Read KIMERU BIBLE PROTESTANT EDITION Aef 6 Bible Online

Aef 6 - KIMERU BIBLE PROTESTANT EDITION bible

Aef 6

¹ Naabuî aana, nîûntû bûrî ba Mwathani, athîkagîreeni aciari beenu ta ûrîa kwagîrîte.

² “Tîîageni abaagu na nyakwe,” rîrî nîrîo rîathana rîa mbere rîrîa rîrî na wîrane atî,

³“nîkenda bûtûûra na wega, na bûtûûra îgiita rîrîraaja nthîgûrûûne.”

⁴ Naabuî aciari, bûkathûûragieni aana beenu îndî barerageeni bûkîbonagîîria gûtûûra na nthoni injega na mooritani ja gîkristû.

⁵ Naabuî nkombo, athîkagîreeni athani beenu ba gûkû nthîgûrû bûkîbatîîaga na bûkîbagwatagîra nthoni bûtî na waayia nkoroone, ta Kristû bûgûtumîkîra.

⁶Bûkaathithagieni ûû tî ûntû atî nî babûtegeete nîkenda bûciendithia kîrî bo, îndî riteeni ngûgî bûcieejanîte nkoroone ta bûrî nthûûmba cia Kristû tontû ûu nîu Mûrungu eendaga.

⁷Ciûmieni kûrita ngûgî ta Mwathani bûkûritîra na tî ta antû bûkûritîra.

⁸Thithagieni ûu bûkîmenyaga atî wega bûrîa muntû athithagia nîbu bûgatûma aeewa kîewa nî Mwathani, eethîrwa we nî nkombo kana nî muntû ûrî na ûciathi.

⁹ Naabuî aathi barîa bûrî na nkombo, ithithagîrieni o ûu na bûciûmagîîrie bûtîkwimakia. Ririkanageeni atî kinya buî bûrî na mwathi weenu o ûrîa wengwa ûrî mwathi waao na akaraga îgûrû, na atîthuragia antû kûringana na ûrîa bakari.

¹⁰Mûthieene, gîeeni inya nîûntû bwa kûgwatithanua na Mwathani na kuumania na inya yaawe îrîa îrî înene.

¹¹Ikundîkeeni mathaga ja ndwaa jarîa Mûrungu abweete nîkenda bûûmba kûrwaa na waayia bwa Nkoma.

¹²Nîkwîthîrwa tûtîkûrwaa na antû îndî tûrîrwaa na mbûûtû cia Nkoma na tûkarwaa na mainya, na moonene ja nthîgûrû îîjî jarîa jaathanaga muunduune, na tûkarwaa na mbûûtû cia roho inthûûku irîa îrî îgûrû.

¹³Tontû bûû, ikundîkeni mathaga ja ndwaa ja Mûrungu nîkenda rîrîa ntukû îrîa mûnthû akabwithûkîra bûkoomba kûmûmîîria na bwathiria ndwaa, bûkoomba gûciaanda bwega.

¹⁴ Tontû bûû, ciaandeni bûbwega! Ikundîkeeni kauna keenu ûûma bûrî mûcibi, na waagîru bwîthîrwe bûrî îthaga rîa gûkaria kîbara.

¹⁵ Bwîkîre wîru bwa gûtûmîîria Nteto Injega cia thîîrî bûrî iraatû.

¹⁶Ningî bûgwate wîtîkio bûrî rong'o ya kuigîra mîgwî ya mwanki ya ûrîa mûûî.

¹⁷ Jûkieni wonokio bûrî nkobia yeenu ya îthaga bwîkîre mûtwe na rûteto rwa Mûrungu naru rûrî rûchiû rwa Roho Ûmûtheru.

¹⁸Rombageni îgiita rîonthe na inya ya Roho. Bûkîthithagia mantû jau, rombageni ûtethio îgiita rîonthe kuuma kîrî Mûrungu. Tontû bûu bûgáitîjîra; rombagîreni atheru bonthe îgiita rîonthe.

¹⁹Ndombagîreni kinya ni nîkenda Mûrungu ampejage rûteto na inya ya kwaragîria antû witho bwa Nteto Injega mpûmîîrîtie.

²⁰Nteto iu Injega nîcio itûmîte mbîthîrwa nthaîki ncheera. Tontû bûû, ndombereni nîkenda nkomba gûtûmîîria ndî na ûchamba o ta ûrîa kwagîrîte.

²¹ Tukiko, mûtaana wa baaba ûmweende, ûrîa ûrî nthûûmba mbîtîkua ya Mwathani, akabûmenyithia mantû jaakwa jonthe nîkenda bûkamenya ûrîa nkari.

²²Ndîmûtûma kîrî buî nîkenda akabûmenyithia mantû jeetû na nîkenda abwîkîra inya nkoroone cieenu.

²³Ataana na aarî ba baaba, bûrokara na thîîrî na wîtîkio amwe na wendo kuuma kîrî Mûrungu Baaba na Mwathani Jesû Kristû.

²⁴Ûtugi bwa Mûrungu bûrokaraga na bonthe barîa beendeete Mwathani weetû Jesû Kristû na wendo bûrîa bûtîthiraga.