Read KIMERU BIBLE PROTESTANT EDITION Akol 1 Bible Online

Akol 1 - KIMERU BIBLE PROTESTANT EDITION bible

Akol 1

¹Nî ni Paûlû, mûtûmwa wa Kristû Jesû tontû bwa kwenda kwa Mûrungu, tûrî na Timotheo mûtaana wa baaba,

²tûkûbwaandîkîra barûga îîjî ataana na aarî ba baaba, buî atheru ba Mûrungu na etîkua ndeene ya Kristû, barîa bûtwîre kûu Kolosai. Bûrokara na ûtûgi na thîîrî kuuma kîrî Mûrungu Baaba weetû.

³Nî tûcokagîria Mûrungu Îthe wa Mwathani weetû Jesû Kristû nkaatho magiita jonthe rîrîa tûbûrombagîra.

⁴Tontû nî twigîtue mantû ja wîtîkio bweenu ndeene ya Kristû Jesû, na ûrîa bwendeete atheru bonthe ba Mûrungu.

⁵Rîrîa ntûmîîri îîu ya mma tayo Nteto Injega yaabûkinyîîre îgiita rîa mbere, nî bwaigîrue mantû ja wîrîgîîro bûrîa bûrîo nîûntû bweenu. Tontû bûû, wîtîkio bweenu na wendo bweenu biumanîtie na wîrîgîîro bûrîa bûrî nabu bûrîa bûthuranîri kûu Îgûrû.

⁶Nteto Injega ciîtîte na mbere kûreta maciara na gûtamba nthîgûrûûne yonthe o ta ûrîa ciaathithîrie kîrî buî kuuma ntukû îrîa bwaigîrue mantû ja ûtugi bwa Mûrungu na bûramenya ûrîa bûkari.

⁷ Buî nî bwairitanîre mantû jegiî ûtugi bwa Mûrungu kuumania na Epafarasi, mûriti wa ngûgî amwe naatuî ûmwende. We nî nthûûmba mbîtîkua ya Kristû îrîa îkûrita ngûgî antû eetû.

⁸Nîwe waatûmenyithîrie mantû jegiî wendo bweenu ndeene ya Roho.

⁹Tontû bûû, kuuma rîrîa twaigîrue mantû jeenu, tûtatiga kûbûrombera. Tûrombaga Mûrungu abûûjûrie ûmenyo bwa kûmenya ûrîa endaga, bûkarage na ûûme na gûciûra mantû kuumania na Roho waawe.

¹⁰Rîu nîrîo bûkomba gûtûûra ta ûrîa kwagîrîte bûrî antû ba Mwathani na bûkîmûgwîragia. Bûgîciaraga maciara jameega ngûgîîne irîa njeega cionthe na bûgîkûraga ndeene ya kûmenya Mûrungu.

¹¹Mûrungu arotûma bûgîta inya yonthe, îrîa yumanagia na inya ya mwago jwaawe, nîkenda bûkomba kûûmîîria mantû jonthe bûtîkûnoga na bûgwîrîtue.

¹²Ningî bûcokagie nkaatho kîrî Mûrungu Baaba ûrîa ûtûmîte bwîthîrwa bûrî na rûgai rwa atheru barîa barî ûneneene bwa weerû.

¹³We nî aatwonokerie tûrauma inyeene ya muundu, na aratûreta Ûneneene bwa Mûtaana waawe ûmwende,

¹⁴ ûrîa ûtûmîte tûkûûrwa, na ûu nî ta kuuga kûrekerwa kwa meeyia jeetû.

¹⁵Kristû nî mûng'uanano jwa Mûrungu ûrîa ûtîonagwa. We nî rikithathi ya into bionthe birîa biûmbi.

¹⁶Tontû nî na njîra yaawe Mûrungu oombîre into bionthe birîa birî nthîgûrû na birîa birî îgûrû, na into birîa bionagwa na birîa bitîonagwa. Ningî nî oombîre anene na moonene na athani na barîa barî inya. Into bionthe biombîrwe na njîra yaawe na nîûntû bwaawe.

¹⁷Kristû nî aarî o mbere ya into bionthe na o gîntû kîonthe kîrî antû akio nîûntû bwaawe.

¹⁸ We nîwe mûtwe jwa mwîrî jwaawe, taju kanisa. We nîwe kîambîrîria kîa ûtûûro na nîwe rikithathi wa bionthe birîa biriûkîte kuuma kîrî akuû, nîkenda we eethîrwa arî wa mbere mantûûne jonthe.

¹⁹Tontû Mûrungu wengwa nîwe wendere ûjûru baawe bunthe bwîthîrwe bûrî ndeene ya Mûtaana waawe.

²⁰ Ningî na njîra yaawe into bionthe biigithanue na Mûrungu, bieethîrwa birî nthîgûrû kana birî îgûrû. Kristû aratûma gûkara na thîîrî nîûntû bwa tharike yaawe îrîa eetûrîre mûtharabeene.

²¹Mbereene, kinya buî nî bwaarî kûraaja na Mûrungu na bwaarî anthû baawe nîûntû bwa ûrîa mathûgaanio na mathithio jeenu jaarî jamathûûku.

²²Îndî nandî, nîûntû bwa gîkuû kîa Mûtaana waawe ûrîa waatwîre gûkû nthîgûrû, Mûrungu nî aatûmîre bwigithanua nawe, nîkenda akabûreta mbere yaawe bûrî babatheru na bûtî na rûko kana mûgiro.

²³Bûbuîri gwîta na mbere gûciaanda wîtîkione na bûriki ndeene ya mûsingi jwa mma na jûmûriku. Bûgéetîkîîria kwinainua buuma wîrîgîîroone bûrîa bwaerwe rîrîa bwaigîrue Nteto Injega. Nteto Injega iu nîcio itûmîîrîtue kîrî antû bonthe barîa barî nthîgûrûûne na nîcio ûûni Paûlû ndaetherue nthûûmba ya gûcitambia.

²⁴Nandî nî nkûgwîrua nkîthangîkua nîûntû bweenu. Kûthangîkua mwîrîîne jwaakwa nî gûgûteethereria kûûjûrîria ûntû bûrîa bûtigarîte mwanka nandî kîrî mîthangîko ya Kristû nîûntû bwa mwîrî jwaawe, taju kanisa.

²⁵Nî ni ndaeere nthûûmba ya kanisa kûringana na ngûgî îrîa Mûrungu ampeere nîûntû bweenu nîkenda nkabûmenyithia rûteto rwa Mûrungu runthe.

²⁶Rûteto rûu naru nîru kîriga kîrîa gîatwîre kiithi îgiiteene rîonthe na nthukîîne cionthe irîa ikûrûkîte. Îndî nandî kîriga kîu nî kîguûrîri atheru baawe.

²⁷Mûrungu nîwe wengwa wendere kûmenyithia antû baawe kîriga gîkî arabamenyithia ûrîa ûtonga bwa ûkumio bwa kîriga kîu bûkari kîrî antû barîa batî Ayahudi. Kîriga kîu nakîo nîkîo gîkî: Kristû arî ndeene yeenu na nîwe wîrîgîîro bwa ûkumio.

²⁸Kîu nîkîo gîtûmaga tûtûmîria Kristû kîrî antû bonthe, tûkîbakanagia na tûkîbaritanaga bagîte ûûme mantûûne jonthe nîkenda tûûmba kûreta o muntû wonthe mbere ya Mûrungu arî ûmûgima mantûûne ja kûmenya Kristû.

²⁹Naani nîkenda nkoojûria ûntû bûu, nî nciûmagia kûrita ngûgî îîu na inya îrîa Kristû aeejanaga, îrîa îritaga ngûgî ndeene yaakwa.