Read KIMERU BIBLE PROTESTANT EDITION Akol 2 Bible Online

Akol 2 - KIMERU BIBLE PROTESTANT EDITION bible

Akol 2

¹Ndenda bûmenya ûrîa nciûmagia mono nîûntû bweenu na nîûntû bwa antû ba Laodîkia na nîûntû bwa antû bonthe barîa bataambona.

²Nthithagia ûû nîkenda bagea inya nîûntû bwa ûrîa bagwatithanîtue nî wendo na nîkenda batîthîrwa barî na nkaanja tontû bwa ûrîa bathirîtie gûciûkîrwa nî mantû bwega. Ûu nîu bakamenya kîriga kîa Mûrungu, nakîo nîkîo Kristû wengwa.

³Ndeene ya Kristû nî kwithi mootonga jonthe ja ûûme na ûmenyo.

⁴Ndîbwîra ûû nîkenda bûtîkeeje kwaîrua nî muntû kinya ûrîkû na nteto cia ûrongo kinya këethîra nî injega atîa.

⁵Nîkwîthîrwa kinya nkëethîrwa ndî kûraaja naabuî, ndî amwe naabuî nkoroone yaakwa na nkîgwîragua ndatarania ûrîa buî bûkaraga bwega na bûciaandîte wîtîkione ndeene ya Kristû.

⁶Tontû buî nî bwîtîkîtie Kristû Jesû nî Mwathani, nîu tûûrageni bûrî gîntû kîmwe nawe.

⁷Ciandeeni ndeene yaawe na bwake ûtûûro bweenu kîrî we nîkenda bûtûûra bûriki wîtîkioone bweenu o ta ûrîa bwaaritanîrwe na bûgîcokagia nkaatho mono.

⁸Imenyagîîreni muntû kinya ûrîkû atîkeeje kûbwangaratania na ndwaria cia ûtheri na cia waayia ciumanîtie na maûûme ja antû. Mooritani ja mûthemba jûu jaumanagia na roho inthûûku irîa ciathaga nthîgûrû na jatiumanagia na Kristû.

⁹Tontû ûûjûru bunthe bwa Mûrungu bûrî ndeene ya ûmuntû bwa Kristû,

¹⁰naabuî bûrî na ûtûûro bûbûûjûru tontû bwa kwîthîrwa bûgwatanîrîte nawe. We nîwe mûnene kîrî roho cionthe na mainya jonthe jarîa jathanaga nthîgûrû.

¹¹Rîrîa bwagwatanîre na Kristû nîrîo bwatanîrwe na tî na rûtaano rûrîa rûtanagwa na njara cia muntû. Îndî bwatanîrwe na rûtaano rwa Kristû rîrîa bwatiganîre na mîkariî îmînthûûku ya mwîrî.

¹² Ningî nî bwathikanîrue na Kristû rîrîa bwabatithîrue na ûu nou bwariûkanîrue na Kristû tontû bwa gwîtîkia inya ya Mûrungu ûrîa wamûriûkîrie kuuma kîrî akuû.

¹³ Îgiita rîmwe buî nî bwaarî baakuû kîroho tontû bwa meeyia jeenu na bwaarî antû barîa batî Ayahudi. Îndî nandî Mûrungu nî atûmîte bwîthîrwa bûrî na ûtûûro amwe na Kristû. Mûrungu nî aatûrekeere meeyia jeetû jonthe.

¹⁴ We nî aatharîrie barûga ya îrandu rîrîthûûku rîrîa twaarî narîo o amwe na mawaatho jarîa jarîngîtûgambithia na arajangûra rîrîa ajaringîîre mîchumaarî mûtharabeene.

¹⁵Nawe Kristû nî aatunyîre roho inthûûku na mainya waathi na arajekîrithia nthao weerûûne ajaumagarîtie jarî atae na akîgwîragîrua ûûmbani bwaawe.

¹⁶ Tontû bûû, bûgeetîkîrieni muntû kinya ûrîkû abwîkîra mawaatho jegiî biakûrîa kana biakûnyua kana jegiî mîthenya ya thigûûnkû kana biatho bia mweri jûmwerû kana sabatû.

¹⁷Mantû jau jonthe nî mbicha ya ûntû bûrîa bûkeeja; ûntû bûu bungwa nî Kristû.

¹⁸Bûgeetîkîrieni kûgambithua nî muntû kinya ûrîkû ûrîa ûgaga nî oonete bioneki na akabûkinyagîîria bwinyiyie na bûrombage araîka. Muntû wa mûthemba jûu eethagîrwa oojûrîtwe nî wikumia bûtî na gîtûmi tontû bwa mathûgaanio ja nthîgûrû.

¹⁹ Tontû bûû, nî baathûrani na Kristû ûrîa ûrî mûtwe na ûrîa ûgwatithanîtie mwîrî junthe na mîkiia na tûgano twaju na agatûma jwoona marero na jûkûra o ta ûrîa Mûrungu endete.

²⁰Bûkëeja kwîthîrwa nî bûkujanîrîtie amwe na Kristû na bwonokua kuuma kîrî inya ya roho inthûûku irîa ciathanaga nthîgûrû, nîmbi îndî îtûmaga bwîta na mbere gûtûûra teeka bûrî ba nthîgûrû îîjî? Nîkî tontû bwathîkagîra mawaatho ta jaja:

²¹“Bûkágwata gîkî,” kana “Bûgácema gîntû kîna,” kana “Bûkáringithia kîrîa.”

²²Mantû jau jonthe jegiî into birîa biejaga bia ûtheri biathiria gûtumîrwa. Ningî jau jonthe nî mawaatho na mooritani ja antû.

²³Nî mma atî mawaatho jau jonekaga jarî ja ûûme bûbûnene mono nîûntû bwa wîru bwa ndini na winyiyia bwa waayia o na mantû ja kûnyamaaria mwîrî mono. Îndî mma nî atî, mantû jau jonthe gûtî u jateethagia kîrî kûrigîîria kwiingia mairîrîîria ja mwîrî.