Read KIMERU BIBLE PROTESTANT EDITION 1Ath 5 Bible Online

1Ath 5 - KIMERU BIBLE PROTESTANT EDITION bible

1Ath 5

¹Ataana na aarî ba baaba, gûtî na gîtûmi gîa kûbwandîkîra mantû jegiî biingo na îgiita rîrîa mantû jaja jakathithîka.

² Tontû buî bwingwa nî bwijî bwega atî ntukû îîu ya Mwathani îkeeja ta ûrîa mwamba eejaga ûtukû.

³Rîrîa antû bakuuga, “Nandî kûrî na thîîrî na tûrî kindaajî.” Îgiita rîu rîongwa nîrîo kwînyangua gûkeeja na mpwîî ta ûrîa rwakaî rwa mwana rwîjagîîra mûka, na gûtî muntû ûgateetha.

⁴Îndî buî ataana na aarî ba baaba, bûtî muunduune ntukû îîu îîja kûbûkirimania ta mwamba.

⁵Tontû buî bwinthe bûrî antû barîa batûûraga weerûûne, bûrî antû ba mûthenya. Tuî tûtî antû barîa batûûraga muunduune kana ûtukû.

⁶Tontû bûû, tûkarageni tûciûki na tûrî barîîkîru na tûkámama ta ûrîa antû bamwe bathithagia.

⁷Tontû antû barîa bamamaga, bamamaga ûtukû na barîa bogitaga, bogitaga ûtukû.

⁸ Nîkwîthîrwa tûtûraga werûûne na tûrî barîîkîru, twîkîreni wîtîkio na wendo birî kaguû ka îthaga ga kwigîra kîbara na wîrîgîîro bwa wonokio bûrî nkobia ya îthaga ya kwigîra mûtwe.

⁹Tontû Mûrungu atîtûthuurîte tûrî ba gûkinyîrwa nî mûthûûro jwaawe, îndî atûthuurîte tûrî ba kwonokua na njîra ya Mwathani weetû Jesû Kristû,

¹⁰ûrîa wakuîre nîûntû bweetû nîkenda tûgatûûrania nawe tweethîrwa tûrî mwoyo kana tûkuîte ntukû îrîa akeeja.

¹¹Tontû bûû, îkanagîreni inya na bûteethanagie muntû na ûngî, o ta ûrîa bûkûthithia nandî.

¹²Îndî tûrîbwerenca ataana na aarî ba baaba, atî bûtîîage barîa baritaga ngûgî gatîgatîîne keenu, barîa babûtongagîîria ndeene ya Mwathani na kûbûritana.

¹³Batîageni mono na bûbendage nîûntû bwa ngûgî irîa baritaga. Tûûrageni bûrî na thîîrî gatîgatîîne keenu bwingwa.

¹⁴Ataana na aarî ba baaba, tûrîbwerenca bwaragîrie athao batigane na ûthao nîkenda barita ngûgî. Ûmagîîrieni barîa barî ba nkoro imbûthû na bûteethagie barîa batî na inya. Ûmagîîrieni gûkara na antû bonthe.

¹⁵Gûkagîteni kinya ûmwe weenu ûrîyia ûûî na bûngî, îndî magiita jonthe cwaageni kûthithanîria wega muntû na ûngî na kinya kûthithîria antû bangî bonthe wega.

¹⁶Gwîragueni magiita jonthe.

¹⁷Rombageni bûtîgûtîrîîra.

¹⁸Cokagîeni nkaatho mantûûne jonthe nîûntû ûu nîu Mûrungu endaga bûthithagia buî barîa bûrî ndeene ya Kristû Jesû.

¹⁹Bûkarigîrieni ngûgî ya Roho Ûmûtheru.

²⁰Bûkameneni ûroria.

²¹Thimageni mantû jonthe, bûthingatagîre bûrîa bûrî bûbwega.

²²Reganageni na mantû jarîa maaî jonthe.

²³Mûrungu wa thîîrî wengwa arobûtheria buru. Ningî roho weenu na nkoro cieenu o na mîîrî yeenu birotûûra thîîria na bitî na îgi mwanka rîrîa Mwathani weetû Jesû Kristû akeeja.

²⁴Ûrîa ûkûbwîta nî mwîtîkua na akathithia ûu.

²⁵Ataana na aarî ba baaba, tûrombagîreni.

²⁶Keethieni ataana na aarî ba baaba bonthe na nkeethi cia gûcûncana irîa ntheru.

²⁷Ndîbwerenca riîtweene rîa Mwathani atî barûga îîjî îthomerwe ataana na aarî ba baaba bonthe.

²⁸Ûtugi bwa Mwathani weetû Jesû Kristû bûrokaraga amwe naabuî.