Read KIMERU BIBLE PROTESTANT EDITION 2Ako 9 Bible Online

2Ako 9 - KIMERU BIBLE PROTESTANT EDITION bible

2Ako 9

¹Teeka kûrî na bata mono ya kûbwaandîkîra ûntûûne bûu bwa kweejana into bieenu nîûntû bwa atheru.

²Nî nkûmenya ûrîa buî bwendeete gûteethania na nî ncikumagîria ûntû bûu kîrî antû ba Makedonia. Nî mbeeraga atî buî antû ba Akaia nî bwaithuranîîre kuuma mwaka jûrîa jûkûrûkîte na tontû bûû wîru bweenu nî bûtûmîte babaingî baao bagîa wîru ûntûûne bûu.

³Îndî nandî nkûbûtûmîra ataana ba baaba nîkenda gwikumia gweetû nîûntû bweenu gûtîkeeje kwaa kwa ûtheri nîkenda buî bwîthîrwa bwithuranîrîte o ta ûrîa nthirîtie kuuga.

⁴Nîkenda këethîra kûrî antû ba Makedonia bakeejania naani na beethîre bûtithuranîrîte, tuî tûgacokerwa nî nthao na twaage ûrîa tuuga ûntû bweenu tontû bwa kwîthîrwa tûbwîrîgîrîte ûu.

⁵Kîu nîkîo gîatûmîre mbona kwagîrîte ntûme ataana ba baaba beejage barî mbere yaakwa, nîkenda bathuranîra kîewa kîu kîeenu bwekîte wîrane atî bûkaeejana. Bûtakinyîîrîtue nî muntû îndî nî kîewa kîeenu gîa gûciendera.

⁶Ga nkuuga atîrî, ûrîa waandaga bibikai agîcaanaga agaketha bibikai, nawe ûrîa waandaga na wingî agaketha na wingî.

⁷O muntû abuîrîte kûeejana o ûrîa abangîte, tî atîgwîrîtue kana teeka akînyîîrîtue tontû Mûrungu eendeete muntû ûrîa weejanaga agwîrîtue.

⁸Nawe Mûrungu oomba kûbûaa na wingî itharimo bia mîthemba îmiingî nîkenda bûtîkeeje kwaaga gîntû kinya kîmwe. Tontû bûû, bûkoombaga kwona na wingî into bia kûng'ana bia kûrita ngûgî cionthe irîa njega.

⁹ No ta ûrîa Maandîko jakuuga, “We aritaga na wingî agiteethia nkîa; Waagîru bwaawe bûgatûûra kenya na kenya,”

¹⁰ Mûrungu ûrîa weejanaga mbeeû kîrî mûrîmi na akaeejana biakûrîa nîwe ûkabwaa mbeeû cionthe irîa bûkenda na atûme ikûre na iciare maketha jamaingî nîûntû bwa kweejana na magi kweenu.

¹¹Agatûma bwîthîrwe bûrî itonga bia into bionthe nîkenda bûkoomba kweejanaga na magi magiita jonthe. Bûu nabu bûgatûma babaingî bacokerie Mûrungu nkaatho tontû bwa biewa bieenu birîa bakoonaga kuuma kîrî tuî.

¹²Tontû biewa biu bieenu bitîteethagia atheru akî îndî nî bitûmaga antû babaingî bakoojûrwa nî nkaatho kîrî Mûrungu.

¹³Ûu bûkûrita biewa gûgatûma antû babaingî bakumithie Mûrungu tontû bûkoonania nî bwathîkîrîte ûrîa Nteto Injega cia Kristû ikuuga na ningî bacokerie Mûrungu nkaatho nîûntû bwa biewa bieenu kîrî bo na kîrî antû bangî bonthe.

¹⁴Antû bau nabo bakabûrombagîra boojûrîtwe nî wendo tontû bwa ûtugi bwa mwanya bûrîa Mûrungu abweete.

¹⁵Tûcokerieni Mûrungu nkaatho tontû bwa kîewa kîrîa gûtî nteto tûûmba kwîrana bwega ûrîa gîkari.