Read KIMERU BIBLE PROTESTANT EDITION Agal 1 Bible Online

Agal 1 - KIMERU BIBLE PROTESTANT EDITION bible

Agal 1

¹Nî ni Paûlû ûrîa wîti aa mûtûmwa îndî tî kuumania na muntû kana nîûntû bwa inya ya muntû, îndî nîûntû bwa inya ya Jesû Kristû na ya Mûrungu Baaba ûrîa wariûkîrie Jesû kuuma kîrî akuû.

²Tûrî na ataana na aarî ba baaba nî tûkûbûkeethia buî antû ba kanisa irîa irî Galatia.

³Bûrokaraga na ûtugi na thîîrî kuuma kîrî Mûrungu Baaba na Mwathani weetû Jesû Kristû.

⁴Kristû airitîre nîûntû bwa meeyia jeetû kûringana na ûrîa Mûrungu Baaba weetû eendeete, aratûrita kuuma kîrî mantû jamathûûku ja îgiita rîrî.

⁵Ûkûmio nî kîrî Mûrungu kenya na kenya! Amen.

⁶Nî ndigari mono nîûntû bwa ûrîa bûgarûkîte ntûti na bwaatigana na Mûrungu ûrîa waabwîtîre ûtugiine bwa Kristû na bwacoka kûthingata nteto cia mûthemba jûngî.

⁷Îndî teeka kûrî na Nteto Injega ingî. Ûûma nî atî kûrî na antû bamwe barîa bakûbûthangîkia bakîendaga kûthûûkia Nteto Injega cia Kristû.

⁸Îndî rî, kinya gûkëethîrwa nî ûmwe weetû kana nî mûraîka aumîte îgûrû ûkûbûtûmîrîria Nteto Injega cia mûthemba jûngî itî irîa twabûtûmîîrîrie, muntû ûu arorumwa!

⁹O ta ûrîa twaabwîrîre mbere, na kinya nandî nî tûkûbwîra kaîrî atî: muntû kinya ûrîkû ûrabûtûmîrîria Nteto Injega mwanya na irîa bweetîkîrie, muntû ûu arorumwa!

¹⁰Nandî rî, ncwaga gwîtîkîrîka kîrî antû kana kîrî Mûrungu? A kana rî, nî antû mbîthagîrwa nkîenda kûgwîria? Këethîra nî ûu nthithagia, ntîngîthîrwa ndî nthûûmba ya Kristû.

¹¹Ataana na aarî ba baaba, ndîenda bûmenye atî Nteto Injega irîa ndaatûmîrîîrie itaumanîtie na muntû.

¹²Ntaeerwe kana nditanwa cio nî muntû kinya ûrîkû îndî nî Jesû Kristû waanguûrîîre cio.

¹³ Ndî na mma atî nî bwigîtue ûrîa karaaja ndaatwîre nthingatîte ndini ya Kîyahudi, na ûrîa ndaathangîkagia kanisa ya Mûrungu ntî na kîaao na nkîendaga kûmîthiria buru.

¹⁴ Ûûni nî ndaciindîte antû ba nthukî yeetû barîa baarî ba mûgongo jweetû ûntûûne bwa kûthingata ndini ya Kîyahudi, ndî na wîru bûbwingî mono mantûûne ja kûthingata nkuagaya cia biûjûjû bieetû.

¹⁵ Îndî Mûrungu, nîûntû bwa ûtugi bwaawe, nî aarî akûnthuura mbere ya ntîraciarwa na arambîta nîkenda mûtumîkîra.

¹⁶Ningî rîrîa Mûrungu oonere atî nî bûbwega atûme menye Mûtaana waawe nîkenda ngatûmîîria Nteto Injega ciaawe kîrî antû barîa batî Ayahudi, nîu ndaathithîrie. Ntaambîre kûûria nkuagaya kuuma kîrî muntû kinya ûrîkû,

¹⁷kana mbîta Jerusalemu kîrî barîa baarî bakweethua atûmwa mbere yaakwa. Ndeetîre Arabia mbere na nyumeene ndîracoka Damaski.

¹⁸ Nyuma ya mîaka îthatû nîrîo ndeetîre Jerusalemu kwonana na Peterû na ndîrakara nawe ntukû îkûmi na ithaano.

¹⁹Îndî ntoonere atûmwa bangî tiga Jakubu mûtaana wa ng'ina wa Mwathani.

²⁰Mûrungu nî aijî atî mantû jaja nkûbwaandîkîra nî ja mma na tî ja ûrongo.

²¹Nyumeene nîrîo ndeetîre nthîgûrû ya Sîria na Cilicia.

²²Îgiteene rîu, antû ba kanisa cia Judea bataarî bakûmbona baameenya.

²³Baijî akî nteto irîa bangî baugaga, atî: “Muntû ûrîa waatwîre agîtûthangîkagia, nandî nîwe ûgûtûmîîria mantû ja wîtîkio bûrîa aageragia kûthiria!”

²⁴Tontû bûû, barakumia Mûrungu nîûntû bwaakwa.