Read KIMERU BIBLE PROTESTANT EDITION 2Ako 8 Bible Online

2Ako 8 - KIMERU BIBLE PROTESTANT EDITION bible

2Ako 8

¹ Ataana na aarî ba baaba, tûrîenda bûmenya mantû jeegiî ûtugi bwa Mûrungu bûrîa bwonekete kaniseene cia Makedonia.

²Akristû ba gûntû kûu nî baarî na magerio jamanene kuumania na ûkîa bûrîa baarî nabu îndî kûgwîrua kwaao kûreethîrwa nî gûkwingî mono, o mwanka baraeejana nkûrûki ya ûrîa kûrîngîrîgîîrwa.

³Ndomba kuuga na mma atî baeejanîre na kwenda kwaao o ûrîa inya ya o muntû yang'anaga na kinya nkûrûki.

⁴Nî baatwerencere beetîkîîrue batonye mûbangoone jûu jwa gûteethia atheru ba Judea.

⁵Tûteerîgîîrîte ûntû ta bûu kuuma kîrî bo! Mbere nî bongwa baambîre gûcieejana kîrî Mwathani rîu barainenkanîra kîrî tuî kûringana na wendi bwa Mûrungu.

⁶Kîu nîkîo gîatûmîre tûtûma Tito ûrîa waambîrîîrie ngûgî gatîgatîîne keenu nîkenda akabûteethia kûmîûjûria.

⁷Buî bûrî itonga mono mantûûne jeenu jonthe; mantûûne ja wîtîkio na rwaria na ûmenyo na mantûûne ja gûteethania na ja gûtwenda. Tontû bûû ciûmieni bwîthîrwe bûrî ba mbere ngûgîîne îîjî ya gûteethania.

⁸Ntîkuuga ûu bûrî ûû waatho îndî gankwenda kwonania ûrîa wendo bwa bangî bûkari ûntûûne bûu.

⁹Buî bwingwa nî bûkûmenya ûtugi bwa Mwathani weetû Jesû Kristû atî kinya këethîra nî aarî gîtonga mono, nî aacieetherie nkîa nîûntû bweenu nîkenda agatûma buî bwee itonga kuumania na ûkîa bwaawe.

¹⁰Ni ndîona bûrî bûbwega këethîra rîu bûkathirîkîria ngûgî îrîa bwaambîrîrie ta mwaka jûmwe jûkûrûkîte kuuma nandî. Nî buî bwaarî ba mbere kwenda kûbûthithia na ningî bûrabûthithia.

¹¹Tontû bûû, ciûmieni nîkenda o ta ûrîa bwaarî na wendi bûkîambîrîria ûntû bûu, bwîthîrwe bûkîonania wendi kûbûûjûria o na kîrîa bûrî nakîo.

¹²Muntû akeenda kweejana, Mûrungu eetîkagîîria kîewa kîaawe kîrîa aritîte kûringana na birîa arî nabio îndî tî kûringana na birîa atî nabio.

¹³Teeka nkuuga atî bangî baûrwe mûrigo îndî buî bwaîkue ju.

¹⁴Ûrîa nkuuga nî atî, tontû bwa ûrîa buî bwingîîri nî into îgiiteene rîrî, teethieni barîa barî na ûbatu nîkenda tûng'anana. Rîu naabuî rîrîa bûkeethîrwa bûrî na ûbatu nabo beethîrwe baingîîri nî into beeje babûteethie.

¹⁵ No ta ûrîa Maandîko jakuuga, “Ûrîa woothûranagia bibingî, gûtîkîo aatigaragia, nawe ûrîa woothûranagia bibikai, ataanyiîrwa nî bio.”

¹⁶Tûrî na nkaatho mono kîrî Mûrungu nîûntû nîwe ûtûmîte Tito agwîrua nî kûbûteethia o ta ûrîa kinya tuî tûbûteethagia.

¹⁷Nî aagwîrîrue tûkûmûûria eeje abûteethie tontû nî eendeete kinya we mbereene kwîja kweenu kûbûteethia.

¹⁸Tûgatûma Tito amwe na mûtaana wa baaba ûrîa ûrî îgweta mono kaniseene cieetû tontû bwa ngûgî yaawe ya gûtûmîîria Nteto Injega.

¹⁹Ningî we nî athuurîtwe nî kanisa nîkenda etanagia naatuî ngendoone cieetû cia gûkinyîria antû bangî ûteethio bweetû nîkenda ûkumio bwa Mwathani bûkamenyeewa, naatuî twonanie nî tûkwenda gûteethia.

²⁰Nî tûciûmîtie kûmenyeera ûrîa tûkûrita ngûgî îîu ya kûûthûrania biewa bibi bieejani na wendo tûtîkeeje gûtûma antû batwigîîrua bûbûûî.

²¹ Mworoto jweetû nî kûthithia mantû jarîa jaagîrîte, tî mbere ya Mûrungu akî îndî nî kinya mbere ya antû.

²²Kîu nîkîo gîatûma tûtûma mûtaana wa baaba ûu ûngî barî amwe na bau bangî. Nî tûmûthimîte magiita jamaingî twamwona arî muntû wendeete mono gûteethia. Rîu tontû nî muntû ûbwîtîkîtie nkûrûki, nî akwenda mono gûteethia.

²³Tito nîwe tûrî na ngwatanîro nawe ngûgîîne ya kûbûteethia. Ataana ba baaba bau bangî beejanîtie nawe beejîte antû a kanisa barî ba kwonania ûkumio bwa Kristû.

²⁴Tontû bûû, boonieni ûrîa wendo bweenu bûriki nîkenda kanisa ikoona gwikumia gwaakwa mantûûne jeenu nî kwa mma.