Read KIMERU BIBLE PROTESTANT EDITION Aef 4 Bible Online

Aef 4 - KIMERU BIBLE PROTESTANT EDITION bible

Aef 4

¹Tontû bûû, ûûni ndî mûthaîke nîûntû bwa gûtumîkîra Mwathani, ndîbwerenca bûtûûrage kûringana na mwîto jûrîa bwetîrwe nî Mûrungu.

² Bwîthagîrwe burî na kwinyiiyia na ûbooreru na ûûmîîria mantûûne ja antû bangî na bûkîrekanagîra bûjûrîtwe nî wendo.

³Ciûmagieni bwîthagîrwe bûrî na ngwatanîro îrîa yumanagia na Roho na bûrûmagîîre thîîrî îrîa îbweethetie gîntû kîmwe.

⁴Kûrî na mwîrî jûmwe na Roho ûmwe, o ta ûrîa buî bwetîîrwe wîrîgîîro bûmwe nî Mûrungu.

⁵Mwathani nî ûmwe na wîtîkio nî bûmwe na ûbatithio nî bûmwe;

⁶Mûrungu no ûmwe na nîwe Ithe weetû twinthe na ûrîa wathaga antû bonthe. Ningî nowe ûritaga ngûgî arî ndeene ya antû bonthe na into bionthe.

⁷O ûmwe weetû nî aei kîewa kûringana na ûrîa Kristû amûnenkerete.

⁸ O ta ûrîa Maandîko jaugîîte: “Rîrîa aitîrie îgûrû buru, nî atongerîrie atae; na araa antû biewa.”

⁹Rîu gûkuugwa: “Nî aitîrie îgûrû,” nî atîa gûkwenda kuugwa? Kûrîenda kuugwa ûjû: mbere mma aambîre kwînama nthîgûrû buru naarîa kworokerete.

¹⁰O ûu wengwa wenamîre, nowe waitîrie îgûrû mono nîkenda eethîrwa arî gûntû kunthe.

¹¹Nîwe waeere antû biewa; bamwe arabaethia atûmwa, na bangî iroria, na bangî atûmîîria ba Nteto Injega, na bangî arîîthi ba antû na bangî aritani.

¹²Aathithîrie ûu nîkenda athuranîra atheru bonthe nîûntû bwa gûtumîkîra Mûrungu na gwaka mwîrî jwa Kristû.

¹³Rîu nîrîo tûkeethîrwa tûrî na ngwatanîro wîtîkioone na ndeene ya kûmenya Mûtaana wa Mûrungu; na twee antû agima wîtîkioone ta ûrîa Kristû akari.

¹⁴Rîu, tûtîîthîrwa tûkari ta twaana tûnyi kaîrî, tûkîgeragwa ndee na ndee na kûgûrûkua nî ruuo rwa mooritani ja aritani ba ûrongo barîa bangaratanagia antû bangî na nteto cia waayia.

¹⁵Îndî tuî, twaragia ûûma tûrî na wendo tûgîkûraga na njîra cionthe ndeene ya Kristû, ûrîa ûrî mûtongeeria weetû.

¹⁶ We nîwe ûtûmaga irûngo bionthe bia mwîrî bigwatithanua amwe nîkenda o kîrûngo gîteethagia mwîrî. Rîrîa o kîrûngo gîkûrita ngûgî yaakîo ta ûrîa kwagîrîte, mwîrî junthe nî jûkûraga na jûgaciaka na njîra ya wendo.

¹⁷Tontû bûû, nî nkûbwerenca riîtweene rîa Mwathani bûtîgete na mbere gûtûûra ta ûrîa antû barîa batî Ayahudi batûûraga. Mathûgaanio jaao jaeete ja ûtheri,

¹⁸na ûmenyo bwaao bweethîrwa bûrî muundu mûtheri. Bo barî kûraaja na mûtûûrîre jûrîa Mûrungu aeejanaga nîûntû bwa kûrigwa kwaao na ningî nîûntû bwa ûûmo bwa nkoro ciaao.

¹⁹Tontû bwa kwaga nthoni kwaao, baitonyithagia mantûûne ja ûmaramari na bakathithia mantû jonthe jamathûûku jarîa jarî na nthao.

²⁰Îndî buî tîu bwaritanîrwe mantûûne jegiî Kristû.

²¹Nî nkwîrîgîîra atî nî bwaigîrue nteto ciaawe na bûraritanwa ûrîa ûûma bûkari ndeene ya Jesû.

²² Tontû bûû, tiganeni na mîîtîre yeenu ya karaaja, tayo ûmuntû bweenu bûrîa bûkûrû bûrîa bweenyangîtue nîûntû bwa kûrûmîrîra mairîrîîria jamathûûku ja waayia.

²³Erûyieni mathûgaanio jeenu na nkoro cieenu.

²⁴ Jûkieni mûkariî jûmwerû jwa muntû ûrîa ûûmbi ang'uanene na Mûrungu jûrîa jûcionanagia ndeene ya waagîru na ûtheru bwa mma.

²⁵ Bûgácokeeni kwaragia ûrongo kaîrî. O muntû nî aaragîrie ûrîa ûngî ûûma, nîûntû twinthe tûrî îrûngo bia mwîrî jwa Kristû.

²⁶ Bûkëeja kûthûûra, bûkarekeni mûthûûro jweenu jûtûma bûthithia meeyia na ningî bûkáreka riûa rîthûa bûthûûri.

²⁷Bûkáeni Nkoma kaanya.

²⁸Muntû ûrîa ûraiyaga, akáiya kaîrî, îndî nî ambîrîrie kûritaga ngûgî injega nîkenda oona gîntû gîa kwaa barîa barî na ûbatu.

²⁹Nteto inthûûku ikoroeja kwigîîgua ciumîte kîrî buî; îgiita rîonthe rwaria rweenu nî rwîthagîrwe rûrî rwa kûguna na rûrîa rûkoomba gwaka na gûteethia bangî, nîkenda barîa bakarwigua bongagîîrwe ûtugi bwa Mûrungu.

³⁰Bûkáthûrieni Roho Ûmûtheru wa Mûrungu nîûntû nîwe rwano rwa Mûrungu kîrî buî rwa kûbwonia atî bûrî baawe, na nîwe kîrikithia kîa atî ntukû îkeeja rîrîa Mûrungu akabûkûûra.

³¹Tontû bûû, tiganeni na marûrû na mûthûûro na gûkágîa ûthû kana mateta kana irumi gatîgatîîne keenu.

³² Kareni bûrî ba nkoro injega bûkiigagîîrua bangî kîaao na o muntû nî arekagîre ûngî o ta ûrîa Mûrungu abûrekeere ndeene ya Kristû.