Read KIMERU BIBLE PROTESTANT EDITION Aef 1 Bible Online

Aef 1 - KIMERU BIBLE PROTESTANT EDITION bible

Aef 1

¹ Nî ni Paûlû, ûrîa Mûrungu endere mpaa mûtûmwa wa Kristû Jesû, nkûbwaandîkîra buî atheru barîa bûrî Efeso, buî barîa bûrî eetîkua mûtûûrîreene jweenu jwa kwîthîrwa bûgwatitheenue na Kristû Jesû.

²Bûrogîa ûtugi na thîîrî kuuma kîrî Mûrungu Baaba weetû na kîrî Mwathani weetû Jesû Kristû.

³Tûkumieeni Mûrungu, Îthe wa Mwathani weetû Jesû Kristû. Nîkwîthîrwa nî tûgwatithanîtue na Kristû, nî atûtharimîte na itharimo bionthe bia kîroho birîa biumaga îgûrû.

⁴Mûrungu nî aatûthuurîre kinya mbere ya nthîgûrû yûmbwa, nîkenda twîthîrwa tûrî babatheru na tûtî na maatia mbere yaawe.

⁵Nîkenda tûgatûûra wendaniine bwaawe, Mûrungu aarî agûtua kuuma kîambîrîria atî twee aana baawe ndeene ya Jesû Kristû. Ûu nîu eendere kûringana na mûbango jwaawe.

⁶Tontû bûû, tûcokerieni Mûrungu nkaatho nîûntû bwa ûtugi bwa kûrigaria bûrîa aatweere ûtheri ndeene ya Mûtaana waawe ûmwende.

⁷ Tontû tûkûûrîtwe nî Kristû na tharike yaawe; ûû nî ta kuuga, twarekeerwa meeyia jeetû kuumania na ûtugi bwaawe bûtî na kîthimi.

⁸Ningî nîûntû bwa ûûme na ûmenyo bwaawe,

⁹Mûrungu nî aathithîrie bûrîa aathuranîrîte kûthithia, aratûmenyithia mûbango jwaawe jwa witho jûrîa aatuîte akoojûria ndeene ya Kristû.

¹⁰Mûbango jûu Mûrungu akoojûria rîrîa îgiita rîo rîongwa rîgakinya, naju nî kûringanîra biûmbe amwe, birîa birî îgûrû o na birîa birî nthîgûrû, bionthe biîthîrwe birî waathaniine bwa Kristû.

¹¹Mantû jonthe jathithagua kûringana na mûbango na ûrîa Mûrungu atuîte kuuma kîambîrîria. Mûrungu nî atûthurîre nîûntû bwa wendo bwaawe nîkenda twîthîrwa tûrî na ngwatanîro na Kristû.

¹²Tontû bûû, tuî barîa twaarî ba mbere kwîthîrwa tûrî na wîrîgîîro ndeene ya Kristû tûkumagie mwago jwa Mûrungu.

¹³Kinya buî nî bwaeere antû ba Mûrungu rîrîa bwaigîrue ntûmîîri ya mma, tayo Nteto Injega cia gûtûma bwonoka. Buî nî bwetîkîrie ndeene ya Kristû, nawe Mûrungu akîenda kwonania bûrî baawe, arabwana na rwano rwa kûbwaa Roho Ûmûtheru ûrîa weeranîri.

¹⁴Roho Ûmûtheru ûu nî wa gûtwonia atî tûkaewa rûgai rûrîa Mûrungu eerîîre antû baawe, rîrîa akeeja gûtûnenkera ûntû bûu nîkenda mwago jwaawe jûgekagîîrwa.

¹⁵Tontû bûû, kuuma rîrîa ni ndaaîgîrue nteto cia wîtîkio bweenu ndeene ya Mwathani Jesû na ûrîa bwendeete atheru bonthe,

¹⁶gûtî rîo ndaatiga gûcokeria Mûrungu nkaatho nîûntû bweenu. Nî mbûririkanaga marombeene jaakwa,

¹⁷nkîûragia Mûrungu wa Mwathani Jesû Kristû, tawe Baaba mwene ûkumio, abwee Roho ûrîa ûkabwethia baboome na abûguûrîîre bûmenye ûrîa Mûrungu akari.

¹⁸Ndombaga Mûrungu athaarîrie mathûgaanio jeenu nîkenda bûûmba kûmenya nî wîrîgîîro bûrîkû bûrîa abwîtîrîte na bûmenya kwingîa kwa itharimo birîa ekîrîte atheru baawe ûrîa kûng'ana.

¹⁹Ningî bumenye ûrîa inya yaawe îrîa înene nkûrûki îrîa îkûrita ngûgî ndeene yeetû tuî barîa twîtîkîtie. Inya îîu îkûrita ngûgî ndeene yeetû no îmwe na

²⁰ îrîa aatumîîre rîrîa ariûkîrie Kristû kuuma kîrî akuû na aramûkarithia nthî rûteere rwaawe rwa ûrîo kûu îgûrû.

²¹Kûu nîku Kristû athûngûûri îgûrû rîa anene barîa barî îgûrû, na athani na moonene na mainya jonthe, na barîa bonthe baathanaga gûkû îgiiteene rîrî tûrî kana rîrîa rîkeeja.

²² Mûrungu nî eekîte into bionthe waathaniine bwa Kristû na amweethia Mwathani wa into bionthe nîûntû bwa ûguni bwa kanisa.

²³Kanisa nî mwîrî jwa Kristû, na yûjûrî Kristû ûû ûjûri into bionthe gûntû kunthe.