Read KIMERU BIBLE PROTESTANT EDITION Akol 3 Bible Online

Akol 3 - KIMERU BIBLE PROTESTANT EDITION bible

Akol 3

¹ Buî nî bwariûkanîîrue amwe na Kristû, tontû bûû, mathûgaanio jeenu nî joojûre mantû ja îgûrû kûrîa Kristû akarîte nthî rûteere rwa ûrîo rwa Mûrungu.

²Thûgaanagieni mantû ja îgûrû na tî ja gûkû nthîgûrû.

³Tontû nî bwakuîre na ûtûûro bweenu nî bwiithi amwe na Kristû ndeene ya Mûrungu.

⁴Ûtûûro bweenu bwa mma nî Kristû na rîrîa akoonithanua kîrî nthîgûrû yonthe, rîu kinya buî bûkoonithanua bûrî amwe nawe mwagoone.

⁵Tontû bûû, thirieni buru mairîrîîria ja mantû ja nthîgûrû, najo nî jaja: ûthûngîîri na mantû ja rûko na wirîrîria bwa ûthûngîîri na mairîrîîria ja mantû jamaaî na ûkoroku bwa into. Tontû ûkoroku bwa into nî ta kûthaathayia mîrungu ya mîng'uanano.

⁶Mantû jaja nîjo jatûmaga mûthûûro jwa Mûrungu jwîjîîra antû barîa batîmwathîkagîra.

⁷Îgiita rîmwe kinya buî nî bwatûûraga kûringana na mairîrîîria jau, rîrîa bwatwîre kwathwa nîjo.

⁸Îndî nandî tîganeeni na mantû jaja: mûthûûro na marûrû na ûthûûku bwa nkoro na nguutû na ndwaria imbîî.

⁹ Bûkáîranagieni tontû nî bûthirîtie gûtigana na mûtûûrîre jûrîa mûkûrû amwe na mathithio jaaju,

¹⁰ na bwambîrîria mûtûûrîre jûmwerû. Mûtûûrîre jûu naju nî jûgwîta na mbere jûkîerûagua nîkenda jûng'uanana na mûûmbi waaju o ûrîa bûgwîta na mbere bûkîmûmenyaga.

¹¹Tontû bûû, gûtî mwanya gatîgatî ka Ayahudi na barîa batî Ayahudi; muntû ûtaani na ûtîtaani; ûrîa ûthomete na ûrîa ûtîthomete; nkombo na ûrîa ûtî nkombo. Kristû nîwe ûrî bata na arî ndeene yeetû twinthe.

¹² Buî bûrî antû ba Mûrungu. We nî aabûthuurîre na araabwenda na arabweethia babatheru. Tontû bûû, karageni na mîîtîre îmîerû ya kwiganagîîrua kîaao na kûthithanagîria mantû jameega na kwinyiagia na ûkiri na kûûmagîîria wathûûkua.

¹³ Ûmagîîrieni na bûrekanagîre rîrîa muntû aathûûkua nî ûngî. Rekanagîreni o ta ûrîa Mwathani abûrekeere.

¹⁴Nkûrûki ya jau jonthe ûjûrweni nî wendo tontû nî wendo bunka bwooganagia mantû jonthe amwe jakaa jameega buru.

¹⁵Rekeni thîîrî îrîa yumaga kîrî Kristû îbûtongagîîrie mantûûne jarîa bûkûbanga kûthithia. Tontû Mûrungu ka aabwîtîre bûtûûrage na thîîrî bûrî mwîrî jûmwe. Tûûrageni bûrî na nchûne magiita jonthe.

¹⁶ Rûteto rwa Kristû nî rûkarage nkoroone cieenu na wingî. Tueni kûritananaga na kwonanagîîria mantû bwingwa nîkenda bûgea ûûme bwa mîthemba yonthe. Înagîreni Mûrungu Zaburi na ndwîmbo cia Mûrungu na cia Kîroho bûûjûrîtwe nî nkaatho.

¹⁷Ningî o ûntû bunthe bûrîa bûkathithia, eethîrwa nî na kwaria kana mathithio, thithagieni jonthe ndeene ya riîtwa rîa Mwathani Jesû bûgîcokagîria Mûrungu Baaba weetû nkaatho ndeene ya Mwathani Jesû.

¹⁸ Buî eekûrû, inyiiagieeni kîrî akûrû beenu, o ta ûrîa kwagîrîte mbere ya Mwathani.

¹⁹ Naabuî akûrû, endageni eekûrû beenu na bûkábainyagîîria.

²⁰ Naabuî aana, athîkagîreeni aciari beenu mantûûne jonthe tontû ûntû bûu nîbu bûgwîragia Mwathani.

²¹ Beethe ba aana, bûkathûûrieni aana beenu batîkeeje gwitîjîra.

²² Naabuî nkombo, athîkagîreeni barîa babwathaga mantûûne jonthe. Bûkáthithagia ûu akî rîrîa babûtegeete rîonka teeka bûgûcwa gûciendithia kîrî bo; îndî thithagieni ûu na nkoro yonthe nîûntû bwa gûkîra Mwathani.

²³Ngûgî kinya îrîkû îrîa bweei bûrita, mîritageni bûrî na wîru teeka bûkûritîra Mwathani na tî antû bûkûritîra.

²⁴Menyeni nî kuuma kîrî Mwathani bûkoona rûgai rûrî îtuui rîeenu. Buî nî Kristû Mwathani bûtûmîkagîra.

²⁵ Nîkwîthîrwa muntû ûrîa ûthithagia ûthûûku akarîwa îtuui kûringana na ûthûûku bûrîa athithîtie, tontû Mûrungu atîendanagîîra.