Read KIMERU BIBLE PROTESTANT EDITION Aef 3 Bible Online

Aef 3 - KIMERU BIBLE PROTESTANT EDITION bible

Aef 3

¹Tontû bwa gîtûmi kîu, ni Paûlû ntheeki ncheera nîûntû bwa Kristû Jesû, nî nkûbûrombera kîrî Mûrungu buî antû barîa batî Ayahudi.

²Ndîrîgîîra atî nî bwigîtue mantû ja ûtugi bûrîa Mûrungu anenkerete bwa kûrita ngûgî îîjî nîkenda buî bûgunîka.

³Mûrungu nî angwuûrîre mûbango jwaawe jwa witho. Nî mpaandîkîte na ûkuî mantû ja witho bûu.

⁴ Bwaathoma ûrîa mpaandîkîte, bûkamenya ûrîa nciûkîri nî witho bûû bwa Kristû.

⁵Mantû jaja jataamenyithanua kîrî nthukî irîa ikûrûkîte îndî nandî Mûrungu nî aguûrîte jo kîrî atûmwa na kîrî iroria na njîra ya Roho Ûmûtheru.

⁶Nabu witho bungwa nî bûbû: tontû bwa Nteto Injega, antû barîa batî Ayahudi barî na rûgai o ûmwe na Ayahudi mantûûne ja itharimo bia Mûrungu na bonthe nî baete irûngo bia mwîrî jûmwe na baagaîrwa wîrane bûrîa Mûrungu aejanîte ndeene ya Kristû Jesû.

⁷Nî ni ndaetherue mûtambia wa Nteto Injega kûringana na kîewa kîa ûtugi bwa Mûrungu bûrîa ampeere kuumania na inya yaawe.

⁸Kinya këethîra ndî ûmûnini mono nkûrûki ya atheru bangî bonthe, nî ni Mûrungu aeere ûtugi bwaawe nîkenda ngatûmagîîria antû barîa batî Ayahudi mantû ja ûtonga bwa Kristû bûrîa bûtîthiraga.

⁹Ningî nîkenda ntûma antû bonthe bamenya mûbango jwa witho bwa Mûrungu ûrîa wombîre into bionthe. Mûrungu mûûmbi wa into bionthe, nî aithîte witho bûu kuuma kenya,

¹⁰nîkenda na njîra ya kanisa ûûme bwa Mûrungu bûrîa bûrî bwa mîthemba îmiingî bûkamenyeka nî moonene na athani ba îgûrû ûrîa bûkari îgiiteene rîrî.

¹¹Ûu nîu yerekeeria rîa Mûrungu rîa kuuma kenya na kenya rîakari rîrîa oojûrîrie na njîra ya kwîja gwa Kristû Jesû Mwathani weetû.

¹²Rîu tuî nîûntû bwa ûrîa tûgwatithenue na Kristû na ûrîa tûmwîtîkîtie, twoomba gûkwîîrîria Mûrungu tûtîgûkîra.

¹³Tontû bûû, ndîbûûria bûtîgaîtîjîre nîûntû bwa mîthangîko îrîa nkwona nîûntû bweenu nîkwîthîrwa mantû jau jarîthithîka nîkenda bûgunîka.

¹⁴Tontû bûû, nî ngûturîria Baaba maru,

¹⁵ûrîa weejaga biûmbe bionthe birîa birî gûkû nthîgûrû na birîa birî îgûrû mûkariî jwaabio.

¹⁶Mberencaga Mûrungu, o ta ûrîa ûtonga bwa ûkumio bwaawe bûkari, abûûjûrie inya ndeene yeenu na njîra ya Roho waawe,

¹⁷na atî Kristû atûûrage nkoroone cieenu tontû bwa gwîtîkia. Ndîromba bwîthîrwe bûaandi na bûriki mûsingiine jwa wendo.

¹⁸Ningî nîkenda buî o amwe na atheru bonthe bûkamenya ûrîa wendo bwa Kristû bwaramîte na bwareea na ûrîa bwitîtie bwa îgûrû na ûrîa bworokerete.

¹⁹Nîkenda bûkamenya wendo bwa Kristû bûrîa bûtîûmba kûmenyeka mantû jaabu buru kuuumania na ûmenyo bwa nthîgûrû nîûntû bûu bwîthîrwe bûûjûrîtwe nî mantû jonthe ja Mûrungu.

²⁰Nandî rî, Mûrungu ûrîa ûûmbîkia kûthithia na inya yaawe mantû jamanene ndeene yeetû nkûrûki ya jarîa tûmûrombaga, o na kinya jarîa tûthûgaanagîria,

²¹Mûrungu ûu arokumua ndeene ya kanisa na ndeene ya Kristû Jesû nthukîîne cionthe kenya na kenya. Amen.