Read KIMERU BIBLE PROTESTANT EDITION Akol 4 Bible Online

Akol 4 - KIMERU BIBLE PROTESTANT EDITION bible

Akol 4

¹ Naabuî aathi, thithagîrieni nkombo cieenu kûringana na Waatho bûtîkûbainyîîria. Rikaneni atî kinya buî Mwathi weenu arî Îgûrû.

²Rombageni Mûrungu magiita jonthe bûtîkûnoga na bûkarage bûciûki ndeene ya maromba na bûgîcokagîria Mûrungu nkaatho.

³Tûrombagîreni kinya tuî nîkenda Mûrungu agatwonera kaanya gakeega ga gûtambia rûteto rwegiî witho bwa Kristû. Kîu nîkîo gîtûmîte mbîthîrwa ndî ncheera nandî.

⁴Tontû bûû, ndombereni nîkenda nkaaria o ta ûrîa mbwîrîte kûthithia nîkenda rûteto rûu rûkamenyekana carûrûkû.

⁵ Tûûrageni na ûûme rîrîa bûrî na antû barîa batî ba mûûrû jweenu na bûtumagîre o kaanya karîa bûroona bwega.

⁶Rwaria rweenu nî rwîthagîrwe rûrî rûrwega na rûmaarîri nîkenda bûûmba gûcokeria o muntû wonthe ûrîa kwagîrîte.

⁷ Mûtaana wa baaba ûmwende, Tukiko, ûrîa ûrî mûriti ngûgî mwîtîkîkua na ûmwe weetû kîrî ngûgî ya Mwathani, akabwîra mantû jaakwa jonthe.

⁸Nîkîo gîtûmi ndamutûma nîkenda akabûmenyithia ûrîa tûrî na abûmîrîria.

⁹ Bakeejania na Onesimo, mûtaana wa baaba ûrîa mwende na mwîtîkua na ûrîa ûrî ûmwe weenu. Bakabwîra mantû jonthe jarîa jakarîkîte naaja tûrî.

¹⁰ Aristariko, ûrîa wiingîri ncheera amwe naani akûbûkeethia. Kinya Maariko mwana wa mwarî wa ng'ina wa Baranaba akûbûkeethia. Nî bûthirîtie kwîrwa nteto cîegiî Maariko. Tontû bûû, akëeja kwîja kîrî buî mûgwateeni ûgeni bwega.

¹¹Kinya Joshua ûrîa wîtagwa Jastasi akûbûkeethia. Kîrî Ayahudi barîa baete akristû, no bau bonka akî bakûritanîria ngûgî amwe naani nîûntû bwa Ûnene bwa Mûrungu; nabo nî banteethetie mono.

¹² Kinya Epafarasi nthûûmba ya Kristû Jesû, ûrîa ûrî ûmwe weenu, akûbûkeethia. Akaraga akîbûrombagîra na wîru magiita jonthe nîkenda bûcianda kîrî Mûrungu bûrî na ûgima na bûkîthithagia mantû jonthe jarîa eendaga.

¹³Nî ngûkûjîrîra atî nî aritîte ngûgî mono kîrî buî na kîrî antû ba Laodîkia na Hierapoli.

¹⁴ Ndagitarî ûmwende Luka, amwe na Demasi bakûbûkeethia.

¹⁵Keethieni ataana na aarî ba baaba barîa barî Laodîkia, o na kinya Nifa na kanisa îrîa îcemanagia mûciî jaawe.

¹⁶Bwathiria kûthoma barûga îîjî mîtûmeeni Laodîkia nîkenda îkathomwa nî akristû. Kinya buî bûthome barûga îrîa akristû ba Laodîkia bakabûtûmîra.

¹⁷ Ningî îreeni Arikipo arite bwega ngûgî îrîa Mwathani aamûnenkeere.

¹⁸Nî ni Paûlû ndaandîka nkeethi iiji na njara yaakwa ningwa. Ririkaneni atî ndî ncheera! Ûtugi bwa Mûrungu bûrookaraga naabuî.