Read KIMERU BIBLE PROTESTANT EDITION 1Ath 2 Bible Online

1Ath 2 - KIMERU BIBLE PROTESTANT EDITION bible

1Ath 2

¹Tontû buî bwingwa ataana na aarî ba baaba nî bwijî atî kwîja gweetû kîrî buî gûtaeere kwa ûtheri.

² Kinya këethîrwa nî twaambîte kûthangîkua na kûrumangwa tûrî kûrîa Filipi, o ta ûrîa buî bwingwa bwijî, Mûrungu weetû nî atûûmîîrîrie nîkenda tûtûmîîria Nteto Injega ciaawe kîrî buî kinya këethîra babaingî nî barûjaga na ûntû bûu.

³Ûntû bûu tûkûbwerenceera bûtîumanîtie na waayia kana merekeeria jamathûûku ja nkoro cieetû, kana kwîthîrwa ga kûrî muntû tûkwenda kwaîria.

⁴Îgiita rîonthe tuî twaragia kûringana na kwenda kwa Mûrungu, tontû nîwe wonere atî nî twagîrîte na aratûnenkera Nteto Injega. Mworoto jweetû tî kûgwîria antû, îndî nî kûgwîria Mûrungu ûrîa wiijî nkoro cieetû.

⁵Tontû buî nî bwijî atî gûtî rîo tuî twaageria gûciendithia kîrî buî na nteto cia kûbwaîria kana twîja kîrî buî na ûûme tûgîcwaa kûbwaiyia tûbûtuunya into bieenu. Mûrungu wengwa nî mûkûûjî wa ûntû bûu.

⁶Ningî gûtî rîo tuî twacwaa gûkumua nî antû, barweethîrwa nî buî kana nî antû bangî. Kinya këethîra tuî ta atûmwa ba Kristû nî twabuîri kûbwîra bûtûteethererie.

⁷Îndî tuî ga twaeere ainyiiyia tûrî kîrî buî, tûrakara ta ûrîa ng'ina wa twaana amenyagîîra aana baawe.

⁸Tontû bwa ûrîa twabwendeete mono tî Nteto Injega twabûtûmîîrîrie akî, îndî nî twacieejanîre kîrî buî. Twathithîrie ûu nîûntû bwa ûrîa twabwendeete mono.

⁹Tontû buî ataana na aarî ba baaba, nî bûkûririkana ngûgî înjûmo na mînoga îrîa twaanogaga tûkîrita ngûgî mûthenya na ûtukû. Twathithagia ûû îgiiteene rîrîa twabûtûmagîîria Nteto Injega nîkenda tûtîkeeje kwaa mûrigo kîrî kinya ûmwe weenu.

¹⁰Buî barîa bwîtîkîtie bûrî akûûjî, o na Mûrungu wengwa nî mûkûûjî wa ûrîa tuî tweetaga na mîîtîre ya ûtheru na ya waagîru na îrîa tûtîûmba kûguutîrwa rîrîa twatûûranagia amwe naabuî.

¹¹Tontû buî nî bûkûmenya atî twakari ta îthe wa aana ûrîa akaraga arî kîrî aana baawe. Nî twoonagîîria o ûmwe weenu na tûkabwîkîra wîru na tûkabûkinyîîria atî,

¹²bûtûûrage ûtûûro bûrîa bûgwîragia Mûrungu ûrîa ûbwîtîte Ûneneene na mwagoone jwaawe.

¹³Ningî nî tûcokagîria Mûrungu nkaatho îgiita rîonthe nî kwîthîrwa rîrîa buî bwetîkîrie rûteto rwa Mûrungu rûrîa bwaigîrue kuuma kîrî tuî bwarwîtîkîrie rûrî rûteto rwa Mûrungu na tî rûteto rwa antû. Ûu bwaarwîtîkîrie rûrî rûteto kuuma kîrî Mûrungu nîu rwarî, tontû kinya nandî nîru rûkûrita ngûgî rûrî ndeene yeenu buî barîa bwîtîkîtie.

¹⁴ Ataana na aarî ba baaba, nî bwakarîre ta kanisa cia Mûrungu irîa ciîtîkîtie Kristû Jesû irîa irî nthîgûrû ya Judea, nîkwîthîrwa nî bwathangîkîrue nî antû ba nthîgûrû yeenu na mantû o ta jarîa kanisa cia Judea ciathangîkîrue najo nî Ayahudi.

¹⁵ Bo nîbo booragîre Jesû na iroria, na nîbo baatwîngîre tûrauma kûu. Nî baaigithîrie Mûrungu bûbûûî bakîrûjaga na antû bangî bonthe,

¹⁶na barageria gûtûrigîîria gûtûmîîria kîrî antû barîa batî Ayahudi nîkenda boonoka. Baathithagia ûu ta antû bakûgeria kûjûrîîria mûng'ana jwa meeyia jaao jarîa baatwîre kûthithia. Îndî nandî mûthûûro jwa Mûrungu nî jûthirîtie kûbakinyîra.

¹⁷Ataana na aarî ba baaba, kuuma rîrîa twaathûkanîre naabuî antû a kagiita gagakai, tûratigana mîîrî îndî nkoro ciaarî o amwe, nî twaaciûmîrie mono tûkîendaga twonana naabuî.

¹⁸Nî tweendaga kwîja kîrî buî mono. Ni Paûlû nî ndaagererie kwîja nkûrûki ya rîmwe îndî Nkoma aratûrigîîria.

¹⁹A rî, rîrîa tûkarûngama mbere ya Mwathani weetû Jesû rîrîa akeeja rî, nîmbi îkeethîrwa îrî kûgwîrua kana wîrîgîîro kana thirû yeetû? Anga tî buî?

²⁰Tontû nî buî ûkumio na kûgwîrua gweetû.