Read KIMERU BIBLE PROTESTANT EDITION 1Ath 1 Bible Online

1Ath 1 - KIMERU BIBLE PROTESTANT EDITION bible

1Ath 1

¹ Nî tuî Paûlû na Silivano na Timotheo, Tûkûbwaandîkîra buî ba kanisa ya Thesalonike barîa bûrî ba Mûrungu Baaba na Mwathani Jesû Kristû. Ûtugi na thîîrî birokaraga amwe naabuî.

²Magiita jonthe nî tûcokagîria Mûrungu nkaatho nîûntû bweenu bwinthe na tûkîbûgwetaga marombeene jeetû.

³Rîrîa tûkûromba Mûrungu Baaba, tûkaraga tûkîririkanaga ûrîa bwonanagia wîtîkio bweenu na mathithio jeenu. Ningî ûrîa wendo bweenu bûtûmîte bûrita ngûgî na inya na ûrîa wîrîgîîro bweenu bûriki ndeene ya Mwathani weetû Jesû Kristû.

⁴Nî twijî mma atî Mûrungu nî abûthuurîte na abweenda buî ataana na aarî ba baaba.

⁵Nîkwîthîrwa Nteto Injega cia Mûrungu irîa twabûtûmîîrîrie itaabûkinyîîre na njîra ya kwigua rûteto akî, îndî ciabûkinyîîre na inya na ndeene ya Roho Ûmûtheru na tûrî na mma atî nteto iu nî cia mma. Buî bwingwa nî bûkûmenya mûtûûrîre jûrîa twatwîre naju gatîgatîîne keenu nîkenda buî bûkagunîka.

⁶ Naabuî nî bwaigerekanîrie naatuî o na Mwathani tontû bwa kwîthîrwa nî bweetîkîrîrie rûteto bûrî na nkerû kuumania na Roho Ûmûtheru, kinya këethîra nî bwathangîkagua mono.

⁷Tontû bûû nî bwaeere ngerekano înjega kîrî eetîkia bonthe ba Makedonia na Akaia.

⁸Rûteto rwa Mwathani rûrîa ruumîte kîrî bwî rûtîtambîte Makedonia na Akaia akî, îndî nteto ciegiî wîtîkio bweenu ndeene ya Mûrungu nî itambîte kunthe. Tontû bûû, gûtî u tûbuîri kuuga bweîgiî untû bûu.

⁹Antû bau bongwa nî bakuuga mantû jeegiî ûrîa buî bwatûgwatîre ûgeni bûgwîrîtue rîrîa tweejîre kîrî buî. Ningî ûrîa bwaagarûkîre na bûratiga kûromba mîrungu ya mîng'uanano na bûreetîkia nîkenda bûtumîkîra Mûrungu wa mma na ûrîa ûtûûraga mwoyo,

¹⁰na nî bweteerete Mûtaana waawe ûrîa ûkauma îgûrû, nawe nî Jesû ûrîa aariûkîrie kuuma kîrî akuû na ûrîa ûtwonoketie kuuma kîrî mûthûûro jwa Mûrungu jûrîa jûkeeja.