Read KIMERU BIBLE PROTESTANT EDITION 1Ath 4 Bible Online

1Ath 4 - KIMERU BIBLE PROTESTANT EDITION bible

1Ath 4

¹Mûthieene ataana na aarî ba baaba, tûrîbwerenca na kûbwoneeria ndeene ya Mwathani Jesû atî bwîtage na mbere na mûtûûrîre jwa kûgwîria Mûrungu o jûrîa bûrî naju nandî kûringana na ûrîa bwairitanîre kuuma kîrî tuî. Îtageni na mbere kûthithagia ûu nkûrûki.

²Tontû buî nî bwijî mooritani jonthe jarîa twaabûritanîre riîtweene rîa Mwathani Jesû.

³Nîkwîthîrwa wendi bwa Mûrungu nî atî bwee babatheru na bûrekane na mairîrîîria ja mwîrî.

⁴Ntomûrûme nî abuîri kûmenya ûrîa abuîri gûtûrania na mwekûrû waawe na njîra ya ûtheru na gîtîîo.

⁵Îndî tî ta ûrîa antû barîa batiijî Mûrungu baathagwa nî mairîrîîria ja mîîrî yaao.

⁶Tontû gûtî we ûbuîri kûatîria mûtaana wa îthe mantûûne jegiî kûjûkia mwekûrû waawe nîkwîthîrwa Mûrungu nî akanûkagia antû barîa bathithagia mantû ta jau o ta ûrîa tûthirîtie kûbûmenyithia.

⁷Tontû Mûrungu ataatwîtîre tûtûûraga mantûûne ja ûmaramari îndî aatwîtîre tûtûûrage mantûûne ja ûtheru.

⁸Tontû bûû, muntû kinya ûrîkû ûrîa ûregaga kwathîkîra ûritani bûbû tî muntû eethagîrwa akîrega kwathîkîra, îndî nî Mûrungu ûrîa ûbweejaga Roho Ûmûtheru.

⁹Gûtî na gîtûmi gîa kûbûandîkîra mantû jegiî wendo gatîgatî ga akristû. Nîkwîthîrwa buî bwingwa nî bûthirîtie kûritanwa nî Mûrungu bwendanage o muntû na ûngî.

¹⁰Nî mma buî nî bwendeete ataana na aarî ba baaba bonthe barîa batwîre Makedonia kunthe. Îndî tûrîbûûria buî bwîte na mbere kûbenda mono.

¹¹Mworoto jweenu nî jwîthîrwe jûrî gûtûûra na ûkiri na muntû eenganage na ngûgî yaawe yonka atîgûtonyeera mantû ja antû bangî. Ningî, o ta ûrîa twabwîrîre, ritageni ngûgî na njara cieenu bwingwa.

¹²Ûntû bûu nîbu bûgatûma kinya antû barîa batî ba mûûrû jweenu babwîkagîîra. Bûkéerîgîîreni muntû kinya ûrîkû abûteethia.

¹³Ataana na aarî ba baaba, tûrîenda bûmenye mma mantûûne jegiî antû barîa bakuîte nîkenda bûtîkeeje kwithikîîra ta antû barîa batî na wîrîgîîro.

¹⁴Nî twîtîkîtie atî Jesû nî aakuîre na arariûka na tontû bûu nî twîtîkîtie atî Mûrungu akariûkia barîa bakuîte bamwîtîkîtie na beejanie amwe na Jesû.

¹⁵ Tontû tûrîbûritana kûringana na ûrîa rûteto rwa Mwathani rûkuuga: atî tuî barîa tûkeethîrwa tûrî mwoyo rîrîa Mwathani akeeja, tûtîta mbere ya barîa bakuîte.

¹⁶Nîkwîthîrwa Mwathani wengwa akeenama aumîte îgûrû arite waatho na mûgambo jûmûnene. Kajû ka mûraîka ûrîa mûnene gakaigîgua gagîîtana na tarumbeta ya Mûrungu îrîre. Barîa bakuîte ndeene ya Kristû Jesû nîbo bakamba kûriûka,

¹⁷rîu tuî barîa tûkeethîrwa tûrî mwoyo, tûgaitithua îgûrû tûgwatane nabo matuune nîkenda tûgacemania na Mwathani manganyoni. Tontû bûû, tûgeeta gûtûûra amwe na Mwathani kenya na kenya.

¹⁸Tontû bûû, boranagîrieni o muntû na ûngî na nteto iu.