma barûga îîu nî yatûmîre bwithikîîra kinya këethîra nî kagiita gagakai.

⁹Îndî nandî nî ngwîrîtue. Ntîgwîrîtue nîûntû bwa ûrîa bwaigîrue bûbûûî îndî ngwîrîtue nîûntû kwithikîîra kweenu nî gwatûmîre bwirira na bûthongomia mîîtîre yeenu. Mûrungu nî aatumîîre kwithikîîra kûu kweenu na tontû bûû tûtabûthûûkia noo atîa.

¹⁰Nîkwîthîrwa kwithikîîra kwa mûthemba jûrîa Mûrungu eendeete nî gûtûmaga muntû airira na kwirira naku gûkareeta wonokio na tontû bûû gûtî gîtûmi kîa twirira nîûntû bwa ûu twaathithîrie. Îndî kwithikîîra kûrîa kuumaga mantûûne ja nthîgûrû îîjî nî gîkuû kûretaga.

¹¹Nandî bwoomba gûcionera bwingwa umithio bwa kwithikîîra kûrîa kûringeene na ûrîa Mûrungu eendaga. Rîu buî nî bûthirîtie kwaa antû ba gûciûmia mono na bakûmaka na barî na ûguaa na barî na wîru na antû bendeete kwona atî eeyia bagûkanûkua. Buî nî bwonanîtie atî bûtî na maatia ûntûûne kinya bûrîkû.

¹²Tontû bûû, kinya këethîra nî ndaandîkîre barûga îîu, ntaandîkîre nîûntû bwa muntû ûrîa waathûûkîtie kana nîûntû bwa ûrîa waathûûkîtue. Ndaandîkîre nkîenda kûbûmenyithia bwega mbere ya Mûrungu ûrîa bûciritanîrîtie nîûntû bweetû.

¹³Tontû bûû kîu nîkîo gîtûmi kîa twîthîrwa tûrî na kûûmîîria. Tûtagwîrîrue nîûntû bwa kûûmîîrua gweetû akî îndî nî twaagwîrîrue nkûrûki tûkwona ûrîa Tito aarî na kûgwîrua kuumania na ûrîa bwinthe bwaatûmîre aigua anogokeete.

¹⁴Nî ndaikumîrie kîrî we mantûûne jabwegiî, naabuî bûtambigithîrie bûbûûî. Îgiita rîonthe tûkarîte tûkîaragia naabuî ûûma na o ûu gwikumia gweetû mbere ya Tito mantûûne jeenu nî kwa mma.

¹⁵Tito nî agwîta na mbere akîbwendaga aaririkana ûrîa bwinthe bwaathîkagîra mooritani jaawe na ûrîa bwamûgwatîre ûgeni bûrî na ûguaa na bûkinainaga.

¹⁶Nî ngwîrîtue nîûntû bwa kwîthîrwa ndoomba kûbwîrîgîîra ntî na nkaanja buru.