Read KIMERU BIBLE PROTESTANT EDITION Afi 2 Bible Online

Afi 2 - KIMERU BIBLE PROTESTANT EDITION bible

Afi 2

¹Mûtûûrîre jweenu ndeene ya Kristû nî jûtûmaga bûkagîa inya na wendo bwaawe bûgatûma bûborera. Ningî bûrî na ngwatanîro na Roho na nî bwiganagîîrua kîaao na bûkomanîîria.

²Tontû bûû tûmeni kûgwîrua gwaakwa kûûjûre, na njîra ya gûkara bûrî na mworoto jûmwe na bûrî na wendo o bûmwe na bûrî na kwiganua gûkûûjûru mma na yerekeeria rîmwe.

³Bûkáthithia ûntû kinya bûrîkû muntû agiicwîra ûntû bwaawe wengwa kana bûkîenda wikumia bwa ûtheri. Îndî thithagieni mantû jonthe bwinyiîtie na o muntû oonage ûngî arî ûmwega nkûrûki yaawe wengwa.

⁴Gûkágîta muntû ûcwaa kûgunîka we wenka îndî nî acwaage ûrîa kinya bangî bagunîka.

⁵Mathûgaanio jeenu nî jeethîrwe jang'uanene na jarîa Kristû Jesû aarî najo:

⁶We, kuuma kambîrîria, aarî Mûrungu, îndî atairîrîîria kûng'anana na Mûrungu, bûrî ûntû bwa kûrûîrwaa na inya.

⁷Ûrîa aathithîrie na kwenda kwaawe wengwa, nîka aatiganîre na jau jonthe, aracieethia nkombo, araciarwa ang'uanene na antû.

⁸Nî ainyiîrie na araathîka aathîkîre mwanka arakinya kûûragwa, nakîo nî gîkuû kîa mûtharaba.

⁹Tontû bûû, Mûrungu nî amûthûngûûrîre mono, na aramwaa riîtwa rîrîa rîkûrûkîte mariîtwa jangî jonthe.

¹⁰ Nîkenda biûmbe bionthe birîa birî îgûrû na birîa birî nthîgûrû ona birîa birî ndeene ya nthîgûrû, bigaturia maru mbere ya Jesû,

¹¹na o muntû wonthe aumbûre atî Jesû Kristû nî Mwathani, nîkenda Mûrungu Baaba akumagua.

¹²Tontû bûû, acoore baakwa, kinya nandî athîkageni mono îgiiteene rîrî ndî kûraaja naabuî o ta ûrîa bwambathîkagîra rîrîa ndaarî amwe naabuî. Riteeni ngûgî bûrî na gûkîra na kwinaina nîûntû bwa gûcwaa kwonokua kweenu.

¹³Tontû Mûrungu nîwe ûkûrita ngûgî arî ndeene yeenu nîkenda atûma bwenda na bûthithia mantû kûringana na kwenda kwaawe.

¹⁴Thithagieni mantû jonthe bûtîkûnung'una kana gûteta,

¹⁵ nîkenda bûkaa antû batî na îgi na barîa batîthithagia mantû jamaaî. Ningî bwee aana ba Mûrungu batî na îatia rîrîa bûtûûrenie nthîgûrûûne îîjî ya meeyia amwe na antû eeyia. Buî bûkari ta weerû kîrî bo bûkîthaaraga ta njota cia îgûrû bûrî kîrî bo.

¹⁶Baeejageni rûteto rûrîa rûreetaga ûtûûro. Bwathithia ûu, nkoona gîtûmi kîa gwikumia ûntûûne bweenu mûthenya jûrîa Kristû akeeja. Tontû gûkoonekana atî wîru bwaakwa amwe na ngûgî yaakwa gatîgatîîne keenu îtaarî ya ûtheri.

¹⁷Kinya tharike yaakwa îkaa ya gwîtûûrwa îrî ta kîewa îgûrû rîa kîgongwana kîa wîtîkio bweenu kîrîa bûkûritîra Mûrungu, ûûni nkagwîrua na mbigue nkerû ndî ûmwe naabuî.

¹⁸O ûu kinya buî nî bûbuîrîte kûgwîrua na kwigua nkerû amwe naani.

¹⁹Nî nkwîrîgîîra ndeene ya Mwathani weetû Jesû atî ngatûma Timotheo rua kîrî buî nîkenda rîrîa agacoka amenyithia ûrîa bûrî, ngîa inya na ngwîrua.

²⁰Nîwe wenka ûkari taani ûntûûne bwa kwinogia nîûntû bweenu.

²¹Bangî bonthe nî mantû jaao akî baicwagîra, na tî mantû ja Jesû Kristû.

²²Buî nî bwijî ûrîa Timotheo arî ûmwega. We amwe naani tûritîte ngûgî amwe nîûntû bwa Nteto Injega tûkari ta mûtaana na îthe.

²³Ûu nîwe mbîrîgîîrîte gûtûma îgiita rîtî kûraaja ndathiria kûmenya ûrîa mantû jaakwa jagakara.

²⁴Ningî nî mbîrîgîîrîte atî nkeeja kîrî buî o rua, Mwathani eenda.

²⁵Nî mboneete atî nî mbagîri gûtûma mûtaana wa baaba Epafrodito, ûrîa tûritanagîria ngûgî nawe na tûgateethania ndweene na ningî nowe ûrîa bwatûmîte kîrî ni nîkenda anteethagîîria moobatuune jaakwa.

²⁶Akarîte akiirîragîîria kûbwona bwinthe na arî na kwithikîîra nî ûrîa amenyete atî nî bwaigîrue nî ajîtue.

²⁷Nî mma nî aajîtue mono na aarî akuî gûkua. Îndî Mûrungu nî aamwigîîrue kîaao, na tî we wenka akî, îndî kinya ni nî aambigîîrue kîaao nîkenda ntîkeeje kûgwatwa nî kîeba gîkînene nkûrûki.

²⁸Tontû bûû, nî nkwenda kûmûtûmanga na mpwîî kîrî buî, nîkenda bwamwona kaîrî bûgwîrua, o na kinya ni kîeba gîaakwa kîthire.

²⁹Tontû bûû mûgwateeni ûgeni ndeene ya Mwathani bûgwîrîtue mono. Tîîageeni antû bangî bonthe barîa bakari tawe,

³⁰nîkwîthîrwa aratigeerie beco akua akîrita ngûgî ya Kristû nîkenda aampa ûtethio bûrîa buî bûrîngîgûmpa.