Read KIMERU BIBLE PROTESTANT EDITION Agal 4 Bible Online

Agal 4 - KIMERU BIBLE PROTESTANT EDITION bible

Agal 4

¹Ga nkuuga atîrî, muntû ûrîa ûkaa mûrîaûkua, akëethîrwa nî mwana kinya këethîra nîwe ûkaa mwene rûgai runthe atî mwanya na nkombo.

²Rîrîa arî mwana kûrî antû bamûkaragia na bakamenyeera into biaawe mwanka îgiita rîrîa îthe aaugîrîte rîgakinya.

³No ta ûu kinya tuî rîrîa twaarî twaana, mbere ya twaa antû agima mantûûne ja wîtîkio, twaarî nkombo cia roho inthûûku irîa ciathaga nthîgûrû îîjî.

⁴Îndî rîrîa îgiita rîo rîongwa rîakinyîre, Mûrungu nî aatûmîre Mûtaana waawe. Areeja arî mûtaana ûciari nî mûka, na aratûûra arî Waathoone bwa Kîyahudi,

⁵ nîkenda agakûûra antû barîa bainyîîrîtue nî Waatho bûu, na nîkenda tûkoomba kwaa aana ba Mûrungu.

⁶Tontû nandî buî bûrî aana baawe, Mûrungu nî aatûmîre Roho wa Mûtaana waawe kîrî tuî, nawe nî Roho ûrîa wîtanaga akiugaga, “Baaba! Baaba Waakwa!”

⁷Tontû bûû, ûgwe ûtî nkombo kaîrî îndî ûrî mwana. Nîkwîthîrwa ûrî mwana waawe, Mûrungu agakwaa bionthe birîa eekîte nîûntû bwa aana baawe.

⁸Mbere rîrîa buî bûtaijî Mûrungu bwaarî nkombo cia mîrungu îrîa îtaarî ya mma.

⁹Îndî nandî tontû bwa ûrîa bwijî Mûrungu kana nkiuga na njîra îngî, nandî tontû Mûrungu nî abwijî nîkî tontû bûgûcoka kîrî roho inthûûku cia ûtheri na îtîûmba kûthithia no atîa? Nîmbi îgûtûma bwenda kwaa nkombo ciaacio kaîrî?

¹⁰Buî nî bûkûngûagîra ntukû na mîeri na biingo na mîaka.

¹¹Nî nkûmaka mono nîûntû bweenu! Ngûgî yonthe îrîa nditîte ya kûbûteethia yomba kwaa ya ûtheri!

¹²Ataana na aarî ba baaba, nî nkûbwerenca bûkare taani. Nîkwîthîrwa kinya ni nkari ta buî. Gûtî u bwanthithîria bûbûûî.

¹³Nî bûkûmenya gîtûmi kîrîa gîatûmîre ntûmîîria Nteto Injega cia Jesû Kristû kîrî buî îgiita rîa mbere; gîtûmi nî atî ka ndaajîtue.

¹⁴Îndî kinya këethîra mbajua yaakwa nî yaabûthangîkîrie buî bûtaandegere kana bûmena. Îndî, bwangwatîre ûgeni o ta ûrîa bûrîngîgwata mûraîka ûgeni kana ûrîa bûrîngîgwata Kristû Jesû wengwa ûgeni.

¹⁵Bwaagwîrîtue mono! Rîu nîatîa gwakara? Ûûni ningwa ndomba kuuga atî bûrîngîkûûra meetho jeenu, këethîra bûu bûrîngîûmbîka, bûgampa jo.

¹⁶Ka rîu ndaa mûnthû weenu nîûntû bwa kûbwîra nteto cia mma?

¹⁷Aritani bau ba ûrongo barî na wîru bûbwingî bakîenda bwaa baao îndî mworoto jwaao tî jûmwega. Barîenda kûbwathûrana naani nîkenda bûkaraga bûrî na wîru bwa kûbacwaga.

¹⁸Nî ûntû bûbwega kwîthîrwa bûrî na wîru mantûûne jaameega këethîra mworoto nî jûmwega îgiita rîonthe na tî rîrîa akî ndî amwe naabuî.

¹⁹Aana baakwa, ndî na rwaakaî nîûntû bweenu o ta ûrîa mwekûrû aigagua rwaakaî akîewa kaana, mwanka rîrîa bûkang'uanana na Kristû.

²⁰Kûrîngîbua mono nkëethîrwa ndî amwe naabuî nandî nîkenda mbwarîria na njîra mwanya, nîûntû nî nkûbûmakîra mono!

²¹Ka mbûûrie buî bwendeete kwathwa nî Waatho. A rî, nî bûmenyaga ûrîa Waatho buugaga?

²² Kwaandîki Waathoone ûjû: Abrahamu aarî na ataana baîrî, ûmwe aarî wa mûka nkombo, na ûngî wa mûka ûtî nkombo.

²³Mûtaana wa mûka ûrîa waarî nkombo, aaciari o ta ûrîa twaana tûngî tûciaragwa, îndî ûrîa ûngî waaciari nî mûka ûrîa ûtaarî nkombo, aaciari kûringana na wîrane bwa Mûrungu.

²⁴Mantû jaja jomba kûgerekanua ta ûjû: aka bau bobaîrî bakagerekanua na irîîkanîîro bio-biîrî. Kîrîkanîro kîa mbere nî kîrîa kîathithîkîre kîrîmeene gîa Sinai. Tûjûkie Hagari arî ngerekano ya kîrîkanîro kîu, nabo aana baawe baciaragwa barî nkombo.

²⁵Hagari, nî ta kîrîma gîa Sinai kîrîa kîrî Arabia na nîwe ngerekano ya ntûûra ya Jerusalemu ya îgiita rîrî, nîûntû yo amwe na atûûri baayo barî ûkomboone.

²⁶Îndî Jerusalemu îrîa îrî îgûrû îtî ûkomboone, nayo nîyo ng'ina weetû.

²⁷ Tontû Maandîko nî jakuuga, “Gwîrua gwe mûka nthaata, gwe ûtaeewa mwana. Tûmîîria na kajû gakanene ûgwîrîtue, gwe ûtaakara na rwakaî ûgîciara. Nîkwîthîrwa aana ba mûka ûrîa wîrûkîri nî babaingî nkûrûki ya ba mûka ûrîa ûrî na mûrûme.”

²⁸Rîu buî ataana na aarî ba baaba, buî bûciari bûrî aana ba Mûrungu kûringana na wîrane bwaawe o ta ûrîa Isaaka aaciarîrwe.

²⁹ Îgiita rîu mwana ûrîa waaciarîrwe ta ûrîa twaana tûngî tûciaragwa nî aathangîkagia ûrîa ûngî waaciarîrwe na inya ya Roho wa Mûrungu; kinya nandî nîu kûrî.

³⁰ Îndî nîatîa Maandîko jakuuga? Jariuga ûjû, “Inga mûka nkombo amwe na mûtaana waawe; tontû mûtaana wa mûka ûu nkombo atîaa mwene rûgai amwe na mûtaana wa mûka ûrîa ûtî nkombo.”

³¹Tontû bûû ataana na aarî ba baaba, tuî tûtî aana ba mûka nkombo, îndî tûrî aana ba mûka ûrîa ûtî nkombo.