Read KIMERU BIBLE PROTESTANT EDITION Agal 3 Bible Online

Agal 3 - KIMERU BIBLE PROTESTANT EDITION bible

Agal 3

¹Îbuî Agalatia, anga bûrî biaa ûjû! Nûû ûbûrogeete? Nî bwataarîrue bwega nteto ciegiî gûkua kwa Jesû Kristû mûtharabeene.

²Û mbîîreni ûntû bûbû akî: ka Mûrungu abwere Roho waawe nîûntû bwa kwîthîrwa bûûjûrîtie ûrîa Waatho bûkuuga kana nîûntû bwa ûrîa bwaigîrue Nteto Injega cia Kristû na bûraciîtîkia?

³Ka bûriiti atîa? Bwaambîrîîrie na Roho wa Mûrungu, ka nandî bûkwenda kûrigia na inya yeenu bwingwa?

⁴Ka mantû jonthe jarîa jakarîkîte kîrî buî jaeete ja ûtheri? Nî mma tî ja ûtheri!

⁵A rî, ka Mûrungu abweejaga Roho waawe na akaringa biama kîrî buî nîûntû bwa ûrîa bûûjûragia Waatho kana nîûntû bwa kwigua Nteto Injega cia Kristû na bûgaciîtîkia?

⁶ O ûu nîu kwaandîki mantû jegiî Abrahamu, “We nî eetîkîrie Mûrungu, na nîûntû bwa wîtîkio bûu bwaawe Mûrungu aramûtara atî nî ûmwagîru.”

⁷ Tontû bûû, menyeni atî antû barîa beetîkîtie Mûrungu, nîbo ataana ba Abrahamu.

⁸ Maandîko nî joonanîrie o mbere mma atî Mûrungu akaagîrithia antû barîa batî Ayahudi nîûntû bwa gwîtîkia. Tontû bûû, Maandîko jaratûmîîria Nteto Injega kîrî Abrahamu atî: “Mûrungu akatharima antû barîa batî Ayahudi nîûntû bwaaku.”

⁹Tontû bûû, bonthe barîa beetîkagia nî batharimagwa o ta ûrîa Abrahamu atharimîrwe nîûntû bwa gwîtîkia.

¹⁰ Antû barîa berîgagîîra kûûjûria ûrîa Waatho bûkuuga, nî barumi. Tontû bûû, Maandîko nî jakuuga, “O muntû ûrîa ûtîthingataga mantû jonthe jarîa jaandîki yukuune rîa Waatho, nî ûmûrume.”

¹¹ Ningî, nî gûkûmenyekana bwega atî gûtî muntû kinya ûmwe Mûrungu ataraga arî ûmwagîru nîûntû bwa Waatho. Nîkwîthîrwa Maandîko nî jakuuga, “Muntû ûrîa ûrî ûmwagîru nîûntû bwa wîtîkio agatûûra.”

¹² Waatho na wîtîkio bitîûmba kûgwatanîra tiga ûrîa Maandîko jakuuga, “Muntû ûrîa ûûjûragia mantû jonthe jarîa Waatho bûkuuga agatûûrua nî Waatho.”

¹³ Îndî Kristû nî aatûkûûrîre kuuma kîrumiine kîa Waatho rîrîa eetîkîrîrie kûrumwa nîûntû bweetû. Tontû Maandîko Jamatheru jariuga, “O muntû ûrîa wambagwa mûtîîne îgûrû, nî ûmûrume.”

¹⁴Kristû aathithîrie ûu nîkenda kîtharimo kîrîa Mûrungu eerîîre Abrahamu kînenkerwa antû barîa batî Ayahudi kuumania na Kristû Jesû na nîkenda tuî nîûntû bwa wîtîkio tûkaeewa Roho ûrîa weranîri nî Mûrungu.

¹⁵Ataana na aarî ba baaba, ka mbwee ngerekano ya ûrîa antû batûûraga; kiigai kîathiria kwaandîkwa na gwîkîrwa caini, gûtî muntû ûcokaga gûkîtharia kana kwongeera gantû kangî.

¹⁶ Nandî rî, mawîrane ja Mûrungu jaarî kîrî Abrahamu, na nchiarwa yaawe. Maandîko jatîkuuga, “Nchiarwa ciaawe,” teeka barî babaingî, îndî jariuga, “Nchiarwa yaawe,” nîûntû nî muntû ûmwe akî ûkwîrîrwa nawe nî Kristû.

¹⁷ Ûrîa nkwenda kuuga nî atî: Mûrungu nî eekîre wîrane na Abrahamu araciîtia akoojûria wîrane bûu. Waatho nabu bwejîre mîaka magana jana na mîrongo îthatû nyumeene. Tontû bûû, gûtî u Waatho bûûmba kûtharia kîrîkanîro kîa Mûrungu kana bweethia wîrane bwaawe gîntû kîa ûtheri.

¹⁸ Tontû gûkëeja kwîthîrwa kîewa kîa Mûrungu kîeejanagwa nîûntû bwa Waatho, nî kuuga, gîtîejanwa nîûntû bwa wîrane. Îndî ûûma nî atî Mûrungu aeere Abrahamu kîewa nîûntû bwa wîrane bwaawe.

¹⁹Këethîra nîu rî, gîtûmi kîa Waatho nîmbi? Waatho bweekîrwe nîkenda bûkamenyithia antû meeyia mwanka rîrîa nchiarwa ya Abrahamu îkeeja, tayo îrîa yaaeei wîrane bûu. Waatho bwatûmîîrwe araîka na bararetera muntû ûrîa waarî mwigithania.

²⁰Îndî gûtî na bata ya mwigithania këethîra nîûntû bwa muntû ûmwe akî; na Mûrungu nî ûmwe wenka.

²¹Kaîrî rî, ka Waatho bûtîkûgwatanîra na mawîrane ja Mûrungu? Arî buru! Këethîra antû nî baeerwe waatho bwa kûboombithia gûtûûra, nîu antû bonthe barîngîagîrithua nîûntû bwa kûûjûria Waatho kûu.

²²Îndî Maandîko jariuga atî nthîgûrû yonthe îrî waathoone bwa meeyia na tontû bûû, kîewa kîrîa kîeranîri gîkanenkerwa barîa betîkîtie Jesû Kristû.

²³Îndî mbere ya îgiita rîa wîtîkio rîîja, Waatho nî bwatûthaîkîte, tûrakara tûthaîki nîbu mwanka rîrîa wîtîkio bûu bwaagwuûrîrwe.

²⁴Tontû bûû, twaathagwa nî Waatho mwanka rîrîa Kristû eejîre nîkenda twagîrithua nîûntû bwa gwîtîkia.

²⁵Nandî tontû îgiita rîongwa rîa wîtîkio nî rîkinyîte, Waatho bûtîcoka gûtwatha kaîrî.

²⁶Buî bûrî aana ba Mûrungu nîûntû bwa wîtîkio na tontû bwa kwîthîrwa bûrî na ngwatanîro na Kristû Jesû.

²⁷Buî barîa bwabatithîrue ndeene ya Kristû, nî bûjûkîtie mûkariî jwaawe.

²⁸Tontû bûû, gûtî na mwanya jwa Ayahudi na antû barîa batî Ayahudi, kana jwa nkombo na barîa batî nkombo, kana jwa mûka na ntomûrûme; bwinthe bûrî gîntû kîmwe nîûntû nî bûgwatanîrîte na Kristû Jesû.

²⁹ Këethîra bûrî ba Kristû, bûrî nchiarwa cia Abrahamu na bûkaeewa birîa Mûrungu eeranîîre.