Read KIMERU BIBLE PROTESTANT EDITION Aef 2 Bible Online

Aef 2 - KIMERU BIBLE PROTESTANT EDITION bible

Aef 2

¹ Rîrîa buî bwaarî baakuû nîûntû bwa îrema na meeyia jeenu, Mûrungu nî aabwere ûtûûro.

²Îgiita rîu buî bwathingataga njîra inthûûku cia nthîgûrû îîjî. Bwaathîkagîra mûnene wa mainya jarîa jathanaga manganyoni, nayo nî roho îthûûku îrîa yathaga antû barîa batîathîkagîra Mûrungu.

³O kinya tuî twinthe nîu twakari tabo, twatûûraga kûringana na mairîrîîria jeetû, tûkîthithagia o ûrîa mîîrî yeetû na mathûgaanio jeetû jeendaga. Tontû bûû, kinya tuî mûtûûrîreene jwa kîûmuntû twakari o ûmwe na bangî; twaarî ba gûkanûkua kuumania na mûthûûro jwa Mûrungu.

⁴Îndî nîûntû bwa kîaao kîa Mûrungu ûrîa kingîîte na tontû bwa wendo bwaawe bûbûnene bûrîa aatwendere nabu,

⁵o rîrîa tuî twakuîte nîûntû bwa îrema rîeetû, Mûrungu nî aatûmîre tûgîa ûtûûro amwe na Kristû. Ûtugi bwa Mûrungu nîbu bûtûmîte bwonokua.

⁶Mûrungu nî aatûriûkîrie amwe na Kristû Jesû na atûkarithia nthî amwe nawe kûu îgûrû nîûntû tûrî ndeene ya Kristû Jesû.

⁷Aathithîrie ûu nîkenda akamenyithania îgiita rîrîa rîkeeja, ûrîa ûtugi bwaawe bûrîa bûrî bûbwingî atweete ndeene ya Kristû Jesû.

⁸Tontû bwonoketue nîûntû bwa ûtugi bwa Mûrungu bûgwîtîkia. Bûtîonoketue nîûntû bwa mathithio jeenu îndî nî kîewa kîa Mûrungu,

⁹nîkenda gûtîkagîte muntû kinya ûrîkû wîîja gwikumîria ûntû bûû.

¹⁰Nî Mûrungu ûtûmîte twîthîrwa tûkari ûjû tûkari, ka twombîrwe ndeene ya Kristû Jesû nîkenda tûkaritaga ngûgî injega irîa Mûrungu aathuranîrîte o mbere.

¹¹Antû barîa bûtî Ayahudi, ririkaneni ûrîa buî bwakari karaaja. Bweetagwa antû barîa batîtaanagwa nî Ayahudi barîa baciîtaga “babataane” nîûntû bwa ûrîa bathithagia mîîrî yaao.

¹²Îgiita rîu buî bûtarî na ngwatanîro na Kristû; bûtaarî bamwe ba antû ba Mûrungu tabo Aisraeli barîa Mûrungu aathuurîte. Buî bûtatarîri gîchunchîîne kîa îrîîkanîro birîa Mûrungu eerîîrîte antû baawe. Bwatwîre nthîgûrûûne îîjî bûtî na wîrîgîîro na bûtiijî Mûrungu.

¹³Îndî nîûntû bwa kûgwatithanua na Kristû Jesû, bwî barîa mbere bwaarî kûraaja nî bûreeti akuî na Mûrungu nîûntû bwa tharike ya Kristû.

¹⁴Tontû Kristû nîwe ûreetete thîîrî kîrî tuî, atweethia gîntû kîmwe tuî Ayahudi na antû barîa batî Ayahudi. Tontû bwa gûkua kwaawe mûtharabeene, nî aatharîrie rûthingo rwa ûthû rûrîa rwatwathûranîte.

¹⁵ Ningî aarathiria mawaatho na maathana rîrîa aakuîre mûtharabeene nîkenda oomba muntû ûmwe ûmwerû kuuma kîrî bau baîrî, na njîra îîu aarareeta thîîrî.

¹⁶ Tontû bwa gîkuû kîaawe mûtharabeene, Kristû nî aathirîrîe ûthû aragwatithania Ayahudi na barîa batî Ayahudi na Mûrungu.

¹⁷ Rîu, Kristû nî eejîre na aratûmîîria Nteto Injega cia thîîrî kîrî antû bonthe; aratûmîîria kîrî buî antû barîa batî Ayahudi na kîrî Ayahudi.

¹⁸Tontû bûû, baatuî twinthe, Ayahudi o na antû barîa batî Ayahudi, twoomba gûkwîîrîria Baaba ndeene ya Roho ûmwe.

¹⁹Rîu nandî, buî antû barîa batî Ayahudi bûtî eeji kana mpinga kaîrî. Buî bûrî arîokua o ûmwe na atheru, na bûrî ba mûciî jwa Mûrungu.

²⁰Kinya buî bwaaki îgûrû rîa mûsingi jûrîa jwakîrwe nî atûmwa na iroria, Kristû Jesû arî iiga rîa koona.

²¹Kristû nîwe ûgwatithanîtie mwako junthe jwaa gîntû kîmwe na nîwe ûtûmaga jûkûra na jwaa kîûrû gîkîtheru nîûntû bwa Mwathani.

²²Kinya buî bûgwatithenue nawe na nî bûgwakwa bûrî amwe na bangî bonthe nîkenda bûaa gîtûûro kîa Mûrungu ndeene ya Roho waawe.