Read KIMERU BIBLE PROTESTANT EDITION Afi 4 Bible Online

Afi 4 - KIMERU BIBLE PROTESTANT EDITION bible

Afi 4

¹Ataana na aarî ba baaba, buî barîa mpendeete na ndirîragîîria mono kwona nîûntû nî buî kûgwîrua gwaakwa na thirû ya mwago jwa ûûmbani bwaakwa. Tontû bûu, acoore baakwa ciaandeni ndeene ya Mwathani.

²Îbuî Euodia na Suntike: Itû nî nkubwerenca bwiganue ta aarî ba baaba, ndeene ya Mwathani.

³Naagwe mûtaana wa baaba mwîtîkua ûrîa tûritanagîra nawe ngûgî, nî nkwenda ûteetheerie aka bau, tontû nî baaritîte na wîru ngûgî înene ya gûtûmîîria Nteto Injega tûrî amwe nabo na Kîlementi na antû bangî barîa twaritanagîria ngûgî nabo bonthe, barîa mariîtwa jaao nî jaandîki yukuune rîa ûtûûro.

⁴Gwîragueni ndeene ya Mwathani magiita jonthe! Ndîbwîra o kaîrî gwîragueni!

⁵Ûboreru bweenu nî bûmenyewe nî antû bonthe. Mwathani arî akuî kwîja.

⁶Bûkaithangîkagieni nîûntû bwa ûntû kinya bûrîkû, îndî rîrîa bûkûromba menyithagieni Mûrungu moobatu jeenu, bûkîmûrombaga na kûmwerenca, amwe na kûmûcokeria nkaatho.

⁷Nayo thîîrî ya Mûrungu îrîa antû batîûmba kûmenya ûrîa îng'ana, îrokaragia nkoro cieenu, o na mathûgaanio jeenu ndeene ya Kristû Jesû.

⁸Nkîthiria, ataana na aarî ba baaba, karageni bûkîthûgaanagia mantû jarîa jarî ja mma na jarîa jarî ja îgweta na ja îota. Ningî thûgaanagieni bwa mantû jarîa matheru na jarîa jarî jamathongi na jarîa jarî ja gwîkagîîrwa. Këethîra kûrî ûntû bûngî bwa bata na bwa gûkumithua, thûgaanagieni bwa mantû ta jau.

⁹Mantû jarîa bwairitanîre kuumania naani na bûrajaigua na bûrajoona kuuma kîrî ni, jau jonthe tueni kûjathithagia. Nawe Mûrungu wa thîîrî agakaraga amwe naabuî.

¹⁰Nî ngwîrîtue mono ndeene ya Mwathani nî kwona nî bûkûndirikana moobatuune jaakwa. Kuuga mma nî atî nî bûtwîre kûndirikana îndî tiga nî kaanya akî bûtaarî bûkwona ga gûnteethia.

¹¹Ntîkuuga ûntû bûu nîûntû bwa kwîthîrwa atî kûrî gîntû mbagîte tontû nî ndiiritanîte kung'anîrwa nî birîa ndî nabio.

¹²Nî menyanîrîtie na rîrîa into birî bibingî kana rîrîa birî bibikai. Nî menyeretie kûng'anîrwa nî mantû jonthe ûntûûne bunthe na gûntû kunthe kûrîa mbîthîrîkua ndî; ndeethîrwa nyiri kana ndî na mpara; kwëethîrwa mpingîîri nî into kana rîrîa ntî na bio.

¹³Ndoomba kûthithia mantû jonthe nîûntû bwa Kristû ûrîa ûmpeejaga inya.

¹⁴Îndî buî nî bwathithîrie bwega gûnteethia mathîînene jaakwa.

¹⁵ Buî ba kanisa ya Filipi nî bûkûririkana atî rîrîa ndaumaga kûu Makedonia ntukû irîa ndaambîrîtie gûtûmîîria Nteto Injega, nî buî bwinka bwagatanîîre naani mantûûne ja kweejana into bieenu kîrî barîa baarî na ûbatu.

¹⁶ Rîrîa ndaarî na ûbatu ndî Thesalonike, tî rîmwe akî bwantûmanîîre ûteethio.

¹⁷Bûkathûgaanieni atî no biewa akî mpendeete kûewa; bûrîa mpenda nkûrûki nî bwoone maciara ja kûbwongeera mûthithûûne jweenu.

¹⁸ Rîu nî ndîrakinyîîrwe nî into bionthe birîa bûratûmîrîte Epafrodito aandeetera. Nabio nî bibingî nkûrûki ya birîa mbatarîtue nî bio. Biewa bibi nî ta kîgongwana kîrîa kîeeraga bûbwega na kîrîa gîîtîkîrîka nî Mûrungu na gîkamûgwîria.

¹⁹Tontû bûû Mûrungu waakwa akabûjûrîria moobatu jeenu jonthe kuumania na mûng'ana jwa ûtonga bwa mwago jwaawe ndeene ya Kristû Jesû.

²⁰Ûkumio bunthe nî kîrî Mûrungu Baaba weetû kenya na kenya! Amen!

²¹Nketherieni atheru bonthe ndeene ya Kristû Jesû. Ataana na aarî ba baaba barîa barî amwe naani bakûbûkeethia.

²²Atheru bonthe na mono barîa baritaga ngûgî gîkaroone kîa Kaisarî bakûbûkeethia.

²³Ûtugi bwa Mwathani weetû Jesû Kristû bûrotûûraga amwe naabuî.