Read KIMERU BIBLE PROTESTANT EDITION Aef 5 Bible Online

Aef 5 - KIMERU BIBLE PROTESTANT EDITION bible

Aef 5

¹Nîkwîthîrwa buî bûrî aana babeende ba Mûrungu, geragieni kûthithia tawe.

² Tûûrageni bweendene o ta ûrîa Kristû aatwendere, na aracieejana nîûntû bweetû arî kîgongwana gîkûeera bûbwega na gîa kûgwîria Mûrungu.

³Nîkwîthîrwa bûrî atheru ba Mûrungu, bûkarekeni mantû ja ûthûngîîri kana ûmaramari kana mantû ja îtenûka jagwetwa gatîgatîîne keenu.

⁴Ningî bûtîbuîrîte kwaragia nteto cia rûko kana waa, kana cia rûûgo; mantû jau jatîbuîrîte kûgwetwa gatîgatîîne keenu. Nteto irîa ciagîrîte kwaragua gatîgatîîne keenu nî cia gûcokagîria Mûrungu nkaatho.

⁵Menyeni bwega atî gûtî mûthûngîîri kana mwagi nthoni kana muntû ûmûkoroku ûkoroona rûgai Ûneneene bwa Kristû na bwa Mûrungu. Tontû ûkoroku nî ûmwe na kûromba mîrungu ya mûng'uanano.

⁶Bûgeetîkîîrieni kwaîrua nî muntû kinya ûrîkû na mantû ja ûtheri. Tontû mantû ta jau nîjo jatûmaga mûthûûro jwa Mûrungu jwîjîîra bonthe barîa batîmwathîkagîra.

⁷Tontû bûû, bûkagwatanîreni nabo buru,

⁸nîûntû mbereene, buî bwaarî muunduune, îndî nandî buî bûrî weerûûne nîûntû bwa Mwathani. Tûûrageni ta aana ba weerû.

⁹Nîkwîthîrwa maciara ja weerû nî kûthithia mantû jonthe jameega na jamagîru na mantû ja mma.

¹⁰Ciûmieni bûmenye mantû jonthe jarîa Mwathani eendaga.

¹¹Bûkagwatanîreni na antû barîa bathithagia mantû jarîa jatîagîrîte ja muundu îndî jaumagîrieni weerûûne.

¹²Tontû mantû jarîa bathithagîria withoone nî nthao kinya kûjagweta.

¹³Îndî mantû jonthe jarîa jaraumîrua weerûûne, nî jamenyekanaga carûrûkû ûrîa jakari,

¹⁴nîûntû o ûntû bunthe bûrîa bûmagîrua weerûûne nî bweejaga weerû. Nîkîo Maandîko jakuuga: “Ûkîîra gwe ûmami, ûkîîra uume kîrî akuû, Kristû nawe agakûmûrîkîra.”

¹⁵Menyagîîreeni mîîtîre yeenu ûrîa bûgûtûûra. Bûgatûûrageni ta biaa îndî tûûrageeni ta antû baboome.

¹⁶ Tumîreni îgiita rîrî bûrî narîo bwega nîûntû ntukû iji tûrî nî imbîî.

¹⁷Tontû bûû, bûkaaeni biaa îndî menyeni ûrîa Mwathani eendaga.

¹⁸Bûkórogitua nî ndibei, nîûntû mantû jau ja mbogita nîjo jathûkagia mûtûûrîre jwa muntû, îndî ûjûrweni nî Roho Ûmûtheru.

¹⁹ Aranagîrieni na nteto cia Zaburi na ndwîmbo cia kwinîra Mûrungu na ndwîmbo cia kiroho; bûkiinaga na gûkumia Mwathani bûgîcokagia nkaatho nkoroone cieenu.

²⁰Cokagîrieni Mûrungu Baaba nkaatho îgiita rîonthe riîtweene rîa Mwathani weetû Jesû Kristû nîûntû bwa mantû jonthe.

²¹Karageni bûkinyiagia o muntû kîrî ûngî nîûntû bwa ûrîa bûtîîaga Kristû.

²² Eekûrû, inyiagieeni kîrî akûrû beenu o ta ûrîa bwinyiagia kîrî Mwathani.

²³Tontû mûkûrû nîwe ûrî na Waatho kîrî mwekûrû waawe, o ta ûrîa Kristû arî na Waatho kîrî kanisa. Nawe Kristû nî Mwonokia wa kanisa, na kanisa nî mwîrî jwaawe.

²⁴O ta ûrîa kanisa inyiagia kîrî Kristû, o ûu nou eekûrû babuîri kwinyiyagia kîrî akûrû baao mantûûne jonthe.

²⁵ Naabuî akûrû, endageni eekûrû beenu o ta ûrîa Kristû eendere kanisa na aracieejana arî kîgongwana nîûntû bwaayo.

²⁶Aathithîrie ûu nîkenda akatheria kanisa na amîathûrîra Mûrungu nyuma ya kûmîtheria na rûûjî na rûteto.

²⁷Aathithîrie ûu nîkenda aithuurîra kanisa îrîa îrî na ûkumio, na îtî na kagi kana îkûnjari kana gaatia kinya karîkû, nîkenda îtûûrage îrî întheru na îtî na kagi kinya karîkû.

²⁸Ûu nîu akûrû babuîrîte kwenda eekûrû baao o ta ûrîa beendeete mîîrî yaao. Ûrîa weendeete mwekûrû waawe nîwe ûcieendaga wengwa.

²⁹Tontû gûtî muntû ûthwîre mwîrî jwaawe îndî ûrîa athithagia nîka ajûreraga na akajûmenyeera. Ûu nîu Kristû amenyagîîra kanisa,

³⁰nîûntû tuî tûrî irûngo bia mwîrî jwaawe.

³¹ O ta ûrîa Maandîko jakuuga, “Tontû bûû, ntomûrûme agatiga îthe na ng'ina, agwatane na mwekûrû waawe, nabo bobaîrî bakaa mwîrî jûmwe.”

³²Kûrî na ûûma bwiithi ndeene ya Maandîko jau, naani ndiuga atî ûntû bûu bûrîarîîria mantû jegiî Kristû na kanisa.

³³Îndî amwe na jau ni ndiuga ûjû: O mûkûrû o mûkûrû nî eendage mwekûrû waawe o ta ûrîa aciendeete, na mwekûrû nî atîîage mûkûrû waawe.