Read KIMERU BIBLE PROTESTANT EDITION Agal 5 Bible Online

Agal 5 - KIMERU BIBLE PROTESTANT EDITION bible

Agal 5

¹Kristû nî aatûkûûrîre tûrauma ûkomboone; tontû bûû tûûreni bûrî na ûciathi bûu na bûgeetîkîîrieni gûcoka ûkomboone kaîrî.

²Thikîîreni! Ni ndî Paûlû ndîbwîra atîrî, buî bûkëeja gwîtîkîîria gûtaanwa, ga kwaa atî Kristû atî na gîtûmi kinya kîrîkû kîrî buî.

³Ka mbûririkanie kaîrî: muntû kinya ûrîkû ûrëeja gwîtîkîîria gûtaanwa no mwanka aathîkîre Waatho bunthe.

⁴Barîa beenu bakûgeria gûciagîrithia kîrî Mûrungu nîûntû bwa kwathîkîra Waatho, nî bathirîtie gûciathûrana na Kristû na bwaciathûrana na ûtugi bwa Mûrungu.

⁵Îndî tuî, wîrîgîîro bweetû nî kwagîrithua nî Mûrungu na bûu nîbu tweteerete tugîîteethagua nî inya ya Roho wa Mûrungu ûrîa ûritaga ngûgî na njîra ya wîtîkio bweetû.

⁶Nîkwîthîrwa rîrîa tûrî na ngwatanîro na Kristû Jesû, gûtaanwa kana kûrega gûtaanwa gûtî na bata; kîrîa kîrî na bata nî wîtîkio bûrîa bûritaga ngûgî na njîra ya wendo.

⁷Nî bûreetîte bwega! Nandî nûû ûratûmîre bûtigana na kwathîkîra ûûma?

⁸Tî Mûrungu ûrîa ûbwîtîte ûtûmîte bûrega kwathîkîra ûûma.

⁹ Kamûthega kaniini ga kwimbithia mûgaate nî gatûmaga kîûmbwa kîonthe kiimba.

¹⁰Tontû bwa kwîthîrwa bûgwatithanîtue na Mwathani nî mbîtîkîtie atî bûtîtîkanîîria na ûritani bûngî tiga bwaakwa; nawe ûu ûkûbwangaratania kinya akëethîrwa nîwe ûû, agakanûkua nî Mûrungu.

¹¹Îndî mantûûne jaakwa, ataana na aarî ba baaba, nkëethîrwa nî ntûmagîîria nkiugaga no mwanka antû bataanwe, nîmbi îgûtûma kinya nandî mbîta na mbere kûthangîkua? Ningî kûrîngîîthîrwa nîu gûkari, ntûmîîri yaakwa îrîa yegiî gûkua kwa Jesû mûtharabeene îtîthîrwa îrî kîgitaria no atîa.

¹²Bwagîra antû bau babûthangîkagia bagaciakûra bongwa!

¹³Ataana na aarî ba baaba, buî bwetîrwe nîkenda bûaa antû barî na ûciathi. Tontû bûû, bûkéenda gûtumîra ûciathi bweenu kûjûria mairîrîîria ja mwîrî. Îndî wendo bweenu nî bûtûme bûtumîkanagîre.

¹⁴ Tontû Waatho bunthe bûjûrîtue ndeene ya Waatho bûmwe akî, nabu nîbu bûbû: “Endaga mûtûûri waaku o ta ûrîa ûciendeete gwengwa.”

¹⁵Îndî bûkëethîrwa bûrûjaga na bûgatambûrana bwingwa ta nyomoo cia kîthaka, imenyereeni bûtîkeeje kûthirania bwingwa.

¹⁶Rîu, ndiuga ûjû: tongagîîrueni nî Roho, naabuî bûtîûjûria jarîa mwîrî jwirîragîîria.

¹⁷ Tontû mwîrî jwirîragîîria mantû jarîa Roho atîendaga nawe Roho akairîrîîria mantû jarîa mwîrî jûtîendaga. Roho na mwîrî bitîgwatanagîra; na tontû bûû, gûtî u bûmbîkia kûthithia ûrîa bûkwenda na bweenu.

¹⁸Îndî bûkëethîrwa bûtongagîrua nî Roho, rîu bûtî Waathoone kaîrî.

¹⁹Rîu mantû jarîa mwîrî jweendaga kûthithia nî jaijîwe mono, najo nîjo jaja: ûtheria na ûmaramari na kwirîrîîria ûthûngîîri

²⁰na kûromba mîrungu ya mîng'uanano na marogi, o na gûtuma ûthû na kûthanganaga na marûrû na rûriitho na mûthûûro na gûcienda na kûringanagîra nkaanja na kwathûkana

²¹na îtenûka na mbogita na kwinaga ndwîmbo irîa itîagîrîte na meeyia jangî ja mîthemba îngî ta îîu. Ndîbwîra na mma, o ta ûrîa ndaabwîrîre mbere atî antû barîa bathithagia mantû jau batîkoroona rûgai ûneneene bwa Mûrungu.

²²Îndî maciara ja Roho nîjo jaja: wendo na kûgwîrua na thîîrî na kûûmîîria na gûteethania na kûthithanîria mantû ja meega na gwîtîkania

²³na kwinyiiyia na ningî muntû kwatha mwîrî jwaawe bwega. Gûtî waatho bwa kûgiria mantû jau jatua kûthithagua.

²⁴Antû barîa barî ba Kristû Jesû nî baambîte mîîrî yaao amwe na mathûgaanio jarîa mathûûku na mairîrîîria jaayo.

²⁵Roho nîwe ûtweete ûtûûro na tontû bûû tûtongagîîrue nîwe mîtîreene yeetû.

²⁶Tûtigeeni gwikumia kana kûthanganaga kana kwiganagîîrua rûriitho.