Read KIMERU BIBLE PROTESTANT EDITION Afi 3 Bible Online

Afi 3 - KIMERU BIBLE PROTESTANT EDITION bible

Afi 3

¹Nkîthiria ataana na aarî ba baaba, ndîbwîra gwîragueni ndeene ya Mwathani. Ntîkwona jûrî mûrigo gûcokera mantû jarîa ndabwaandîkîrîte mbere nîûntû jakaa ûtethio kîrî buî.

²Imenyagîîreni kîrî antû barîa bathithagia mantû jamathûûku, kurû iu, barîa baitemangaga mîîrî yaao.

³Tuî nî tuî tûrî na rûtaano rwa mma na tî bo, tontû nî tuî tûthaathagia Mûrungu tugîîteethagua nî Roho waawe na tûkagwîrua nîûntû bwa ngwatanîro îrîa tûrî nayo na Kristû Jesû na tûtîrîgagîîra mantû ja mwîrî.

⁴Nkenda guikumia nîûntû bwa mantû ja mwîrî, ndaikumia. Ningî këethîra kûrî we ûthûgaanagia atî oomba gwikumîria mantû ja mwîrî mono, nî ni mbwîrîte gwikumia nkûrûki.

⁵ Nîkwîthîrwa ûûni ndataanîrwe ntukû ya inyanya nyuma ya ndîgûciarwa na ndî Mûisraeli. Ndî wa mwîrîga jwa Benjamini na ndî Mûhibirania gûciarwa. Mantûûne ja kûûjûria Mawaatho ûûni ndî Mûfarisayo.

⁶ Ningî nî ndaarî na wîru bwa kûthangîkia antû ba kanisa. Mantûûne ja waagîru bûrîa bwonoraga nîûntû bwa kûûjûria Mawaatho, ntoonwa ndî na îatia kinya rîmwe.

⁷Îndî mantû jarîa ndatwîre kwona jarî na ûguni, nandî nîjo ncokeete kwona atî jatî na bata kinya aniini nîûntû bwa Kristû.

⁸Tî bûu bunka; îndî ndîona mantû jonthe jarî ja ûtheri akî nîûntû bwa ûntû bûngî bûbwega nkûrûki tabu kûmenya Kristû Jesû Mwathani waakwa. Tontû bwaawe nî mbîtîkîîrîtie gûtigana na mantû jonthe nîûntû jau jonthe njoonete jarî nkorogoncha nîkenda nkara na Kristû wenka

⁹na ngwatanîre nawe buru. Ûûni ntîkwenda kaîrî waagîru buumanîtie na kwathîkîra Waatho tontû nandî ndî na waagîru bûrîa bûûmanîtie na gwîtîkia Kristû; waagîru buumîte kîrî Mûrungu na bwîrîgîrîte wîtîkio akî.

¹⁰Ûntû bûrîa nkwenda, nî kûmenya Kristû na inya ya kûriûka kwaawe na ngwatanîre nawe mîthangîkoone yaawe na ng'uanane nawe ndeene ya gîkuû kîaawe,

¹¹mbîrîgîîrîte atî kinya ni nkariûkua mpuume kîrî akuû.

¹²Ntîkuuga nî mpûûmbanîte ûntûûne bûu, kana nî mpeete ûmwagîru buru. Îndî ganciûmîtie nîkenda mpeewa kîewa nîûntû Kristû Jesû nî ampethetie waawe.

¹³Ataana na aarî ba baaba, nî mma ntîkuuga atî nî ngweete kîewa gîkî îndî ûntû bûrîa nthithagia nî bûbû: ka mbûragîrua nî mantû jarîa jakûrûkîte na ngaciûmia gûkinyîra mantû jarîa jarî mbere yaakwa.

¹⁴Tontû bûû, ni ndî rwîroone mbûgîîte nîkenda nkinya mûthia jwa ntangurutano na mpeewa kîewa, nakîo nî mwîto jwa Mûrungu. Mwîto jûu nî ûtûûro bûrîa bûrî îgûrû ndeene ya Kristû Jesû.

¹⁵Tuî barîa tûriki wîtîkioone nî tûbuîri kwîthîrwa tûrî na mathûgaanio ta jau. Îndî këethîra kûrî bamwe beenu barî na mathûgaanio mwanya na jau, Mûrungu akabûguûrîra bamenye bwega.

¹⁶Îndî twîteni na mbere tûgîtongagîîrua nî ûûma bûrîa tûthîrîtie kûmenya.

¹⁷ Ataana na aarî ba baaba, thingatageni mûtûûrîre jwaakwa. Nî tûthirîtie kûbwonia mwîtîre jûmwega, tontû bûû, thikagîîreni barîa bathingataga mwîtîre jûu.

¹⁸Nî nthirîtie kûbwîra ûntû bûbû magiita jamaingî, na nandî ga nkûbûcokeeria bu kaîrî nkîrîraga: kûrî na antû babaingî barî anthû ba mûtharaba jwa Kristû nîûntû bwa mîtûrîre yaao.

¹⁹Mûthia jwaao nî gwîta mwankiine jwa kenya na kenya tontû mûrungu jwaao nî biu biaao na baikumagîria mantû ja nthao na bakairîrîîria mantû ja nthîgûrû.

²⁰Îndî tuî gîtûûro gîetû nî kûu îgûrû, na tweteerete kwîja kwa Mwonokia, nîwe Mwathani Jesû Kristû.

²¹We nîwe ûkagarûra mîîrî îîjî yeetû îmîûthû îrîa îkuujaga îng'uanane na mwîrî jwaawe jûrîa jûrî ûkumio agîtûmagîra inya îrîa îmûmbithîtie gwîka into bionthe biîthîrwa birî waathaniine bwaawe.